Eccuce cca, guagliú! Comme è ppiaciuto ô Cielo ce simmo ‘ntise n’ata vota e putimmo cummentà ancòra ‘o fullé d’’o Napule nuosto. Ne so’ cuntento assaje soprattutto pecché, scanzato ‘o fuosso ‘e vedé cu ‘a maglia luvarda (azzurra) chillu spetaccuso (lebbroso) ‘e matri, chillu nquacchiatto ‘e spetacca (lebbra) juventina ca avesse ‘nfettato ‘a maglia nosta…, scanzato [sperammo pe ssempe] ‘stu fuosso nun m’attocca ‘e mantené ‘a minaccia ch’êvo fatto [si fósse venuto matri] ‘e abbandunà ‘o Ciuccio pe passà a ttifà Catania! Rummango a ttifà p’’o Napule cu ttutto ‘o core! Venimmo a nnuje. Cu granna suddisfazziona pozzo dicere súbbeto: bbona ‘a primma! Troppo bbello; ‘e primme tre ppunte so’ state ‘ncassettate e nno pe scagno o pe ffurtuna, ma cu ‘na bbella atalossa (prestazione) cumplessiva e cu ‘nu risultato ch’êsse pututo essere cchiú ttunno e retissante (clamoroso) si sulo ‘a terna arbitrale c’êsse cecato bbuono e nun avesse annullata ‘na rredda reculare d’ ‘o Pipita.
E nun me se venesse a ddicere ca ‘o bBologna è poca cosa a ffronte a cchille ‘e ll’anne passate. Addó? ‘A verità overa è ca è ‘o Napule ch’è cagnato e mmigliurato e mmo è assaje cchiú cunvinto d’ ‘e ppussibbilità soje! Pe cchello ca vedette ajeressera ‘o putimmo dicere:” È tutta n’ata musica guagliú!”
Jucammo a ppallone, no a ppalla fa’ tu! Pussesso ‘e palla , priciso e cuntinuato sfruttamento ‘e ll’asse verticale d’’o campo, e d’’e ddoje curzie, tire ‘a luntano e soprattutto ‘nu juoco ‘ntelliggente a arrubbà palla senza maje fà falte, aspettanno ‘e ffessarie ‘e ll’avverzario pe casticarlo a dduvere; ‘na rónna (rosa) ‘e jucature cratiste (ottimi) cu cchiú ‘e ‘nu sciantiglione (fuoriclasse) pe nun dicere ‘e
ll’ intelliggenza e d’‘a macaleia (grandezza) ‘e don Rafele Benitèz(zo) ch’ è pure cchella ‘e ggestí e cuvernà a mmestiere ‘a rónna: ajeressera, tanto pe ffà n’assempio, ce dètte ‘o piacere ‘e ‘ncignà (esordire) a Radosevíc(cio) e primma o doppo so’ ccerto ca ce fà lustrà ll’uocchie pure cu rRomano… e si ‘o sentite jantecello a ddicere a Erode wallerettino mazzarri!
Ma mo calma e ggesso e comme à ditto don Rafele, piere ‘e chiummo!!Stammo sulo ô pprincipio e ‘o cammino è lluongo pure si âmmu accumminciato cu ‘o piere justo…
Aspettammo ca se chiude ‘o mercato d’accattà e vvennere e po’ essere ca quacche ato jucatore ‘e bbona tecnica arriva; pe mme cchiú ca ‘nu centrocampista pigliasse a ‘nu bbuono esterno ‘e dritta, pecché sulo cu maggio o mesto chella curzia ‘a veco sguarnita! Fraditanto penzammo ggià ô prossimo fullé contro n’avverzaro scamuso comme ‘o Chievo e sperammo d’ammutulirlo, sutterranolo ‘e pallune!
Passammo ê ppaggelle:
REINA 6 ‘E stima. Nun fove maje ‘mpignato seriamente e avette ‘a fà ‘na sola parata a ll’arranqua, ma pe ttutto ‘o fullé cuvernaje a mmestiere tutt’ ‘a camma ‘e ricore senza farme fà ‘e vierme comme a ttiempo d’ ‘o pirata.
MAGGIO 5,5 Ll’unico ô ddisotto ‘e ll’aspettative; lle fósseno state nicessarie quacche endovenosa ‘e café; ‘ndifesa nun êtt’’a fà ‘e straurdinarie, ma nun n’apprufittaje pe scennere cchiú spisso ‘ncopp’â curzia; chella grama vota ca ‘o facette, nascette ‘o tre a zzero ‘e Marekiaro. Quanno se dice ‘o mazzo!
ALBIOL 7 ‘A nuvità overa! Fove ‘o riggista arretrato d’’e cuane e cu granna perzunalità se scanciaje spisso per fà arremarrà (ripartire) ll’azione.Atalossa cratista e senza nisciunu sfregazzo (alcuna sbavatura).
