Jurnata pusitiva a ll’ora ‘e ll’apritivo

Jurnata pusitiva, pusitiva assaje guagliú! Ajere a ll’ora ‘e ll’apritivo (aperitivo),ca ggirava ‘ntribbuna divano, ‘e guagliune cuane risulvetteno bbuono ‘a pratica Turino cunzignanno a vVentura (ca, pover’ommo…, parlava sulo) belle e ‘ncartate ddoje sfugliatelle (una riccia e n’ata frolla)caude ‘e tiesto (forno). Jurnata pusitiva,ma no comme speravo visto ca Roma e Juve vincetteno, ma sinamparco (comunque) pusitiva pecché doppo paricchi anne, ‘o Napule vattette ‘e granate e riuscette a repiglià ‘a rincorza verzo â cimma d’’o campiunato; ‘e guagliune ‘e don Rafele vincetteno cu ‘nu joco cunvincente e senza sfregazze (sbavature) e ll’avastaje ‘o primmo ajone pe mmetterse ‘e tre ppunte dint’â sacca e cconta poco si se vincette cu dduje ricure assignate giustamente ‘a ll’arbitro De Marco e addirittura [sentite,sentite!] ‘o siconno ce ‘o signalaje Mazzoleni arbitro ‘e porta, ricure mise dinto cu granna freddezza dô Pipita Higuaínno turnato a gghiucà comme sape fà isso.
Passammo ê ppaggelle:
REINA 6,5 Nun êtt’ ‘a fà ‘e straurdinarie, anze faticaje poco, ma se facette truvà sempe pronto comme quanno a ll’arrancua (nella ripresa) fruntiggiaje a mmestiere ‘na bbotta ‘e Meggiorini ca êsse pututo arapí ‘o fullé, ma, pe ffurtuna nosta, Pepe è ‘na bbanna (una saracinesca) E se facette apprezzà pure pe cchelli subbaste (rilanci) soje longhe quanto ‘na quaresema!
MAGGIO 6 Appressuraje (spinse) raramente ‘ncopp’â curzia ‘e dritta accuntentannose ‘e guvernà (gestire) ‘a camma soja senza prubbleme.
ALBIOL 7 ‘Na sicurezza piazzato a ccentro d’’a difesa.Tadiello (impeccabile) quanno ascette palla ô pede, securo dint’ô juoco aveto e cquanno êtt’ ‘a nchiudere, chiammannose ll’applavuso d’ ‘o San Paolo.
FERNANDEZ 6,5 ‘O guaglione se fa apprezzà sempe ‘e cchiú ògne fullé ca passa; jucatore ca nun va p’’o ssuttile e vva ascianno ‘a cuncretezza, alluntanaje ‘a minaccia senza penzarce ‘a coppa e senza nisciunu sfregazzo.
ARMERO 5,5 ‘Ncunfronto d’’o culleca d’’a fascia ‘e dritta appressuraje (spinse) assaje ‘e cchiú, ma spisso fove troppo‘mpriciso sia comme bbassurere (suggerimenti) ca comme cruzze (cross).
INLER 6,5 Quase ògne azziona passaje p’’e piede suoje Guvernaje a mmestiere ‘o pallone ô pprincipio d’’o fullé, quanno ‘o Torino stette tutto nchiuso dint’â trecquarta soja.A ll’arrancua accumpagnaje ll’azziona cu granna qualità.
DZEMAILI 6- Fove isso a ppiazzarse annante â difesa e a ffà trancara (muraglia), permettenno ô turco-napulitano ‘e decrusciarse (di sganciarsi) quacche vvota. Però nun se pigliaje respunzabbilità ‘e sustàtere (impostare) e perdette quacche pallone ‘e troppo.
