ilNapolista

Fenette ‘stu sparpetuo ‘e campiunato

Comme dDio vulette ajere ssera fenette ‘stu sparpetuo ‘e campiunato, guagliú e â fine ‘o Napule s’êtte accuntentà ‘e ‘nu quinto posto a sissantune punte assicurannose ‘a partecipazzione nun ggià â Ciampionsa, ma a ll’ecchesa UEFA ca mo nun saccio comme cacchio se chiamma. Primma d’ ‘a rencontra d’ajere ssera Mazzarri e quacche pennarulo ancòra mettevano speranza â matematica e se frusciavano ca ll’ Udinese êsse perduto a Ccatania e ca ll’Interre e ‘a Lazzio êsseno pariggiato.. Ma nun succedette e nun puteva succedere pecché Guidolin nun è Mazzarri: sape chello ca fa e ‘a scuatra soja  nun perde ll’appuntamente ‘mpurtante. ‘Mmece ‘o Napule e Mazzarri cu ‘o piazzamento finale d’ajere dimustrajeno ‘e avé fatto peggio ‘e ll’anno ‘e primma…, d’avé mancato n’ubbiettivo ‘mpurtante e d’essere ‘na delusione. È overo ca ce rummane, pe ‘nchiudere ‘a tempurata, ‘a finale ‘e Coppa Italia dummeneca ca vène. Ma ‘o Napule se ll’à dda jucà no contro ô Canicattí, ma contro â juventussa, ‘na scuatra ca joca cu ‘o sanco a ll’uocchie, cu ‘o curtiello ‘mmiez’ê diente e ca à ggià dichiarato pe bbocca ‘e quacche ghiucatore, ca doppo d’ ‘o scutetto vo’ vencere pure ‘a Coppa Italia. Pe ccuje è quase certo ca ‘o Napule ‘sta Coppa nun ‘a vence a mmeno che De Pezzentis nun riesce a accattarsela jettannose ê piere ‘e Agnelli e prumettennole ‘e cederle a Ccavani, abbarrucannose a chillu femmenello ‘e  Matri! E ppo (siccomme ‘e guaje nun venono maje sule), doppo d’ ‘a minaccia ca Mazzarri resta n’ato anno ancòra,  sto sentenno ‘e dicere ca  Mazzarri, De Pezzentis  & Socie vonno mannà Insigne a Pparma pe pigliarse a Ggiovinco (ca comme a ttutte chille ca ànnu tenuto ‘ncuollo ‘a maglia juventina (’a fora ‘e Sivori) è ‘nu ‘nquacchiato ‘e sossazza (lebbra)janconera e nun è ddegno ‘e metterse ‘a maglia luvarda, pecché ‘a ‘nfettasse!)

Ma è mmeglio ca nun me faccio ati diebbete cu ‘a vocca… Sperammo ca nun è nniente overo e ca so’ tutte fantasie ‘e quacche pennarulo!Passammo ê paggelle:

DE SANCTIS 5,5 (media ‘e 8 + 3): Otto pe ddoje bbelli parate ‘mpurtante fatte durante ll’arranqua (ripresa), parate ca però nun servettono a farme scurdà ll’enorme puttanata fatta ‘nzieme a Culo-‘e-chiummo (voto 3) ô mumento d’ ‘a rredda d’ ‘o Siena.

CAMPAGNARO 7: Turnaje a gghiucà ‘ncopp’â dritta sfuderanno n’atalossa troppo bbella, risultanno ‘o meglio ‘ndifesa e prupunennose annante cu bbelli ‘scarpadure (discese) e ‘nventannose ‘na granna ajuda (un grande assist) p’ ‘a siconna rredda ‘e  Dossena. (Dô 91° GRAVA sv)

CANNAVARO 3,5 Êsse anticipato ‘na vota ll’avverzario!Aggio ‘a ‘mpressione ca nun solo tene ‘o culo ‘e chiummo, ma pure ‘na granna ‘ntoscia e ‘na paposcia  ‘e tutto rispetto!Tenette, cu De Sanctis, ‘ncopp’â cuscienza ‘a rredda d’ ‘e tuscane. Doppo ‘na meza bbotta ‘int’ô custato se n’ascette ‘nfurtunato e sperammo ca pe dummeneca nun se repiglia! (Dô 62° FERNANDEZ 6+: Forte, diciso e diterminato, è uno ca ce se po’ cuntà, pe rifunnà ‘a difesa  ll’anno ca vène!).

