Che avvelimiento, guagliú, che ssanco amaro! ‘O ssaccio ca primma o doppo êva ’a succedere…, ma proprio nun se ne scenne ca succedette ajeressera contro a ‘na scuatra ‘e pecurare ‘mbrugliune e capuzzielle! Chello ca nn’êva maje succedere, succedette! Mannaggia a cchello ca nun se po’ ddicere, guagliú! Ajeressera ‘o Napule e soprattutto culo’e-chiummo fóveno cacchie ‘e mme ‘ntussecà ‘a serata e mannarme ‘o ppoco ‘e cena! Nun ce simmo, nun ce simmo e nun ce simmo! ‘Na scuatra ca vulesse cumbattere p’’o scutetto nun po’ perdere ‘nu fullé comme a cchillo perzo ajeressera quanno ‘e cuane avetteno ddoje granne ‘accasione [primma cu Pandèvvo e ppo cu Lorenzigno]pe passà ‘nvantaggio e nun ne sfruttajeno manco una! Nun ce simmo, nun ce simmo e nun ce simmo! Pe lluttà p’’o scutetto s’à dda essere cchiú attrezzate e cchiú cazzemmuse si no fernesce sempe a vvrenna.
Passammo ê ppaggelle:
REINA 6 Nun tenette nisciuna sforma (colpa) ‘ncopp’ ddoje rredde rumanese e ce putette fà poco o niente; purtroppo sia ‘a punizziona ca ‘o ricore ‘e Pjaniccio foveno forte e ttirate a mmestiere.
MAGGIO 5,5 Non è ancòra all’arribba (al meglio) e se vedette; arrivaje spisso a ffunno ‘e campo ma lle mancaje saffenèia (lucidità) dint’ê bbassurere (nei suggerimenti).
ALBIOL 6 E che ‘o vuó dicere?Nun avette nisciuna respunzabbilità ‘ncopp’ê ddoje rredde e sbrugliaje cchiú ‘na situazziona periculosa cu granna ‘sperienzia.
BRITOS 6 Accumminciaje bbuono sustatanno(impostando) cu perzunalità ll’azziona dê zzache (dalle retrovie) e tenenno a mmestiere pure ‘ntassezza (in velocità) Fove custretto a ascí pe ‘nu ‘mpiccio â spalla.Che peccato! Fósse rummaso ‘ncampo avessemo visto n’atu fullé e forze nun avessemo perduto!
(dô 44° CANNAVARO 1,5 ‘A morta civile, ‘nu guajo passato! Ma quanno ‘a piglia ‘a decisione ‘e jrsene a ffà cchiú ddinto ‘e do’ sape isso e addó ce ll’aggiu mannato i’?Manco era trasuto ca facette ‘na falta (fallo) ô lémmeto d’’a camma ‘ncuollo a Gervinho cuncedenno ‘a punizziona ca addeventaje ‘a primma rredda rumanese justo ô finale d’’o primmo ajone e lle facette abbuscà giustamente ‘nu cartellino jalizzo.Nun cuntento, a ll’arrancua cumpletaje ll’opera e ppesce ‘e cannuccia comm’è fove prutagunista necativo facennose cartià ‘a chillu figlio ‘e coperativa ‘e Borriello e facennose cogliere a ffà ‘na falta ‘a ricore ca lle custaje pure ‘o cartellino russo.N’atu difenzore appena appena decente quanno Borriello ll’acchiappaje p’’a maglia e s’’o carriaje ‘nterra, ‘mmece ‘e abbrazzarlo, êsse aizato ‘e braccia,se fósse fermato,avesse ntustato ‘e piede e alluccato comme a ppazzo pe farese sèntere ‘a ll’arbitro e farle vedé che steva succedenno.Isso ‘mmece se menaje ‘nterra purtannose appriesso a bBorriello, ca chello vuleva! Fesso, fesso, fesso! Tre vvote fesso!)
MESTO 6,5 Se ll’êtt’’a vedé cu chillu mammone ‘eMaicònno, ma nun se spaventaje e appressuraje (spinse) cu bbona cuntinuità e cu pperzunalità riuscenno spisso a ccagnà passo.
BEHRAMI 6,5 Vincette tanti bbriche (tanti duelli) ‘mmiez’ô campo e soprattutto ô pprincipio spezzaje ‘e passe d’’e rifurnimenti a tTotti. Doppo ll’affastamiento (espulsione) ‘e Cannavaro passaje a ffà ‘o difenzore e s’’a vedette ‘e bbello!Ah si (doppo ca Britòsso êtt’ ‘a ascí) don Rafele ll’avesse spustato areto e ffatto trasì a Dzemaili ‘mmece ‘e Cannavaro, forze nun avessemo perduto e i’ nun me fósse fatto ‘o sanco amaro. Ma nun ghiette accussí!