MERTENS 7,5 Doppo Marziglia fove n’ata vota isso ‘o meglio ‘ncampo. Da ‘na scicca jucata soja nascette ‘accasiona d’’o primmo ricore ca, miso dinto dô Pipita, sbluccaje ‘o fullé. P’’o riesto jucaje sempe ‘e primma risultanno pulitelico (prezioso) dint’ô sviluppo d’’a manovra. A ll’arrancua (nella ripresa), cu ‘o ppoco ‘e spazzio ‘e cchiú, fove anàtropo (devastante) ma Padelli lle levaje ‘a joia d’’a rredda (la gioia del gol) ca se fósse mmeretato. (dô 74° PANDEV 6,5 Trasette a mmestiere ‘int’ô fullé (in partita), cupulianno (dialogando) dint’ô stritto cu ‘e cumpagne.’Ncopp’ a ‘na rimessa longa ‘e Reina Basha fove custretto a ffermarlo cu ‘e ttriste e s’abbuscaje giustamente ‘nu cartellino russo.)
HAMSIK 6- Nun ce simmo ancòra; stette ancòra a mmiezu servizzio e nun riuscette a guvernà cierti pallune ‘nfase uffenziva, cunfermanno d’essere a ccurto ‘e saffenèja (lucidità).Jette ‘nu poco meglio quanno s’avasciaje ‘nfra ‘e llinie pe cupulià cu ‘e cumpagne o pe rradduppià ‘ncopp’â fascia mancina. Ma nun è cchello ca ce aspettammo ‘a uno comme a mMarekiaro! . (da ll’ 80° ZAPATA sv)
INSIGNE 5 E nno pe sfarma (colpa) mia, ma pecché fove isso ca sbagliaje troppo sotto porta. Ô pprincipio d’’o fullé perdette ‘o tiempo d’’a cunchiusione e perdette ‘na bbona accasione; cchiú ddoppo, senza Padelli asciuto dê pale, a pporta spalancata se facette devià ‘nu pallone còmmeto da ‘nu difenzore; A ll’arrancua fove ancòra sempe troppo ‘mpriciso e se ncapunette a ttirà a ggiro pure quanno nun fósse stato proprio ‘o caso.
HIGUAIN 7 Tiranno ‘o primmo ricore sbluccaje ‘o risultato cu ‘na bbotta fredda, forte e pricisa piazzata a ddritta d’’o purtiere sott’ô travesagno (sotto la traversa);’ncopp’ô siconno ricore cagnaje squina(angolo) e mmettette cu pricisione e freddezza ‘o pallone a filo ‘e palo ‘e mancina. P’’o riesto d’’o fullé fove sempe a ddiusposizziona d’’a scuatra pronto a gghí ‘mpressione (pronto al pressing).
(dô 66° CALLEJON 6 Trasette súbbeto apprenzanno (pressando) comme a ‘nu pazzo pe mmettere paura â difesa turinista.Padelli cu ‘na bbella parata lle levaje ‘o sfizzio ‘e signà.)
BENITEZ 7 ‘A scuatra vincette cu dduje ricure, ma dô pprincipio d’’o fullé ‘a cummannaje sempe essa e fforze se fósse mmeretato ‘e vencere cchiú abbunnante;justa ‘a decisiona ‘e scegliere a mMertenso,ca confermaje ‘e stà bbuono ‘nsaluta e d’attreverzà ‘nu bbuonu periodo ‘e fromma; justa pure ‘a decisiona ‘e fà piglià sciato a bBehrami e a cCagliecònno e de chiammà fora a ‘nu certo mumento a hHiguain e a mMarekiaro, ‘mpruspettiva Firenze.
ll’arbitro DE MARCO 6 Se levaje quacche debbeto ca teneva cu ‘o Napule. Appesantuto e braduso (lento), siscaje sempe luntano ‘a ll’azziona e permettette spisso senza sanziunarlo ‘o juoco viulento a cchille d’ ‘o Torino o caputaje ‘e falte (i falli). Pe ffurtuna ca pure stanno luntano nun lle mancaje ‘o curaggio ‘e siscà ‘o primmo ricore e p’ ‘o siconno (ca nun aveva visto), stette a ssèntere a mMazzoleni ca ‘o ‘mmezziaje. Cose ‘e pazze!
E cu cchesto ve saluto e ce sentimmo ‘a prossima vota , si Ddi’ vo’. Staveti bbe’!
R.Bracale Brak

ilnapolista © riproduzione riservata