Festa granna ma ‘e bbotte a mmuro astipammuncelle

Festa granna ajeressera ô Meazza addó, doppo ventisette anne ‘o Napule jette a asfardà ‘a scuatra ‘e chillu ‘mbruglione ‘e Balotelli, ‘e chella meza cazetta ‘e matri e de chella faccia ‘e cestunia d’allegri ca ajere me parette ‘na monaca d’’e Trentatré cazziata dâ matra Superiora. Eppure ‘a dummeneca nun s’era presentata pusitiva ggiacché mmerz’ê ttre ‘a juventússa, cacata sotto, era riuscita a vvattere ‘a scuatra ‘e chella zoccola ‘e Giulietta, mentre a rRoma ‘a scuatra d’’o pupone cammurrista s’era sbarazzata ‘e chilli scieme d’’o pappavallo ‘e lotito; ‘nzomma tuccava ô Napule dà ‘na risposta acconcia (adeguata) pure si lle tuccava ll’ergasía ( il compito) cchiú difficultósa giacché ‘o Palazzo ll’êva assignato doppo quatto juorne dô fullé ‘e Ciampionsa ‘e jí a gghiucà a mMilano contr’ô Milanno e nno contr’â Procatàvere… (capisce a mme!). Ma ‘o Napule nun se spaventaje e dètte ‘a risposta esatta jenno addirittura a vvencere e ll’êsse pututo fà pure cchiú sustanziusamente si Pandèv(vo) nun êsse menato fora ‘a palla d’’o pussibbile tre a zzero.Ma nun ghiammo a ccercà ‘o pilo dinto a ll’uovo! Vincettemo e cchesto conta pure si me fósse piaciuto farlo cu tricchitracche, biancale e fujafuje e nno cu ‘a parpitazziona ‘e ll’urdemi minute…. ‘E bbotte a mmuro astipammuncelle pe n’ata accasione e p’’o mumento gudimmoce ‘o primmo posto ‘ncrassifica, pure si ‘ncunduminio! Passammo ê ppaggelle:

