‘Na fetenzia ‘e rredda contro ô Cesena s’êsse avut’ ‘a signà

M’’o ssentevo ‘e scennere pe dderet’ê rine ca ajeressera me fósse ‘ntussecato contro ‘na scuatra janca e nnera.. E accussí fove, accussí succedette e ‘ncapo ‘e nuvanta minute ‘o Napule d’ ‘e tterze e cquarte linie nun fóve crestiano nun dico ‘e vencere, ma manco ‘e menà dinto ‘nu gramo pallone pe pattà chillo ca pe sfarma ‘e Gamberini ‘o Cesena aveva miso ê spalle ‘e Papiluccio Barbosa. E che saciccio! È overo ca ‘o Napule jette a gghiucà n’inutile fullé amichevole cu ‘o Cesena proprio ‘ncuntempuranea cu tanti ate amichevoli ‘nternazziunale sguarnenno ‘a scuatra ‘e sidece jucature ‘mpurtante mannate ‘ngiro p’’o munno, ma ‘na fetenzia ‘e rredda contro ô Cesena s’êsse avut’ ‘a signà pe nun fà ‘na fijura ‘e seje sorde. E ‘mmece proprio chesta se facette, pure pecché ‘o purtiere lloro se mettette a ffà ‘o fenomeno e paraje tutto e cquaccosa ‘e cchiú cumpreso ‘nu ricore sacrusanto sbagliato ‘a Cagliecòn(no). ‘Ncumpenso ajere nutizzie bbone m’arrivajeno dâ Sguizzera addó ‘a scuatra ‘e casa cu Inlèr(o), Beherami e Dezmail vattette ‘o Brasile… e da Roma addó Higuaín(no) facette vedé ‘e surice russe a Buffòn(no) e cumpagne mentre Lorenzigno salvaje ll’annore ‘e ll’itaglia cu ‘na rredda capolavoro. ‘Nzomma ‘e cantante napulitane dint’ê nnazziunale lloro cantajeno bbuono e se facetteno valé, mentre chille ca jucajeno a cCesena steccajeno malamente. Pe ffurtuna ca se trattaje sulo ‘e n’allenamento fatto cu ‘e tterze e cquarte linie e nun tenette granne significato. So’ ccerto ca cu ‘e titulare ‘a cca e n’ata dicina ‘e juorne sentimmo tutta n’ata musica e cqualuncua ata maglia janca e nnera o ‘e culore ce fa ‘nu bbaffo a tturtiglione. Passammo ê ppaggelle:
RAFAEL 6 – Nun fove sfarma soja ‘a rredda ‘e Nadarevic(cio).P’ ‘o riesto Uvini spisso ‘o chiammaje ‘ncausa tenennolo sotto pressione, ma ‘o guaglione nun perdette maje ‘a calma. (dô 73° COLOMBO sv)
MESTO 4,5 Accumminciaje cu bbona vuluntà, ma po se perdette p’’a via,lassànnose spisso piglià cu ‘o sórece ‘mmocca (sorprendere) ‘a Renzetti e ô finale ‘a D’Alessandro ca sistematicamente ‘o superaje.
UVINI 5 Po’ migliurà,pecché ce sape fà pure si ajere faticaje pe sustàtere (impostare) ll’aziona e s’arrangiaje chiammanno troppo spisso ‘ncausa a pPapiluccio Barbosa e facette troppi falte ‘nmarcatura.
GAMBERINI 4 Diverze sfregazze (sbavature),pure si fove ll’unico d’’a difesa ca cercaje ‘e sustàtere ll’azziona ‘a reto.Ô mumento d’ ‘a rredda se truvaje fora pusizziona, calculaje malamente ‘o cruzzo e se facette surpassà dô pallone, mettenne ‘ncundizziona a nNadarevic(cio) ‘e fóttere a pPapiluccio Barbosa.
