ilNapolista

Nisciuna parpetazzione, so’ cuntento guagliú

Tutto summato so’  cuntento guagliú! Ajere a nnotte,’o Napule purtaje ‘mpuorto senza nisciuna parpetazzione ‘e core, ‘a primma d’ ‘e ttre urdeme finale ‘e ‘stu campiunato e mettette ‘na preta ‘mpurtante p’ ‘a cunquista ‘e chillu terzo posto ca nun è ‘na cosa ‘e ll’atu munno, ma è mmeglio ‘e niente pecché quann’uno ato nun tène cu ‘a mugliera se cocca. E p’ ‘o mumento ‘o Napule cchiú ‘e chesto nun se po’ permettere e s’ à dda arrangià cu ‘a mugliera! Certo, parlanno cu dDio annante a ll’uocchie âmm’ ‘a dicere ca ajeressera ‘a bbona sciorta ce détte ‘na mana specie ô pprincipio quanno De Marco ce assignaje ‘nu ricore, ca forze pe recolamento (fesso sí, ma recolamento!…) nun ce fósse stato…(mentre fósse stato cchiú ricore chillo prucurato ‘a Migliaccio ‘ncuollo a  cCavani e ca De Marco nun ce dètte!) e chillu ricore dato e trasfurmato a mmestiere dô zencariello nuosto ce schianaje ‘a strata cunzentenno ê cuane ‘e passà ‘nvantaggio e  -doppo d’ ‘a sciarmanta (geniale) rredda ‘e Marekiaro, cu  n’acàbato pasiglio (perfetto passaggio) ‘e Pandev(vo) -,’o Napule amministraje ‘a rencontra comme s’ à dda  fà dinto a ‘sti situazzione! Ora mo ‘e cuane, vincenno ajeressera se mettetteno ô terzo posto e mmo tocca a ll’ate, Lazio, Interre e Udinese  a correrle appriesso. I’ saccio sulo ca si ‘o Napule, comme spero e è pussibbile, vence ll’urdemi ddoje rencontre cu Bologna e Ssiena,   po’ stabbilí ‘o  recòrdo d’ ‘e punte  cunquistate p’ ‘e campiunate a  20 scuatre, cu 63 punte mentre chillo ‘e primma era  ‘e 59 punte! Senza penzà po â finale ‘e Coppa Italia d’ ‘o 20 maggio, ca ce putesse rijalà ‘na bbella suddisfazzione, specie si ‘a rubbentus(sa) vincenno ‘o campiunato se fósse cuntentata e se carmasse facennoce vencere ‘a coppa, senza pretennere ‘ncontropartita ‘a cessione ‘e Cavani, cosa ca nun sta nè ‘ncielo, nè ‘nterra!

Passammo ê ppaggelle:

DE SANCTIS 6,5: Dicisivo  allimmeno  dinto a ttre circustanze.Me parette ‘nu poco troppo nervuso, ma senza cunzeguenze.

FERNANDEZ 6+: Sufferette  contro a  Hernandez(zo) ca teneva n’atu passo, ma strignette ‘e diente e riuscette a metterle ‘a musarola! (Da ll’ 85°  BRITOS sv)

CANNAVARO 6: Cchiú ‘e na vota currette quacche riseco cumbattenno cu Ilicic,ma guaje nun ne facette; ô siconno tiempo jette a ccercà furtuna annanze e avette pure ‘na bbona uccasione, ma nun essenno mestiere suĵo, nun ‘a sfruttaje!

ARONICA 5.5: ‘O cchiú ‘ndiciso d’ ‘a difesa,s’êtt’ ‘a arrangià spisso ricurrenno ê mmanere forte!

MAGGIO 6-: Poco ‘ncisivo cu ttutto ca arrivaje spisso ‘ncopp’â linia ‘e funno;’nfase difenziva sufferette a  Bertolo e  spisso ll’êtte fà falta.

INLER 7: Pronti-via e ricalaje ‘na granna  cunclusione ca centraje ‘o mestizzo  (l’incrocio)d’ ‘e pale. Cunfermaje ll’atalosse cratiste  ‘e ll’urdemi gghiurnate ‘e campiunato duminanno ‘o centrocampo cu rica, cumpasso e scuatretta e nun tiranno maje ‘o pere addereto quanno se trattaje ‘e spezzà ‘e passe d’ ‘e palermitane!

GARGANO 6: Assaje casinista cu ‘o pallone ‘nfra ê piere, se facette perdunà jenno a muzzeccà addó capitaje,capitaje  a ddritta e mmancina.

ZUNIGA 5,5: Calante a ppietto ‘e ll’urdeme atalosse soje.Quacche cusarella bbona ‘a facette sulo ô siconno tiempo.

HAMSIK 7.5: ‘Nzieme a Pandev(vo) fuje ‘o meglio ‘ncampo e nun sulo p’‘a sciarmanta rredda signata ca fuje ‘a sesta fatta ê siciliane  ‘a quanno joca cca  ‘nnItalia. (Da ll’ 81° 36′ DOSSENA sv ‘O solito cagno inutile)

PANDEV 7.5: Ll’ajuda p’ ‘a siconna rredda napulitana fuje ‘na pennellata d’artista,  n’acuto ‘e tenore! S’ abbuscaje pure ‘o ricore d’ ‘o primmo vantaggio, cu ‘a cullabburaziona carativa  (generosa) ‘e De Marco. Spero ‘e vederlo titulare pure a Bbologna pecché fósse ‘na scuntrufola tené fora a‘nu jucatore accussí ‘nfromma e ccapace ‘e jucate d’auta scòla…  (Dô 76° LAVEZZI sv cagno inutile)

CAVANI 6.5: Signaje ‘a quarta rredda cunzecutiva e nne mancaje ‘e poco n’ati ddoje! A pparte chesto po  faticaje assaje p’ ‘a scuatra.’Nu jucatore accussí nun se discute e nun se po’ nemmeno penzà d’ ‘o vennerlo… soprattutto â rubbentus(sa)!

all. MAZZARRI 6: Cu tutto ca fisicamente ‘e jucature suĵe nun stevano ô mmeglio, ‘a scuatra riuscette a mantené ‘e ddoje rredde ‘e vantaggio riuscenno a allungà ‘ncrassifica  aspettanno ‘a risposta  ‘e ll’Interre, Lazio e Udinese.

arb. DE MARCO 5: 4,pe nun avé siscato ‘o ricore a ffavore ‘e Cavani, ma 6 p’ avé siscato ‘o primmo, futtennose d’ ‘a lettera ‘e ‘nu recolamento strunzo!: media 5

Ce sentimmo, si Ddi’ vo’, â prossima vota. Staveti bbe’!

R.Bracale Brak

ilnapolista © riproduzione riservata