E ppure chesta è ffatta, pure chesta è gghiuta ‘mpuorto, guagliú E cu ssuddisfazzione! Pecché, doppo d’’o scunzulato pareggio casalinco cu ‘o Sassuolo, tutte stévemo aspettanno quala reazziona êsseno avuto ‘e guagliune ‘e don Rafele. E fove bbona e ce lassaje ‘a vocca bbona a nnuje e ppure ê crifune visto ca ‘a premiata pasticciaria Benitèzzo, pe mmano d’’o dulciere Pandemonio Pandèvvo lle ‘ncartaje ddoje sfugliatelle [una riccia e n’ata frolla…]pe farle fà ‘na bbona dummeneca. Ll’unico ca forze avesse preferito dduje cannuole o duje bbabbà fove Preziosi ca nun se divertette rummanenno a gguardà cu ‘na faccia ‘e cestunia ca s’aveva agliuttuta ‘na lacerta viva e ‘a senteva fucechià dint’ô stommaco.Nuje ‘mmece ce divertettemo e ancòra ce âmm’’a divertí spicialmente si ogge ‘a Roma nun vatte ‘o bBologna e si ‘a juventússa nun riesce a vencere cu ‘o Torino (sempe ca Mazzoleni nun le dà ‘na mana a ffarlo!…,ma ce spero poco). Passammo ê ppaggelle.
REINA 6,5 Nun êtt’’a fà cape d’angelo, ma chello ca facette ‘o ffacette a mmestiere, senza sbaglià niente e subbastanno (rilanciando) cu pricisione ‘e piede e de mano direttamente dint’â trecquarta avverzaria. A ll’arranqua (Nella ripresa) salvaje ‘o risultato cu ‘nu bbellu ‘ntervento.
MESTO 6 Meglio ajere ca cu ‘o Sassuolo,s’abbuscaje doppo quatto minute n’esaggerato cartellino jalizzo ca ‘o frenaje pe ttutt’ ‘o riesto d’’o fullé. Ma ‘ngenerale facette n’atalossa suddisfacente pure si sbagliaje quacche bbassurero (suggerimento).
BRITOS 6,5 ‘Nu peccato veniale ‘nfase ‘e bbassurero (suggerimento) ô pprincipio ‘e fullé e n’ato a ll’arranqua…, ma ‘nfase ‘e trancara(marcatura) e ‘ncopp’ê ppalle aute nun ne sbagliaje una pure si quase ô pprincipio s’abbuscaje ‘na capata ca ‘o scummaje ‘e sanco e ‘o custringnette a gghiucà tutt’ ‘o fullé cu dduje tampune dint’ô naso…
ALBIOL 6,5 Ô ssolito dètte granna sicurezza a ttutto ‘o reparto difenzivo e cquanno se trattaje ‘e subbastà (rilanciare) e nsi’ a cche rummanette ‘ncampo stèttemo dint’ê tranquille. Ma resistette sulo p’’o primmo ajone, po êtt’ ‘a ascí pe n’affaticamento musculare.(dô 48° CANNAVARO 4 Nun è arta soja e ccomme ‘o vedette ‘e trasí i’ accumminciaje a preoccuparme. Cumminfatte fove sulamente pe ‘na signalazziona d’ urzo ‘e cóse (fuorigioco) ca forze nun ce steva, ca ‘o salvaje da ‘na falta (fallo) prubbabilmente ‘e ricore ‘ncuollo a Gilardino)! Mo sperammo ca pe marterí Albiòllo se repiglia pecché cu cchisto nun è pproprio cosa!
ZUNIGA 6 Capitàno pe ‘na jurnata, se dimustraje attiento ‘nfase difenziva e cquanno accumpagnaje ll’aziona ‘o ffacette cu cqualità. A ll’arranqua (Nella ripresa), quanno ‘o gGenoa se mettette cu cquatto attaccante, rummanette cchiú vascio pe cuntènere ‘e crifune.
INLER 7 Nun sbagliaje praticamente niente. Tuccaje ‘na cifra ‘e pallune e, cu ccarma,dicisione e ppricisione ‘e smistaje ‘ncopp’a ll’esterne appiccianno ‘a miccia d’’e repartite (ripartenze).
BEHRAMI 7 Granne cuntribbuto ‘nfase ‘e trancatura (interdizione), chello ca nc’ era mancato cu ‘o Sassuolo. Durante ô primmo ajone ‘o Napule cuntrullaje ‘a situazziona e isso dètte ‘na mana, ma addó se vedette ‘e cchiú fove a ll’arranqua quanno ‘o gGenoa ‘mpurraje (spinse) a ccapa sotta e isso se piazzaje a ddà prutezziona â difesa.