DOSSENA 4,5 Nun ne ‘ncarraje quase nisciuna, né ‘nfase ‘e puzamiento (spinta), né ‘nfase ‘e difesa; ‘nfase ‘e bassurero (suggerimento) fove sempe ‘mpriciso.Pare ca s’ ‘o vonno levà; menu male!
DONADEL 5,5 ‘Nu miezu miraculo. Durante ô primmo ajone fove uno d’’e poche a salvarse cercanno ‘e mettere ordine e briganno (duellando) cu cchi capitaje. A ll’arrancua però ascette a nnaturale pe cchello ca è, ciovè ‘na meza-cazetta e sparette dô fullé.
ROMANO 6,5 Che bbella surpresa ‘stu criaturo (’96) d’ ‘a primmavera luvarda! Fove cu bBariti ‘a nota pusitiva ‘e ‘na brutta serata. ‘Stu criaturo dimustraje granne perzunalità e bbelli qualità tecniche. Ce pruvaje ‘a fora e se mettette ‘nmostra pure quanno partette a ccapa sotta ‘nricato (in dribbling)e don Rafele ne fove cuntento assaje. (da ll’83° GAETANO sv)
BARITI 6,5 – Cunfermaje ‘e tené tanti cqualità ca ggià se sapevano soprattutto ‘nfase uffenziva. A ll’arrancua riuscette spisso a superà ‘ntromma ll’avverzario diretto, ma po nun fove priciso cu ll’urdemu pasiglio (passaggio). (da ll’83° ANASTASIO sv)
NOVOTHNY 6 – Diciannove anne; d’accordo forze nun è ancòra pronto p’’a serie A, ma certamente ‘o guaglione ce sape fa e ppe mme ‘o Napule facesse bbuono a ddarlo pe n’anno‘mpriestito ‘nserie B addó putesse essere prutagunista. Ajere sulo ‘nu granne purtiere furtunato lle levaje ‘a suddisfazziona ‘e signà e s’ ‘a fósse ‘mmeretata pecché fove sempe cumbattivo e se facette truvà sempe ô posto justo. (dô 73° D’AURIA 6 Trasette súbbeto ‘nfullé cu bbona perzunalità cercanno ‘a repartita (ripartenza) e ‘a batosa (profondità))
CALLEJÓN 5,5 Currette assaje,pigliannòse ‘o spavo ‘ncerato ‘e cummiglià pure ‘a camma ‘e Mesto quanno chisto scennette ‘nnante;’nzomma ll’ azzione cchiú periculóse fóveno ‘e ssoje; se prucuraje pure, cu ‘na magaria, ‘o ricore d’ ‘o pussibbile pareggio, ma po s’ ‘o facette parà ‘a Campagnolo e cchesto nun ce ‘o ppozzo perdunà!Pe cchesto lle spetta miezu voto mancante.
CALAIÒ 6 Luttaje cu ccegna ‘ncopp’a ògne pallone e cchiú ‘e ‘na vota ‘mpignaje ‘o purtiere Campagnolo. Riuscette pure a ssignà, ma steva ‘nnúrzo ‘e cóse e ggiustamente ll’arbitro ce annullaje ‘a rredda.
BENITEZ 6 ma ‘e stima pecché ‘a scuatra fove troppo sperimentale pe farlo respunzabbile ‘e quaccosa. Forze s’êsse avuo ‘a premuní ndifesa cu quaccuno cchiú auto pe ‘nu piglià, comme ‘mmece succedette, ‘na rredda cu ppalla auta. Pusitiva ll’idea ‘e fà jucà quacche prumettente guaglione comme Romano, Bariti e Novothny!
ll’arbitro NUN-ME-RICORDO-‘O-NOMME 6
Niente ‘a dicere; facette tutt’ ‘o duvere suĵo.
E fermammoce cca, speranno ca ‘sta scoppola serve a quaccosa. Si dDi’ vo’ ce sentimmo ‘a prossima vota!
R.Bracale Brak

ilnapolista © riproduzione riservata