BRITOS 6: Niente ‘e straurdinario…, ma se guadagnaje ‘a pagnotta cu precise ancerche (anticipi precisi) dimustrannose jucatore ‘e cegna.

MAGGIO 6-: Accumminciaje cu ‘o freno tirato, po’ chianu chiano  guadagnaje metre e cunfianza  (fiducia).

GARGANO 6-: Ricuperato ‘ncanne ‘ncanne, nun facette mancà ‘o muvimento permanente suĵo  (il suo moto perpetuo) e ‘e pulmune suoje, ma ô ssolito, tanto pe nun farce perdere ll’abbitudine, sbagliaje troppi passagge!

INLER 5.5: Poco priciso e llucente (lucido) ô  mumento ‘e trià (smistare) ll’azziona. Pruvaje a ssunà ‘a carica ‘nu paro ‘e vote tiranno ‘a luntano, ma cu scarzo risultato.

DOSSENA 7.5: ‘O miraculo, ‘o miraculo!Serata ‘a prutagunista cu n’atalossa ca me surprennette doppo d’avé dimustrato pe tutt’ ‘o campiunato d’essere ‘nu jucatore bbuono p’ ‘o scasso… Si nun facesse peccato penzasse ca, primma ‘e scennere ‘ncampo, ‘o guaglione era passato pe quacche farmacia…

HAMSIK 6.5: Dimustraje ‘e stà ‘nserata jucanno ‘nfra ‘e linie p’ avvià o trià ll’azziona; Soja ll’aiuda p’ ‘a primma rredda napulitana.

LAVEZZI 4.5: Che brutta atalossa, cundiziunata (pe gghionta ‘e ruotolo)dâ chizziglia  (dall’ostilità) d’ ‘o San Paolo. Nun lle riuscette niente e ll’urdema rappresentazziona ‘ncopp’ô palcuscenico casalinco lassaje ‘nu bruttu ricordo.Tra chi alluccava: “Pocho, Pocho!” e cchille ca ‘o siscavano, vincetteno ‘e sische!

PANDEV 6: Aveva avuto jurnate meglio ‘e chella d’ajere ssera, ma però custretto a gghiucà senza Cavani  pure riuscette cumunque a rijalà quacche bbona  idea… (Dô 68° ZUNIGA sv)

All. MAZZARRI 4: ‘O voto è pe chellu ppoco ca cumplessivamente facette durante tutto ‘o campiunato e pe nun essere riuscito a ripetere ‘o risultato ‘e ll’anno ‘e primma. Ajere ssera fuje furtunato ca riuscette a vvencere…,ma ‘a minaccia ‘e vulé restà cu nnuje n’ato anno ancòra me sta facenno preoccupà assaje!

l’arbitro CELI 4 Scadente comme ‘o nuvanta pe cciento ‘e ll’arbitre taliane,êsse vuluto fà ‘o pignuolo e ‘o pricisino, ma sbagliaje  quase tutto,spisso ‘ntralcianno pure ‘a manovra, senza scanzarse! Miezo scemo, pare ‘o frate cucino ‘e Schettino e nun sulo fisicamente…

E fermammoce cca. Appuntamento, si Ddi’ vo’,  a llennerí ca vene speranno ca cummentammo ‘a cunquista d’ ‘a Coppa Italia sempe ca De Pezzentis riesce a accattarsela, pure si âmm’ ‘a perdere a Ccavani! Basta ca dummeneca ca vène ‘o Napule nun ce facesse ‘ntussecà! Cu ‘na bbona salute!

R.Bracale Brak

ilnapolista © riproduzione riservata