Granna vennetta napulitana ô Dall’Ara

Ajeressera guagliú granna vennetta napulitana ô Dall’Ara ‘e bBulogna addó ‘e cuane se jetteno a llevà ‘e pacchere ‘a faccia avute dê murtadelle preturiane ca ggià ll’anno passato proprio ô Dall’Ara, ll’êvano paccheriate pe ddoje a zzero custrignenno ê nuoste a ddicere addio ô suonno ‘e ‘nu terzo posto ca ll’êsse aperte ‘e pporte ‘e jucà ‘nCiampionsa. Pe nun ddicere d’ ‘e panesiglie ca ce abbrusciajeno ‘a faccia pure ‘sta tempurata quanno ‘e guagliune ‘e Pioli erano venute a ffà ‘a sbrasata pe ddoje vote ô san Paolo, primma venenno a vencere ‘ncampiunato pe 2-1, cu Kone granne pantanguanguero (mattatore) e ppo eliminanno ‘e cuane dâ Coppa Itaglia cu ‘o punteggio ‘e 3-2. Era naturale pirciò ca ‘e cuane tenesseno ‘o dente avvelenato e ajeressera se vuletteno vennicà vincenno pe bblindà ‘o siconno posto ca ce assicura ‘e jucà ‘nCiampionsa direttamente. E vuletteno vencere pure si avetteno a cche ffà cu ‘nu Bologna arraggiato e ‘ntussecato comme maje, manco avesse avanzato coccosa d’ ‘o vviecchio e nun fósse stato ‘mmece ‘ndiebbeto cu nnuje! ‘E cuane vuletteno vencere pure si pe ttutto ‘o primmo ajone nun cunchiudetteno quase niente e ppe risolvere ‘a pratica êtten’ ‘a aspettà ll’arranqua quanno Marekiaro pigliaje ‘a decisione storica ‘e accumincià a gghiucà piglianno pe mmano ‘a scuatra. E a ll’urdemo se vincette addirittura sbrasanno pe ttre a zzero e s’êsse pututo pure vencere pe cquatto a zzero si ll’arbitro [sbaglianno!]nun êsse annullata ‘na rredda reculare a mMaggio. Ma quanno se vence è cosa ‘e niente! Purtammo pacienza e ppassammo ê ppaggelle.
DE SANCTIS 6 Attiento ‘ncopp’ ê tante punizzione ‘ntussecose (velenose) ‘e Diamanti ca pruvaje ‘o tiro da cualuncua pusizziona.Se ‘ncazzaje cu ‘e suoje quanno cuncedettono troppo.Tutto summato atalossa sicura; ‘o pirata nun êtt’ ‘a ascí e nun succedetteno ‘nquacchie.
ROLANDO 6,5 Jucatore ‘e granna perzunalità, ‘a dimustraje tutta ‘nfase ‘e plantamiento (in fase d’impostazione). A ssurpresa quacche vvota se prupunette ‘ncopp’â curzia ‘e dritta despuzzanno (dominando) cu ‘o juoco acrubbatico.
CANNAVARO 6 ‘O miraculo, ‘o miraculo! Attiento a mmettere ‘a musarola a gGilardino, ‘ncarraje pure ‘na granna puggia(rilancio) si nun me sbaglio pe cCavani. P’ ‘o riesto atalossa sicura e senza sfregazze.
BRITOS 6 Custretto a ddà ‘na mana a cCannavaro se sacrificaje, ma tutto summato nun facette nisciuna fessaria.
MAGGIO 5 Meglio ‘ndifesa ca ‘ncopp’â curzia addó currette assaje senza però maje riuscí a sfunnà; mettette pure quacche pallone ‘mmiezo ma calibbrato malamente.Me dispiace d’ ‘o ddicere, ma oramaje ‘e ‘nu jucatore cuncuotto
BEHRAMI sv Stette ‘int’ô ssuĵo luttanno a centrocampo, ma po, cadenno malamente se sturzellaje ‘o tubbiglio (caviglia) scamazzato (pe gghionta ‘e ruotolo) ‘a chella carogna ‘e Gilardino, ca tentaje ‘e ce ‘o spezzà,êtt’ ‘a aizà bannera janca e ascirsene (dô 66° INLER 5,5 – Faticaje a ttrasí ‘int’ ô fullé perdenno quacche pallone ‘e troppo ‘nfase ‘e cuntrasto e p’ ‘o riesto se cuntentaje ‘e fà ggirà palla senza maje ‘nventarse coccosa!)
DZEMAILI 7 Currette pe dduje, nun tirannose maje addereto ‘nfase ‘e plantamiento (impostazione) e accumpagnanno sempe ll’azzione, comme succedette cu ‘a terza rredda quanno scurtaje a cCavani facennose truvà pronto a cunchiurere ll’azziona.