Insigne 7 Bella atalossa (prestazione) d’’o guaglione frattese ca pruvaje sistematicamente a urtizzà (verticalizzare) pure si nun sempe(po’ succerere!) fove priciso. ‘Ncumpenso ‘ncopp’ a ttutte ‘e ddoje rredde ‘e Pandèv(vo) nce mettette ‘a trucchía soja ( il suo zampino) e ll’âmm’’a ringrazzià!
PANDEV 8 Miso addó lle piace ‘e stà: a ccentro e nno laterale, siconna ponta ê spalle ‘e zZapata, se capette súbbeto dô pprincipio ca ‘o macetone ce steva, ‘o tteneva e ‘o vvuleva fà e cumminfatte facette lustrarce ll’uocchie ‘ncopp’ a ògne palla ca tuccaje; p’’a verità sprecaje ‘na commeta palla, ma po ssúbbeto se riscattaje sbluccanno ‘o risultato e addirittura firmanno ‘o dubblato (il raddoppio) e ttutte ‘e ddoje vote piazzaje dduje granne pallune angulate. (da ll’ 81° DZEMAILI sv)
CALLEJON 7 Che bbellu jucatore ch’è cchisto! Lle mancaje sulo ‘a rredda pe mettere ‘a cerasella ‘ncopp’ô gattò mariaggio ‘e ‘nu granne fullé! Funnamentale pe ttutte ‘e ffase d’’o juoco, currette comme a ‘nu pazzo ggià dô primmo munuto e nun se fermaje maje mustrannose luzente (lucido) ‘ncopp’a ògne bbassurero (suggerimento) e ssi a ll’arranqua, quanno se prupunette ‘ncontropide, ll’êsseno servuto, se fósse levato pure ‘o sfizzio ‘e signà!
ZAPATA 6,5 ‘E ncuraggiamento e pe cchillu muvimento ‘ntelliggente ca facette ô mumento d’’a siconna rredda quanno se purtaje appriesso ‘o difenzore libberanno spazzio a pPandemonio! Debbuttaje cu ‘a maglia luvarda (azzurra) e ppure si quacche vvota nun se facette vedé dint’ô juoco, cunzideranno quant’è gruosso e turzuto, dimustraje ‘e saperce fà cu ‘a palla e de puté cupulià (duettare) cu pPandev, pe nun ddicere d’’a putenza dimustrata dint’ô juoco auto.
(dô 60° HIGUAIN 6 Nun avette ‘mpurtanti pallune ‘a jucà, ma cu ttutto chesto pe ddoje vote jette vicino a ssignà ‘a terza rredda cuana, ma nun fove furtunato! Vulenno signà, se ‘mmentaje spisso quacche bbuonu muvimento, ma ‘e cumpagne nun ‘o servetteno e isso se ‘ncazzaje.)
Benitez 7,5 ‘Sta vota ‘ncarraje tutto ‘o rutizzio (turnover) riprupunenno ‘ndifesa Albiòllo e bBritòsso, mettenno ‘mmiezo ô campo a bBehrami e annante tenenno fora a mMarekiaro (cu Pandemonio, siconna ponta) e a ‘o Pipita (facenno debbuttà a zZapata…),e ‘mbarba a cchi arricciaje ‘o naso dimustraje d’avé avuto raggione, vincenno (e cchi vence ave raggione!) e cunvincenno visto ca ‘a scuatra nun perdette ‘a fisiunumia soja ‘nfase uffenziva. Doppo ‘nu granne primmo ajone, ‘o Napule ‘e don Rafele sufferette quacche cusarella sulo a ll’arranqua quanno ‘o gGenoa ‘nsotto ‘e doje rredde, rutto pe rrutto, se menaje a ccapa ‘nsotto addirittura cu quatto attaccante, ma nun ne cacciaje niente!
L’arbitro DAMATO 4,5
Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte spisso precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo a ll’avverzarie e nun vedenno ‘o juoco viulento e pruvucatorio d’ ‘e delinquente crifune e anze caputianno ‘e ffalte (invertendo i falli) abbuffaje ‘e cuane ‘e cartelline jalizze….pe nun dicere po d’’a fessaria fatta ‘ndanno d’’e cuane quanno fermaje ‘nu contropiede libbero e ffranco ‘e Lorenzigno pe siscarce, a sfuttò, ‘na punizzione a ffavore! No, chisto è scemo! dicètteno ‘ntribbuna divano… e i’ cunfermaje. ‘O fatt’è ca si ‘mmece ‘e Damato ce fósse stato n’ato, era ‘a stessa cosa : ‘o Napule sta ‘ncopp’ê scatole d’ ‘o Palazzo e ll’arbitre taliane so’ tutte ‘na fetenzia e addó vaje vaje, scarte fruscio e ppiglie primera.
Cu ‘na bbona salute! Ce sentimmo, si dDi’ vo’, â prossima vota, ciovè doppo d’ ‘o fullé ‘e Ciampionsa. Staveti bbe’!
R.Bracale Brak
