Doppo d’’o sciuliamazzo ‘a quaterna

Me ll’aspettavo, guagliú e succedette! Me ll’aspettavo ca doppo d’’o sciuliamazzo pigliato a Llondra contro a ll’Arzenàllo, ‘o Napule ‘ncampiunato se fósse levato ‘e pacchere ‘a faccia. E accussí fove. E ajere ‘mmerz’ê ttre, ‘o Napule facette ascí ‘a quaterna ‘ncopp’â rota ‘e Livorno ( proprio comm’i’ êvo previsto), me facette parià gnocche, tracchiulella e gallenella a rraú e dètte ‘a meglia risposta ‘a scuatra ‘e Pupone Totti ca sàpato a ssera era juta a ffà ‘a sbrasata a mMilano vattenno ‘a scuatra ‘e wallerettino erode mazzarri pe ttre a zzero e piazzannose ‘ncimma ‘e crassifica.’A Roma êva bbussato cu ‘o tre, sí ma ‘o Napule rispunnette cu ‘nu doje luongo e nun se facette staccà aspettanno e speranno ‘nu miraculo dummeneca e ssera a tTurino ‘nfra ‘a scuatra ‘e parrucchino-conte e cchella ‘e cap’-‘e-vacca Galliani,addó però ‘o miraculo nun succedette e cchillu mazzo scassato d’’a juventússa avette raggiona d’’o Milànno! Overo ca ajere mancajeno no una o doje pedine, ma quatto jucature cauzante: Higuaínno, Albiòllo, Zuniga e mMaggio, ma don Rafele (ca ce sape fa) ‘ncarraje a scegliere chille adatte a sustituirle e avette raggiona isso giacché chi vence ave raggiona e ‘o Napule vincette, senza sí, senza ma e ssenza però! Passammo ê ppaggelle: REINA 6,5 Nun tanto pe cchello ch’êtt’’a fà comme purtiere ca ajere fove assaje poco…, ma p’’o fatto d’avé dimustrato d’essere ‘nu cratisto (ottimo) centrucampista addietrato pe ccomme, puggianno (rilanciando) cu ppiere e mmane fove sempe priciso dànno sicuranza (sicurezza) a ttutte ‘e suoje.
MESTO 6,5 Chiammato a ffà ‘e straurdinarie,pe bbia ca mancajeno cuntempuraneamente Zuzzú e mMaggio, pe dimustrarme ca nun è (comm’i’ ati vvote êvo ditto)’nu jucaturiello ‘e serie B ajere sfuderaje n’atalossa (prova) attienta e pprusíosa (generosa), cuncedenno poco ‘ndifesa e pruvanno pure a appressurà (spingere).
FERNANDEZ 6,5 Atalossa cunvincente d’’o guaglione argentino; ‘nu ribbundisso (rimpallo) sfurtunato ‘o sfavurette ô primmo ajone , ma isso riuscette súbbeto a mmetterce ‘na bbona pezza e ppe tutt’ ‘o riesto d’’o fullé nun cummettette nisciuno sfregazzo (sbavatura) e sse pigliaje cchiú ‘e ‘na respunzabbilità ‘nfase ‘e plantamiento (d’impostazione). A ‘stu punto i’ m’addimanno: Ma ch’aspetta cannavaro a ffàrese ‘a mappatella e a gghirsene?
BRITOS 6 Bbona atalossa senza manco ‘na fessaria. Rummanette cuncentrato nsi’ ô scuppó (termine) senza maje fàrese ‘mpressionà ‘a Paulinho pure ‘ncopp’ê ppalle adranose (inattive).
ARMERO 6,5 N’ata bbella surpresa!’O Livorno appressuraje(spinse) quase sempe dê pparte soje, ma isso nun concedette niente!Cchiú ‘e ‘na vota fove ‘mpriciso cu quacche bassurero (suggerimento) arrunzato, ma s’ammereta cchiú d’’o seje p’’a prusiatezza (generosità) dimustrata ‘ndifesa ca nun è esattamente mestiere suĵo.
INLER 7 Sbagliaje overamente poco o niente,riuscenno a guvernà a mmestiere ‘o pallone arapenno ‘ncopp’a ll’esterne.È overo ca bBardi lle détte ‘na bbona mana,ma isso allimmeno ce pruvaje truvanno ‘a rredda cu ‘na meza cagliosa ‘a fora.
BEHRAMI 6,5 ‘Nfra ê linie nun ce stette tanta fatica ‘a fà ma chiunque se truvasse a ppassà p’’e ccamme guardate ‘a Valònno jette a ‘mpattà ‘nfaccia a ‘nu cummò cu ‘o specchio, ca se dimustraje utile pure pe dubblà (raddoppiare) ‘ncopp’a ll’ esterne.