ZUNIGA 6,5 Durante ô primmo ajone fuje ‘o cchiú tellecariello d’ ‘e suĵe e si Marekiaro ll’êsse accumpagnato fósse stata tutta n’ata musica! Quanno partette lassaje spisso ‘ncopp’ô posto ll’avverzario,accentrannose e taglianno pe mmità ‘a tràsera rossaebblú. I’ ll’êsse fatto jucà ‘ncopp’â dritta ô posto ‘e Maggio e a mmancina êsse miso a Armero…
HAMSIK 7 Ma sulo pe ll’arranqua! Pe tutto ‘o primmo ajone cumminfatte se chiammaje fora sbaglianno cchiú ‘e ‘nu bbassurero(suggerimento) e facenno quase vedé ca nun teneva ggenio. Ma po, furtunatamente a ll’uttavo minuto ‘e ll’arranqua decidette ‘e accumincià a gghiucà e ffuje súbbeto n’ata musica: sbluccaje ‘o risultato e appicciaje ‘a luce ‘nventannose bbelli ghiucate.Forze dint’ô spogliatojo Mazzarri ll’êtt’ ‘a piglià p’ ‘e rrecchie minacciannolo ‘e metterlo fora.
(dô 77° EL KADDOURI 6 Trasette súbbeto ‘int’ ô fullé servenno ‘nu bbuonu pallone a cCavani ca però tiraje malamente.) Ma primma ‘e jucà ô posto ‘e Marekiaro nn’ à dda magnà tiéste (forni) ‘e pane!
INSIGNE 6 A ssurpresa ‘ncampo dô primmo minuto nun sempe dètte zuco â manovra pure si riuscette a dialucà bbuono cu ‘e cumpagne.Assaje bbella ll’ajuda (l’assist) pe lanzà a cCavani ca se jette a prucurà ‘o ricore ca nchiudette ‘o fullé.(dô 69° PANDEV 6,5 Trasette súbbeto ‘int’ ô fullé e regalaje bbelli ghiucate d’auta scola. Quanno sta fisicamente bbuono nun se ne po’ e nun se nn’à dda fà a mmeno!)
CAVANI 7,5 Durante ô primmo ajone tagliaje a ffelle ‘a tràsera(retroguardia) preturiana, ma po tiraje a llato. Peccato! A ll’arranqua se prucuraje ‘o ricore [sacrusanto!] e mmettette dinto ‘a rredda d’ ‘a tranquillità e ffujeno vintisette! Solita atalossa a ttutto campo cu gghiucate ca songo ‘e n’atu pianeta.
MAZZARRI 6,5 ‘A scuadra riuscette a acchiappà ‘a cualificazzione diretta â Ciampionsa cu ddoje jurnate d’anticipo blindanno ‘o siconno posto cu ttutto, comme aggiu ditto, ca avette a cche ffà cu ‘nu Bologna arraggiato e ‘ntussecato comme maje, manco êsse avanzato coccosa d’ ‘o vviecchio. ‘E cuane rispunnetteno a ttuono e a ll’arranqua arricettajeno ‘e mmurtatelle preturiane cu n’atalossa diaprésa (una prova sontuosa). Ecco mo tutto sta a vvedé si ‘stu siconno posto è ffònda (merito) o sfarma (colpa) ‘e wallerettino erode Mazzarri… Pe mme è ‘a siconna ch’ aggiu ditto e ppenzo ca chist’anno s’è perduta n’accasione ‘mpurtante. Mo spero sulo ca a ggiugno wallerettino erode Mazzarri ce leva ‘o fastidio e vva a ffelicità a quaccun’ato; comme pure spero ca mo dummeneca ca vène se decide a ffà debbuttà a rRadosevíccio, ll’unico ca po’ sustituí a bBehrami.
l’arbitro MASSA 5 ‘Stu bancario di Imperia arbitraje ajeressera p’ ‘a primma vota ‘nu fullé d’ ‘o Napule. E nun me piacette! Troppo guaglione, troppo casalinco, senza sperienzia e ssenza puzo lassaje ca ‘e preturiane facesseno ‘e guappe e ‘e mammasantissime mazzuljanno ‘e cuane senza ca isso ‘ntervenesse e ‘e mmettesse a dduvere accumincianno ‘a chella carogna ‘e Gilardino ca tentaje ‘e spaccà ‘o tubbiglio a bBehrami.Pe gghionta ‘e ruotolo annullaje ‘na rredda [reculare!] a mMaggio. Ce siscaje ‘nu ricore (ca ce steva!) a ffavore, ma n’êsse fatto a mmeno cu piacere!
E cu chesto ve saluto e si dDi’ vo’ ce sentimmo llunerí ca vène.
R.Bracale Brak