P’e me ‘e‘na tempurata sciacqua

È overo ca ‘e cunte se fanno sott’ô lampione, ma oramaje nce simmo: ‘a tempurata è bbella ca fernuta e se po’ abbià a ttirà cocche cunclusione: ch’ à fatto ‘e pusitivo ‘o Napule? Poco! Nun ce illudimmo: sulo   ll’ottave ‘e finale d’ ‘a Ciampionsa, ‘nu terzo posto ‘ncampiunato perduto malamente, ‘na finale ‘e Coppa Italia, ca si ‘a juvetussa ce ‘a riala bene e si no niente ‘a fà! E cchesto è ttutto! Eppure aggiu sentuto ca quaccuno va dicenno  ca s’è trattata ‘e n’annata, ‘e ‘na tempurata nutevole. Evidentemente tenimmo ‘nu cuncetto diverzo d’ ‘a parola nutevole; p’e mme s’è trattato ‘e‘na tempurata sciacqua, perza e menata dint’ô cesso tenenno presente ca si s’è arrivato a quacche tracuardo ca però vale poco o niente e ca  ce s’è arrivate cu cierti atalosse assaje mudeste.  P’’a verità s’êsse ‘a dicere ca ‘o Napule è stata sulamente ‘nu poco meno metriuso  (mediocre) d’ati scuatre mmetriose pejo d’ ‘o Napule e ‘e risultate, ma soprattutto comme so’ state accanzate (ottenuti) se cummentano a ppe lloro! ‘O Napule ‘e Mazzarri à dimustrato d’essere assaje debbule  e, a ppietto ‘e ll’avverzità  avute   durante  tutta ‘a tempurata, nun à tenuto nisciuno  forza ‘e carattere, mentre ll’allenatore à cercato ‘e truvà sempe ‘e stesse scuse inutile. Riflettimmo: n’allenatore nun à dda curà, si ‘a cura,  sulamente ‘a priparazzione fisico-tattica, à dda penzà a tant’ ato e si nun è ccapace  ‘e trasmettere tranquillità, sicurezza e  ddeterminazzione perde sulo ‘o tiempo e aiza porvera si nun è ccapace ‘e faticà bbuono a livello psicologico; e ‘mmece proprio chesto è capitato cu Mazzarri! ‘Mparticulare ‘a fora ‘e Napoli-M. City, Napoli-Chelsea e de ll’arranqua (ripresa) ‘e Bayern-Napoli, ‘o Napule nun à maje mustato d’essere scuatra tosta, ‘e carattere, ‘e cegna capace ‘e guvernà ‘o risultato nfi’ â fine d’ ‘a rencontra. Pe nun parlà d’ ‘o stile ‘e juoco vuluto ‘a Mazzarri  ca è troppo custuso (dispendioso) fisicamente e quanno nun ce staje cu ‘e ccosce e nun tiene ‘na  bbona priparazzione mentale, c’è poco ‘a fà,  ‘e risultati nun ponno vení! Pecché ‘a juventussa à vinciuto ‘o campiunato? Nun certo  pecché ‘e jucature ‘e Conte fosseno state meglie ‘e chille d’ ‘o Milanno, ‘e ll’Interre o d’ ‘o Napule; no!, ma pecché Conte è riuscito a ddà ê suoje cegna, carattere e determinazzione e ‘e jucature so’ scise sempe ‘ncampo cunvinte, ‘ncazzate e cu ‘o sanco a ll’uocchie e comme si avanzasseno sempe coccosa d’ ‘o vviecchio! Ll’urdema cosa ca voglio arricurdà è ‘o fatto d’avé sciveto ‘e jucà cu ‘na difesa a ttre,jucà ciovè cu ‘na difesa passabroro, suicidannose sistematicamente, senza nisciuna ‘ntelliggenza tattica.Pe tutto chesti ccose  Mazzarri se nn’à dda jí assulutamente e à dda essere sustituito cu uno cchiú capace soprattutto ‘e dà carattere e perzunalità â scuatra : sto’ parlanno ‘e Guidolin o ‘e Montella.E me fermo cca. N’ata vota parlammo po d’ ‘e rinforze nicessarie accummincianno dô purtiere. Forza Napule! Ciuccio fa’ tu!

R.Bracale Brak

ilnapolista © riproduzione riservata