CALLEJON 7 Durante ô primmo ajone nun se vedette tanto, ma sustenette ll’azziona ufferenno cuntemporaneamete granne ajuto ‘nfase difenziva dubblanno(raddoppiando) addó e cquanno fove nicessario.A ll’arrancua se facette vedé cchiú spisso dint’ê spazzie comme a cquanno Pandèvvo lle servette ll’ajuda (assist) p’’o tre a zzero. (dô 67° INSIGNE 6,5 Trasette subbéto dint’ô fullé (incontro) superanno sistematicamente ll’avverzario ‘e turno. Cupuliaje (dialogò) a mmestiere cu Mertens e cu ‘nu tiro d’’e suoje favurette (propiziò) ‘a rredda ‘e Marekiaro.)
HAMSIK 6,5 Voglio essere largo ‘e maneca e lle mecco ‘nu punto ‘e cchiú p’’a rredda signata, ma se vedette ca ‘o giuvinotto, comme a ll’urdeme tre o quatte vote, nun fove a ll’arriba (al meglio) d’’a cundizione,mancannole pulunessa (brillantezza), cegna (grinta) e fforza p’essere ‘o primmo a aizà ‘a pressiona (pressing); epperò jucatore ‘ntelliggente nun mancaje ‘e aculistà (seguire) ll’azziona nsi’ ô scuppó (alla fine) facennose truvà pronto pe mettere dinto ‘o quatto a zzero! (da ll’83° BARITI 6 ‘E ‘ncuraggiamento.Esurdiente, cu ‘na bbella prucressione costrignette a rRinaudo a abbuscarse ‘nu cartellino jalizzo).
MERTENS 7,5 Forze ‘o meglio. Sistematicamente cummannaje ‘o cuntrattacco (contropiede) e servette ll’ajuda pulitelica (l’assist prezioso) dint’a n’ àzzone ( un corridoio) p’’a rredda ‘e Pandèvvo ca sbluccaje súbbeto ‘o fullé.Fove suĵo pure ‘o bbassurero (suggerimento) ca purtaje ô tiro ‘e Inlèrro. Rijalaje granni ghiucate a ll’aldezza d’ ‘a linia ‘e funno campo e bBardi nun le dètte ‘a suddisfazziona ‘e signà ‘ncopp’a ‘nu bbellu tiro ‘e punizziona. Peccato! S’’o fósse mmeretato!
PANDEV 7,5 Atalossa ‘e tutto rispetto ‘e Pandemonio; lanzato a mmestiere ‘a Mertens, nun sbagliaje piazzanno ‘nu granne diacunale ‘ncopp’ô palo luntano;servette ll’ajuda (l’assist) a Cagliecònnno p’ ‘o tre a zzero,e ppe tutto ‘o fullé difennette bbuono ‘o pallone, superaje spisso ll’ommo e addirittura tenette ‘o cuorio (senza ‘o fisico adatto) ‘e fà a spurtellate cu cchilli mammasantissime d’’e difenzure livurnesi. (dô 76° ZAPATA 6 ‘E ‘ncuraggiamento;nun avette granni pallune ‘a sfruttà dint’â camma ‘e ricore e sse limitaje a quacche sponna luntano dâ porta e a ppoco ato.)
BENITEZ 7,5 Nun pe nniente stammo parlanno ‘e don Rafele e nno ‘e ‘nu sciacqualattuca[ògni riferimento a mmazzarri è vuluto!]! Avette raggiona a scegliere ‘e puntà ‘ncopp’a Pamdèvvo comme primmo artigliero (punta)ca risultaje ‘mpurtante contro ê centrali livurnise broduse (lenti) e ‘mpacciate.Comme pure nun se sbagliaje a scegliere a fFernandèzzo ca mettette ‘a musarole ê ggialante (giganti) d’’o Livorno soprattutto ‘ncopp’ê ppalle adranóse (inattive). Dètte spazzio pure a Mertens ca ‘o rincrazziaje cu ll’ajuda (l’assist) ca sbluccaje ‘e juoche e ccu ttanti ghiucate ‘e qualità.Ô finale (ato ca erode mazzarri!) nun mancaje ‘e curaggio facenno esurdí a bBariti, ‘nu criaturo, nserie A.
L’ARBITRO BERGONZI 6
È ‘na meza cazetta comme ô riesto ‘e tutte ll’arbitre italiane; facilmente se fa ammagagnà e sse porta ancòra appriesso ‘o pisemo d’ ‘e critiche ca avette p’’e duje ricure (sacrusante, comme po se vedette!) date ô Napule (tempurata [stagione] 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie e ss’appila ‘e rrecchie… Però ajere puttanate grosse nun ne facette…. e allora mettimoce ‘o seje!
E ffermammoce cca. Si ‘o Signore ce ‘o ffa vedé ce sentimmo ‘a vota ca vène p’’o prossimu fullé [ca nun saccio qua’ è e cquanno è] , speranno ‘e puterve dicere ca‘o Napule è tturnato a vvencere!
Bbona salute!
R.Bracale Brak