ilNapolista

Cierti fullé s’ ànn’ ‘a vencere! A mmuorze a ppizzeche..

E che saciccio! E chi s’aspettava? Tengo ‘o bbeleno nfi’ a ‘mpont’ô musso e aggiu fatto ‘na nuttata chiara, chiara! E chi s’aspettava ca ‘ncasa nosta nun fóssemo riuscite a vvattere ‘o Sassuolo, ca tre gghiuorne primma êva pigliato sette palle sette da ll’Intèrra ‘e wallerettino mazzarri… ‘Mmece chesto ajeressera ô san Paolo chesto succedette! Chesto! ‘Nu scunzulato pareggio! E ‘o Napule ‘mmece ‘e fà ‘o rullo cumpressore, facette ‘o cane d’’o cacciatore ca quanno êsse avuto fà aizà ‘a quaglia, s’accuvaje a ffà ‘e fatte suĵe , nce cammenaje cu ‘e piere dinto perdenno ‘o cuntatto cu ‘a Roma ‘ncimma ‘e crassifica e facennose arrivà dâ juventússa.Mannaggia a cchello ca nun se po’ ddicere! Cierti fullé s’ ànn’ ‘a vencere! A mmuorze a ppizzeche…, a sputazzate ‘nfaccia, ma s’ ànn’ ‘a vencere! E ‘o Napule nun ne fove capace! Che peccato! Comme se vede ca n’ànn’ ‘a magnà ancòra furne ‘e pane primma ‘e addeventà ‘na scuatra ca uno nce po’ cuntà, nce po’ scummettere senza rummané deluse e cu ttanto ‘e naso! E pe gghionta ‘e ruotolo sàpato se va a gGenova e nce aspetta ‘nu brutto accunto (cliente)! Passammo ê ppaggelle, va’
REINA 6 Pigliato pe cculo ‘a Cannavaro, ca se perdette ll’attaccante d’’o Sassuolo,nun s’aspettaje ‘a cunchiusione viulenta ‘e Zaza,pure conzideranno ‘a pusizziona laterale ‘e ll’attaccante. Ô finale salvaje ‘e suoje ‘ncopp’a ‘na cabbacera (colpo di testa) ‘e Kurtic.
MESTO 4,5 Custretto a rummané assaje vascio soprattutto quanno Dzemaili se ne scennette ‘e pressione e nun riuscette cchiú a cummigliarlo,nun se vedette ‘ncopp’â curzia ‘e dritta e cquanno ce pruvaje a ffarlo facette ‘nu buco dint’ a ll’acqua!
CANNAVARO 3,5 ‘A matapunía dagnina (inutilità dannosa) vestuta ‘a jucatore ‘e pallone! Ô ssolito facette chello ca nun à dda fà nisciuno difenzore: ‘mmece d’anticiparlo currette arreto a zZaza senza – è nnaturale, pe uno ca nun sape jucà ô pallone…! – essere cacchio ‘e cuntrastarne ‘a cunchiusione ca rijalaje ‘o pareggio ô Sassuolo. Nfi’ a ll’urdemo po nun fove capace ‘e trancararlo (arginarlo) e facette ‘nu tummolo ‘e inutili falte (falli) da dereto.
Fernandez 5 Chisto s’ à dda fà benedicere ‘a ‘nu monaco ricchione!‘E ccose cchiú sballate ‘e facette cu ‘o pallone ‘mmiez’ê piere nun riuscenno maje a sustàtere ll’azziona partenno dê zzache (dalle retrovie). Pe ddoje vote dint’â camma d’’o Sassuolo se truvaje a mmanese dduje pallune ‘a menà dinto e pe ddoje vote fallette sbracanno ‘a cunchiusione e dànno a pPegolo ‘accasione ‘e fà bbella fijura!
Armero 4,5 A ll’arranqua (nella ripresa) ‘o Napule appressuraje (spinse) quase sempe dê pparte soje, ma isso fove sempe ‘mpriciso sballanno ògne bassurero (suggerimento).’Ncapace ‘e difennere, ‘ndifesa dètte troppu spazzio a cchi se truvaje ‘e passaggio.
INLER 5,5 Nsi’ a ll’urdemo tentaje ‘e nun perdere ‘a carma dànno quacche bbuonu pallone ‘ncopp’a ll’esterne p’arapí ‘a difesa d’’o Sassuolo. Quacche ata vota sbagliaje quacche pppasiglio (passaggio) e cumplessivamente nun venette ajutato dê cumpagne. Faticaje sí, ma senza maje essere genïale.
DZEMAILI 6 Ma sulo p’ ‘a cagliosa ca nce dètte ‘o vantaggio… pecché, p’’o riesto currette sí pe trancarare (arginare) ‘e rrepartite (ripartenze) e ll’emigliane, ma se spumpaje fallenno cchiú ‘e ‘nu bassurero (suggerimento) e ô finale nun fove cchiú lucente (lucido)
