E’ inutile ca c’illudimmo guagliú, è inutile!

È inutile ca c’illudimmo guagliú, è inutile!’O Napule cchiú ‘e chello ca facette ajere nun po’ ffà… Ajere n’ata accasione perduta, n’ata jurnata sciupata… Sàpato a ssera a Roma e tTotti ce avevano fatto ‘a crianzella ‘e vattere ‘a zoccola janca e nnera e nnuje, jucanno ‘ncasa, êssem’avuto ‘o duvere ‘e mazzià ‘a Sampedoria pe rusecà tre ppunte â rebbentus(sa) mettennoce a dduje puunte e ’mmece nun ce riuscettemo e c’êttemo cuntentà ‘e ‘nu punto facenno comme ô cane d’ ‘o cacciatore ca, quanno êss’avuto fà aizà ‘a cucciarda, se mettette a ccacà. No nun c’illudimmo guagliú, è inutile!’Stu Napule ‘e mo cchiú ‘e chello ca facette ajere nun po’ ffà… Nun è attrezzato pe farlo! E cumminfatte ajere ce dètte ‘na granna delusione, ‘na delusione senza fine doppo ‘nu fullé ca me facette ‘nturcechiglià ‘e stentine e me custrignette a mm’auní cu ‘e spettature d’ ‘o san Paolo p’abbuttarle ‘e sische quanno se n’ascetteno dô campo senza essere state crestiane manco ‘e ‘mpignà a dduvere ‘o purtiere Romero ca, prutetto ‘a otto cumpagnune, se ne futtette ‘e tutte ‘e nuoste nun sulo ô primmo aione, ma pure a ll’arranqua e addirittura quanno [vistose perzo] Mazzarri passaje â difesa a cquatto levanno ‘nu difenzore e menanno dinto pure a pPandèv(vo) schieranno ‘mpratica cumplessivamente, cu Marekiaro, Insigne e cCavani, quatto attaccante. Ma nun servettono a nniente. ‘A Sampedoria era venuta pe purtarse ‘nu punto â casa… e â casa s’ ‘o purtaje. E cce crero! Cu chillu cestariello ‘e Giggino uocchie-stuorte assettato ‘ntribbuna vicino a De Chiacchiaroniis addó vulevamo jí?! Chillo porta jella luntano ‘nu miglio! Visto ca ‘o tène vicino, dich’i’, ma ch’aspetta De Chiacchiaroniis a lle spià: “Ma ‘na casa ‘a tiene o no?”Ch’aspetta?! Overamente fósse stato ‘o caso ca ‘o sinnaco nun se fósse fatto vedé ô san Paolo soprattutto ajere quanno ‘o Napule trasette ‘ncampo ancòra tenenno ‘ncapo ‘e ttre purpette ca, dint’ ô turneo d’E/L, ll’ammenestaje ‘o Viktoria Plzen,e truvaje a aspettarla ‘a scuatra ‘e Delio Rossi venuta a ffà catenaccio e contropiete pe purtarse allimmeno ‘nu punto â casa. E ce riuscette pecché ‘e cuane nun fujeno attrezzate a fà zumpà ‘o catenaccio e tuzzajeno ‘nfacci’ô muro ‘e ‘na difesa cu sette parme ‘e cacchio. ‘Nzomma, pe tutt’ ‘o fullé ‘e cuane fujeno troppo braduse e senza cegna, facettono troppi fullune (erroracci) ‘e mesura, sbagliajeno troppi pasiglie(passaggi) pure facile facile e, [oramaje sta addivintanno ‘na canzona] rijalajeno ll’intero primmo aione a ll’avverzarie, dimustrannose tutte mentalmente e forze pure fisicamente stracquate (stanchi) accumincianno ‘a Cavani ca giraje a vvacante e nun cunchiudette quase niente,e forze se mmeretasse ‘na jurnata ‘e panca…, mentre (pe parta soja) Marekiaro risultaje assente ‘ngiustificato pe ttutto ‘o fullé e tutte ‘o riesto aizajeno porvera ‘ncopp’ô solito campo ‘e pastenache ca è overamente ‘nu scuorno! Ll’unico ca se salvaje, ‘mmiezo a ttutto ‘stu presebbio fuje Behrami ca se facette ‘nu mazzo tanto, ma prerecaje dint’ ô desierto. Nun s’apprudaje a nniente cu tutto ca Mazzarri a ‘nu certo punto, suffrenno comme a ‘na bbestia,[ma ‘a sfarma (colpa) si ‘o Napule soffre ‘e stregnimiento (stitichezza) è ppure ‘a soja] se levaje giacchetta, cravatta, sospensorio e mutande sbuffanno e ghiastemmanno ‘ncinese e mustranno a ll’arbitro ògne ttanto d’esserse accattato ‘nu rilorgio nuovo; ma ll’arbitro ca pure isso teneva ‘nu bbellu rilorgio se ne futtette e cchiú ‘e cinche minutele ‘e ricupero nun dètte. ‘O sparpetuo fernette accussí ô nuvantacinchesimo ‘ncopp’ô zzero a zzero e ppe isso, pe Doveri, jette bbuono ‘o pareggio pecché si êsse vinciuto ‘o Napule sa che ddia ‘e cazziata se fósse pigliato da Agnelli ca ‘o tène ‘ncopp’ô stato paca! Arrivato a ‘stu punto avesse ‘a mettere ‘e ppaggelle. Ma manco ‘sta vota s’ ‘e mmeretano; sto troppo ‘ncazzato pe ccuje[‘a fora ‘e Behrami(ca se ll’ammereta ‘o seje)] a ttutte ll’ate, arbitro cumpreso (ca êsse pututo vedé ‘na trasuta assassina ‘ncuollo a cCavani dint’â camma ‘e ricore, cumpurtannose ‘e consequenzia, ma nun ‘a vedette) a ttutte ll’ate lle donco quatto e chi nun è d’accordo me venesse a spiecà dint’â varva ‘o pecché!
E cu chesto ve saluto e, si vo’ dDio, ce sentimmo viernarí p’ ‘o fullé d’E/L.
Stàveti bbe’.
R.Bracale Brak

ilnapolista © riproduzione riservata