INLER 6,5 ‘Nfi’ ô prazzo (Fino alla fine) nun perdette ‘a calma, pruvanno a mmanuvrà ‘o pallone triànnolo (smistandolo) ‘ncopp’a ll’esterni. Funnamentale dinto ê ddoje fase ‘e juoco.(da ll’82° DZEMAILI sv)
CALLEJON 6 Assicuraje granne isurrupío. Cchiú ‘e ‘na vota se ‘ntrufulaje ê spalle Dodò e, a ll’arrancua se piazzaje cchiú vascio truvanno bbuoni bbasurere (suggerimenti) p’allargà ‘a difesa, visto ca a ‘nu certo punto ‘e rumanise jucajeno ‘ndiece arreto â linia d’’a palla!
Hamsik 4 Me dispiace, ma pe ttutto ‘o fullé risultaje assente ‘ngiustificato e nun fove crestiano d’essere Marekiaro! Sí e nno cercaje ‘e dà ‘na mana a Inlèrro oBehrami, ma maje ca sustentasse (sostenesse) ll’azziona uffenziva. Nun currette manco assaje e se vedette ca nun stette ‘nghiurata e i’ ll’avesse cagnato cu quaccun’ato!
INSIGNE 5,5 Me fósse aspettato ‘e cchiú ‘a Lorenzigno ca forze steva ‘nu poco stracquo;spisso partenno dâ mancina criaje quacche superiorità, ma fove acqua ca nun levaje arzura; ‘e granne ll’ajuda (assist) ca mannaje ‘mporta a pPandèvvo, ma quanno ‘o macedone currispunnette ‘a crianza (ricambiò il favore) Lorenzigno spedenno ‘a palla ‘ncopp’ô palo, perdette ‘a commoda accasione faccia a ffaccia cu De Sanctísso, e se vedette allora ca ‘o guaglione nun tene cazzimma, pecché nun apprufittaje ca Maicònno ‘o steva martellanno, e nun se menaje ‘nterra chiajtannose ‘o ricore [ch’êsse pututo cagnà faccia ô fullé…] e ll’affastamiento (espulsione) d’’o mammone! ‘O fatt’è ca Lorenzigno è troppo ‘nu bbuonu guaglione, nun è scafato e à dda crescere!
PANDEV 5,5 Cupuliaje (Dialogò) a mmestiere cu ‘e cumpagne e difennette comme sul’isso po’ fà ‘o pallone, ma pesa comme a ‘nu vriccione (macigno)’o ghierro (l’errore) ‘ncopp’ô zzero a zzero faccia a ffaccia cu De Sanctísso. (dô 67° HIGUAIN 5,5 ‘Mpussibbile darle ‘e cchiú. Avette pochi pallune ‘a jucà e se vedette ca jucaje cu ‘o freno a mmano tirato nun vulenno furzà[ a risultato cumprumesso] pe sparagnarse cuntrattiempe (ricadute))
BENITEZ 5,5 Me dispiace, ma ‘sta vota don Rafele nun me piacette; è overo ca ajeressera ‘o Napule fove orfano ‘e Higuaínno,’e Zuniga e d’Armero,e s’avette arrangià,ma addó don Rafele sbagliaje fove quanno nun tenette ‘o cuorio ‘e cagnà a mMarekiaro ca aizava porvere… e soprattutto quanno [visto ca nun se putette serví ‘e Fernandèzzo, ca nun s’era allenato], doppo ca Britòsso era asciuto pe ‘nu ‘mpiccio â spalla, facette trasí a cCannavaro, ch’è ‘na fetenzia cu ‘a nocca rossa e ce facette perdere ‘o fullé, addó ca forze fósse stato meglio a ppiglià a bBehrami e spustarlo arreto a ffà ‘o difenzore facenno trasì ‘mmiez’ô campo a Dzemaili o a rRadoseviccio…Ma don Rafele vulette fà ‘e n’ata manera e ancòra ne sto’ chiagnenno ‘e cunsequenzie!
Arbitro ORSATO 4 Vecchia carta cunusciuta ca teneva cchiú ‘e ‘nu dèbbeto cu nnuje e ajeressera aumentaje ‘a ddosa cuncedenno ê cammurriste rumanise, ‘mbrugliune e ffiglie ‘e coperativa ‘e vattere sistematicamente ê cuane senza mettere lengua e sventaglianno cartelline jalizze sulo contro ê nuoste e pprimma ‘e farlo contro a ‘nu rumanese ce penzaje diece vote e ppo… nun ‘o facette!
P’‘o riesto, direzzione tipo: i’ nun veco, i’ nun dico,i’ nun sento, anze veco dico e ssento ô ccuntrario comme quanno assignaje â Roma ‘o ricore d’’o doje a zzero!
‘Ncuncrusione ‘a mola d’’a primma scunfitta ce ll’âmmo tirata e mmo sperammo sulo ‘e repigliarce súbbeto sempe cu ‘a speranza ca don Rafele nun facesse cchiú ghiucà a ccannavaro, ca se chiammasse a mMarekiaro, ‘o cazziasse e ‘o mettesse a ssunna (regola)! Tutto summato, p’’o mumento stammo ancóra ‘e casa ê piane avete speranno ca dimane ‘a cuncurrenza nun gghiesse assaje meglio ‘e nuje!
Bbona salute. Ce sentimmo!
Raffaele Bracale Brak