BRITOS 6,5 ‘E capa nun cuncedette niente a n’accunto (cliente) difficile comme a bBianchi.A ll’arranqua facette uno o duje sfregazze, ma s’’a cavaje sempe cuncedenno quacche ttiro ‘e squina (angolo).
ZUNIGA 6- Êsse pututo fà ‘e cchiú, ma nun ‘o vulette fà e nun me spieco pecché.’Stu jucatore pe mme oramaje è ‘nu mistero!
INLER 6,5 N’atu jucatore a ppietto â tempurata (stagione) passata: facette ggirà cchiú velocemente ‘a palla e pur’ isso se muvette ‘e cchiú.
BEHRAMI 7,5 Atalossa iuperocia (Prestazione fantastica). Don Rafele êva urdinato ‘na pressione ‘a levà ‘o sciato e ‘o mmitaje a ccarne e mmaccarune: se nne jette ‘e capa e ricuperaje meliune ‘e pallune facenno arrecrià ‘o san Paolo.
CALLEJÓN 7,5 Veramente pulitelico (prezioso) per Benitèz(zo). Apprimma cugliette ‘o cu ‘na ggirata spettaculare, po se facette truvà pronto ô posto justo, ô mumento justo – comme a ‘nu vero attaccante – sbluccanno ‘o risultato, ‘ncopp’â respinta ‘e Curci. Currette comme a ‘na furia ‘a cca e ‘a lla senza fermarse maje,jenno a ddà ‘na mano pure a mMaggio a ccurto ‘e bbirra e ccafé.
HAMSIK 8 Miezu punto mancante pecché ce mettette vintitré minute primma ‘e decidere ‘e metterse a gghiucà, ma po fove ‘a guerra! Jucaje a ttutto campo, risultanno funnamentale p’ ‘e ddoje fase d’’o juoco. ‘A pusizziona ca ll’à truvato don Rafele ‘o fa essere ll’anema d’’a scuatra: mannaje ‘mporta ‘e cumpagne cu ‘na granna semplicità, permettette ‘a rredda ‘e Cagliecòn(no) custrignenno ‘o purtiere a ‘na respinta corta, diplastaje (raddoppiò) superanno difenzore e ppurtiere e nchiudette ‘e cunte cui ‘na mazzata ‘a fora. (dô 72° MERTENS 6 Trasette a gghiuoche fatte e quanno calaje ‘o ritmo, ma facette vedé ‘e saperce fà cu quacche azziona perzunale pure ô lemmeto d’’a camma piccerella.)
PANDEV 6,5 Ggià pronto e ‘nforma Benitèz(zo) ‘o mettette ‘ncampo dô primmo minuto e isso nun perdette ‘nu pallone didumanno (duettando) a mmestiere cu ‘e cumpagne ‘e reparto. (dô 66° INSIGNE 6 Trasette quanno ‘o fullé tenette poco ‘a dicere e se cuntentaje ‘e fà circulà palla cu ttanta qualità.)
HIGUAIN 6,5 Nun avette tanti pallune ‘a jucà, ma appena avette ‘accasione cu ‘nu semplice cuntrollo a seguí facette fora meza difesa e se chiammaje ll’applavuso; dinto a n’ata circustanza signaje pure, ma ll’arbitro ce annullaje ‘a rredda pe nn’úrzo ‘e cóse (fuorigioco) ca vedetteno isso e ‘e cumpare suĵe. (da ll’84° RADOSEVIC 6 ‘E stima.)
BENITEZ 8 primma ‘e campiunato ‘o Napule vene prumosso cu bbelli vote. ‘A scuadra mustraje già d’avé capito e fatto soje ll’idee ‘e don Rafele jucanno quase a mmemoria.’O Napule putesse addeventà ‘o Barcellona d’Itaglia: pussesso ‘e palla allarcato (prolungato) e ppronta ricunquista d’’o pallone cu pressiona (pressing) auta songo ‘e caratteristiche nove ‘e chistu Napule targato España. Cu don Rafele à cumpletamente cagnato faccia ‘a difesa e ll’à fatto ‘mpusitivo cu Albiòl(lo) cunvincente riggista arretrato.P’’o riesto, ajere ‘o Bologna avette ll’aggio ‘e tentà quaccosa sulo quanno ‘o fullé era abbundandemente diciso ‘ncopp’ ‘o tre a zzero.
‘A CUNGRECA ARBITRALE 5 Scadente ‘mparanza!
E cu cchesto ve saluto.CIUCCIO FA’ TU! E si dDi’ vo’ ce sentimmo ‘a vota ca vène. Staveti bbe’!
R. Bracale Brak