PANDEV 5 Jurnata no d’’o macètone. Atalossa (prestazione) assaje poco cunvincente; pruvaje a difennere palla pe ffà saglí ‘e suoje, ma ‘a tràsera (retroguardia) emigliana ‘o fermaje senza troppi prubbleme. (dô 61° CALLEJON 5,5 Se piazzaje assaje largo cercanno ‘e sfruttà ‘o spazzio, ma cumplessivamente nun lassaje signo)
HAMSIK 4,5 Me dispiace d’’o ddicere, ma chella d’ajeressera fove ‘a cchiú bbrutta atalossa ‘e Marekiaro ca fove agnuristo (irriconoscibile) e quase maje lle riuscette ‘e truvà ‘nu cagno ‘e juoco ‘e qualità o ‘nu pasiglio (passaggio) ‘nteressante. ‘Nu paro ‘e vote lle riuscette ‘e trasí bbuono dint’â camma, ma venette stuppato a ll’urdemo, all’urdemo.Troppo stracquo e spumpato nun fove capace ‘e tirà ‘o cuniglio dô ferbone (cilindro) e rummanettemo inutilmente a aspettà ‘e cinche minute suoje… Che peccato! Ajeressera addimannaje: Ma addó sta Marekiaro? Addó sta?… E ‘ntribbuna divano nisciuno me sapette risponnere!
MERTENS 5,5 T Perdette troppi ppalle e quaccuna overamente ‘a fesso, ma cumplessivamente fove uno d’’e poche ca ce pruvaje, pure si partenno ‘a ll’esterno. Troppo liggiero, però e ssenza sustanza quanno trasette ‘ncuntatto cu ll’avverzario!
(dô 74° INSIGNE 5,5 Me fósse aspettato ‘e cchiú ‘a Lorenzigno…, ma steva scritto ca nun êv’’a essere accussí: ‘o guaglione trasette súbbeto ‘nfullé, dànno vivacezza â manovra, ma quanno zumpava dduje avverzarie, partenno largo, truvava súbbeto ‘nu terzo ca puntualmente ‘o rumpette ‘o pasticciotto!)
HIGUAIN 5,5 Senza cullabburazziona ‘e misciuno, nchiuso dint’â morza d’’e duje centrale d’’o Sassuolo, nun avette ‘nu bassurero (suggerimento) serio e ‘mmitante ‘a puté sfruttà e s’êtt’’a sacrificà p’’a scuatra nsi’ ô scuppó (alla fine).
Benitez 5 Don Rafele è ‘a curona d’’a capa mia, ma ajere – me dispiace d’’o ddicere – nun liggette bbuono ‘a facenna; ‘ngannato dô fullé d’’o Sassuolo cu ll’Interra, se penzaje ‘e fà ‘na passiata lassànnose piglià ‘a mana dô rutizzio (turnover) e, ppe ccomme ‘a veco i’, pesaje assaje fà jucà a cCannavaro ‘nchietta cu Fernandèz(zo): allimmeno uno ‘nfra Britòs(so) e Albiòl(lo) fósse stato nicessario, visto ca chisti dduje so’ cchiú purtate a ssustàtere (impostare) ll’azziona ‘a dereto.Nun le riuscette manco ‘e ‘nventarse quaccosa mmiscanno ‘e ccarte ‘ncorzo d’opera e se dimustraje ‘ndiciso ‘ncopp’ê nicessarie cagne forze aspettannose ‘nu miraculo ‘e quaccuno ca redubblasse ( raddoppiasse) primma ‘e menà dinto a zZapata e soprattutto a rRadosevic(cio) (nicessario comme cane ‘e presa, visto ca nun ce steva Behrami, e se sentette!); ‘mmece ‘e facette scarfà e ppo nun ‘e facette trasí.Comme se vede ca ‘a perfezziona nun è de chistu munno e ttutte putimmo sbaglià; ajere fove ‘o turno ‘e don Rafele ca facette jucà a cCannavaro ‘mmece ‘e mannarlo a scupà ‘nterra dint’ê llatrine,tenette ‘ncampo a ‘nu Marekiaro agnuristo (irriconoscibile), nun facette trasí nè a zZapata nè a rRadosevic(cio) e ‘nconchiusione ‘a scuatra fallette ‘a prova, perdette ‘o primmo posto e se vedette arrivà dâ juventús(sa) ca – manco a ddirlo – a cChievo fove accumpagnata ‘a ll’arbitro a vvencere ‘nu fullé perduto! Sperammo sulo ca ‘sti duje punte perze ajere nce servesseno ‘e lezziona e nun pesasseno ‘ncopp’ô cunto finale d’’o campionato!
l’arbitro DOVERI 5 ‘E stima, trattannose ‘e carta canusciuta abbituato ‘ncampiunato o ‘ncoppa itaglia a trattà ‘na chiaveca ‘e scuatre meridiunale.
E m’aspettavo pure ‘e pejo ‘a ‘stu guaglione, ‘mpiacato (nun se sape ‘e che) vulterrano ‘e trentaseje anne!
E cu chesto ve saluto e ce sentimmo, si dDi’ vo’ dummeneca ca véne doppo d’’o fullé ‘e sàpato contr’ ô Genoa. E abbiammo a ffà corne!
R.Bracale Brak

ilnapolista © riproduzione riservata