Napule sulo chiacchiere e ttabbacchere ‘e lignamme

Stammo quase â fine ‘e ggiugno; tutte ll’ati scuatre fanno ‘e fatte e ‘o Napule sulo chiacchiere e ttabbacchere ‘e lignamme. P’ ‘o mumento ‘e muvimente d’ ‘o mercato ‘e accattà e vvennere napulitano so’ state ‘a cunferma ‘e Mazzarri, chella ‘e Pandev(vo), ‘o ritorno d’ Insigne (ca però nun se sape si rummane o se ne va…), ‘a minaccia ‘e vennere Cavani â juventus(sa), ‘a cessione d’ ‘o Pocho ô P.S.G. e p’ ‘o riesto parole, parole parole d’ ‘e pennarule a disposizzione ‘e De Pezzentis, Mazzarri, Biguncino e cumpagnia cantante; parole ca servono sulo a ppiglià p’ ‘o culo a nnuje aute tifuse ca ce ll’ammuccammo facennoce ‘o core tanto e ‘o fecato amaro comme appurammo ca ‘e ccose nun vanno comme ce vulesseno fà crerere; cumminfatte
“IL NAPOLI VICINO A DIARRA” e Diarrà è gghiuto ô Fulham(mo). “IL NAPOLI AD UN PASSO DA ASOMOAH” e Asamoah è gghiuto â juventus(sa)!. “IL NAPOLI SULLE TRACCE DI VERRATTI E LEALI” e Verratti e Leali so’ gghiute pure lloro â juventus(sa)!.M’arricordo quanno n’anno fa ‘e pennarule screvetteno“IL NAPOLI VICINISSIMO A VIDAL ”e Vidal se nne jette â juventus(sa)!. Mo liggimmo “IL NAPOLI STRINGE PER GABBIADINI”e Gabbiadini se nne va ‘nCermania, all’Eintracht Francoforte,si nun me sbaglio! Facimmo passà n’ati sette, otto juorne e vvene ‘o turno ‘e Joveticcio, Mudingay, Balzaretti, Cissokò, Gamberini, Capuano, Peluso e chi cchiú nne tène cchiú nne mette… e tutte quante s’accasano a cocc’ata parte.E ‘a chesta via (si tutto va bbuono…) sbarcano ati Hoffer,Santana, Donadel, Fideleff, Chavez & co. Pe furtuna (e nun ‘o ddico pe sfottere…) Rianudo rientra dô prestito ô Novara: è ‘o nusto e nnisciuno ce ‘o leva cchiú e sperammo ca Erode Mazzarri se cunvince a ffarlo jucà ‘nzieme cu Fernandez(zo) ô posto ‘e culo’echiummo e de n’ato! Ma voglio murí ‘o juorno ca ‘o vveco!R.Bracale Brak