REINA 8,5 ‘Nsuperabbile. Sicuro dint’ a cchiú ‘e ‘na circostanza ‘ncopp’ê cunchiusione ‘a luntano e cquanno ascette. Nun dètte a bBalotelli ‘a suddisfazziona ‘e signà n’atu ricore ca ‘o milanista s’era arrubbato menannese ‘nterra, senza ca Albiòl(lo) ll’êsse fatto niente…, ma rummanette fremmo ‘ncopp’â rredda d’’a bandiera d’ ‘o Milànno, pecché nun vedette ‘e partí ‘o tiro ‘e Balotelli.
MESTO 6,5 Miso ‘ncampo ô posto ‘e Maggio ca lamentaje ‘nu ‘sturvo (fastidio) ô denucchio, cuvernaje a dduvere ‘a camma (l’area) ‘e cumpetenza soja cu n’atalossa ‘e granna attenziona,però accompagnaje poco ll’aziona.
ALBIOL 6,5 Miezu punto mancante p’essere stato fesso ‘nnaccasione ca purtaje ll’arbito Banti a rijalà ‘nu ricore a cchillu ‘mbruglione ‘e Balotelli,ca se sapeva si sulo uno ll’êsse ditto:”Che bell’uocchie ca tiene!…” se fósse menato ‘nterra p’avé ‘nu ricore. E proprio chesto succedette…, ma p’’o riesto l’atalossa (prova) ‘e Raúl(lo) fove assulutamente pusitiva: sbrugliaje cchiú ‘e ‘na situazziona periculosa curiarcanno (dominando) ‘o juoco auto.Friddo e ssicuro quanno servette ‘a sponna p’’a rredda ‘e Britòs(so).
BRITOS 8 Cunfermato ô centro d’’a difesa, facette ‘nu fullé ‘e granne epípeto(livello) ascenno cu perzunalità a tturno dâ difesa pe sustàtere (impostare), curiarcanno (dominando) pure isso ‘o juoco auto. Semprice (pe ‘nu stannardone comm’è isso), ma pesante quantu maje ‘a rredda ca sbluccaje ‘o fullé ‘e primm’appetito permettenno ô Napule ‘e passà ‘nvantaggio.
ZUNIGA 6- Perdette ‘a fesso cchiú ‘e ‘nu pallone, e arresecaje assaje frananno dint’â camma ‘e ricore nosta ‘ncuollo a pPoli ca ggià, pe ‘na sbutecata, steva cadenno pe cacchie suĵe e steva nchiuso ‘ncopp’â linia ‘e funno.
BEHRAMI 7,5 Jucatore ‘nzostituibbile, sprecaje ‘na granna accasione a pporta spalancata ô pprincipio d’’o fullé, ma po se rifacette cu ‘o ‘nteresse cu n’atalossa ‘e lusso ‘nfase difenziva secutanno n’accunto (cliente) difficile comme a bBalotelli e ô finale se facette ‘nquatto pe ffà ‘o cane ‘e presa, nchiudenno cca e lla!
DZEMAILI 5,5 ‘A nota stunata: tanta corza e tantu muvimento, ma pure troppi fessarie ‘nfase ‘e bassurero (suggerimento).’Ncopp’ô doje a zzero êss’ avuto gestí meglio ‘o pallone e nun ce riuscette…, senza scurdarce po ca ô finale restaje a gguardà ‘ncopp’ô tiro ‘e Balotelli, cosa ca ce custaje ‘a rredda milanista!
CALLEJON 6,5 Si quaccuno s’addimanna pecché don Rafele nun ‘o po’ levà, se guardasse ‘o fullé d’ajere e vedesse comme ‘o guaglione currette senza cassura (sosta/pausa) pe ttutta ‘a curzia ‘e dritta dànno isurrupía (equilibrio) â scuatra.
HAMSIK 6- Se sacrificaje assaje ‘mpressione (nel pressing) auto ca mettette ‘ndifficultà ‘a difesa milanista.Però ‘nfase ‘e plantamiento (impostazione) nun facette ‘o solito fullé pecché cummettette troppi fessarie cu cchiú ‘e ‘nu bassurero (suggerimento) sballato. (dô 66° PANDEV 6-Trasuto pe piglià ‘o posto ‘e Marekiaro, quanno ascette ‘o Pipita se piazzaje a ffà ‘a primma ponta.Avette ’accasione pe ffà ‘o tre a zzero ma ‘a sprecaje mannanno fora. Peccato!)
INSIGNE 5,5 Stanco, ajere Lorenzigno nun fove isso: accumminciaje bbuono ‘o fullé mannanno ô manicomio ‘a tràsera (retroguardia) d’Allegri cu ‘e muvimente ca sape fà sulo isso e servenno ‘nu bbellu pallone a bBehrami contro a Abbiati. Ma ‘ncapo ‘e diece minute ggià se ne scennette e cuntinuaje a zappettà pe quase tutto ‘o fullé senza zuco, ma don Rafele preferette tenerselo a lluongo ‘ncampo speranno ca putesse fà male cu quacche repartita (ripartenza) (da ll’83° INLER sv)
HIGUAIN 9 Jucatore ‘e n’ato epípeto(livello), facette n’atalossa ‘a levarse ‘o cappiello. Pe ttutto ‘o primmo quarto d’ora fove fantastico e cu ‘e muvimente suĵe spaventaje a mmorte ‘e milaniste mannannole ô manicomio. Ll’eccezziunale rredda d’’o dubblato (del raddoppio) fove ‘nu cumbinato (misto) ‘nfra fantasia, pricisione e pputenza e quanno partette ‘mprucressione dâ trecquarte nun ‘o putetteno fermà nè ccu ‘e bbone, nè cu ‘e ttriste!(dô 77° MERTENS 6 Nun avette tanti bbuoni pallune ‘a jucà, ma ô finale mettette paura a Abbiati.)
Benitez 9 Soprattutto p’averce dato ‘a suddisfazzione doppo vintisette anne ‘e turnà a vvattere ‘o Milànno ô Meazza. Trainèrro ‘ntelliggente e priparato, pe ddarle trancuillità, pazziaje cu ‘e jucature nfi’ ô mumento ‘e trasí ‘ncampo e ‘o risultato se vedette: ‘o Napule pigliaje ‘e faccia ‘o fullé comme maje era succieso ô Meazza e rijalaje spettaculo pe bbona parte d’’o fullé; po quanno ‘o Milanno accumminciaje a ffurzà ‘a mana e ‘e tiempe, ‘e cuane dimustrajeno pure ‘e sapé difennere cu cumpattezza. Se sparagnaje a mMaggio e a Inler (ma pe mme se sentette ‘a mancanza d’’o turco-napulitano dint’â circulazione ‘e palla) e a ll’urdemu quarto d’ora chiammaje fora pure ô Pipita.
ll’arbitro BANTI 4 ‘E stima. Vecchia cunuscenza, ajere ‘mmece ‘e levarse quacche ddebbeto cu ‘o Napule, ne aumentaje ‘a ddosa; arbitro casalinco, distratto e superficiale pigliaje spisso, ‘ndanno d’’o Napule, ‘a sputazza p’’a lira ‘argiento, ‘a bbanca ‘e ll’acqua p’’o carro ‘e Piererotta e ‘o cuoppo ‘aulive p’’o campanile d’’o Carmene e se facette cartià ‘a Balotelli.
‘Ncuchiusione, certo chella d’ajeressera nun fove ‘a meglia partita d’’e cuane ma se jucava contro ô Milànno ca facette ‘nu bbuonu fullé e nun fove facile cuntrullà ‘a pusizziona ‘e ‘nu figlio ‘e coperativa comme a bBalotelli ca teneva spazzio e ttiempo pe fà male.Certo avimmo ancòra migliurà tanti ccose, ma vencere ô Meazza allarga ‘o core, spicialmente putenno cuntà ‘ncopp’a ‘nu granne trainèrro e a ‘na scuatra ca dimustraje carattere nsi’ a ll’urdemu minuto!
E bbasta accussí.Si ‘o Signore ‘o vvo’ ce sentimmo â prossima vota, ca êsse ‘a essere, si nun fallo ggioverí ca vène.
Staveti bbe’!
R.Bracale Brak

ilnapolista © riproduzione riservata