‘Sta vota nun ve faccio perdere tiempo, niente ppaggelle

Che disgrazzia, che sbentura! Chello ca nn’êva maje succedere, succedette! Mannaggia a cchello ca nun se po’ ddicere, guagliú! Ajeressera ‘o Napule e Mazzarri fujeno cacchie ‘e mme ‘ntussecà ‘a dummeneca d’ ‘e Ppalme e ‘o primmo d’abbrile!

So’ ‘nu bbuonu crestiano (o me sforzo d’esserlo…), ma ajeressera quanno fernette ‘a rencontra nun me sentette ‘e stà ‘mpace cu nnisciuno e mme ‘ncazzaje talmente ca si avesse dato ‘nu muorzo a coccheduno ll’êsse avvelenato e si me fósse capitato Mazzarri p’ ‘e mmane, cu ttutto ca stongo ‘ncopp’a ‘na seggia a rrutelle,  ll’êsse fatto agliottere tutt’ ‘e riente! E che saciccio! Piglià tre purpette ‘a ‘na scuatra ‘e femmenielle delinquente è ‘na cosa murtificante…. Jí a Ttorino e arrennerse senza cumbattere è ‘na cosa ca nun sta nè ‘ncielo nè ‘nterra! Eppure proprio chesto succedette e â fine d’ ‘a rencontra putette annutà ‘ncopp’ô fuglietto ‘a miseria ‘e  ‘nu tiro ‘mporta…. E cche sanco d’ ‘a brasciola! Ajeressera ‘o Napule aveva apprufittà d’ ‘e ccarocchie  ca avevano pigliate ‘a  Lazzio e  ll’ Udinese; fósse avastato ca ‘e cuane avessero cunquistato  pure sulo ‘nu punto pe metterce a dduje passe dâ Lazzio e ghircela a gghiucà ssàpato ca vene a Rroma… e ‘mmece ajeressera ‘o Napule resistette sulo ‘nu tiempo e ppo sbracaje facennose paccarià malamente dê piamuntese ca jucajeno cu ‘o sanco a ll’uocchie e ce mannajeno â casa scummate ‘e sanco! Mamma mia ajeressera fuje comme quanno chiove a zzeffunno e uno nun tène manco ‘a fetenzia ‘e ‘nu ‘mbrello decente… ‘O fatt’è ca oramaje cu  Mazzarri nun se va a nnisciuna parte, manco a Muntevergene o a Pumpeje. Pussibbile ca nun s’accurgette ca aveva miso ‘ncampo ‘na scuatra molla e stanca senza cegna e senza ggenio? Pussibbile ca nun s’addunaje ca êva miso ‘ncampo ‘na difesa  cucassa (ridicola), ‘nu centrocampo ‘nnatequato (inadatto) mentre annante ‘e tre tenure stevano sfiatate e assumigliavano cchiú assaje a ttre suprane o a ttre crastate d’ ‘o setticiento?Mo vulesse overamente sapé quala scusa s‘ammenta  pe ggiustificà ‘nu campiunato ca mo comme a mmo è overamente sprecato e rijalato. E pe salvà ‘a tempurata mo nun lle rummane ca vencere ‘a rencontra cu ‘a Lazzio  a Rroma e ‘a finale ‘e Coppa Italia. Ma ‘a veco tosta pe tutt’ ‘e ddoje cose,pure si  nun me manca ‘a speranza ca â fine se passano tutte ‘na mano p’ ‘a cuscienza e riesceno a salvà chellu poco ‘e dignità ca nc’è rummasa. Ea pproposito penso ca, tutto summato,fuje ‘struttivo perdere ajeressera. Po’ essere ca a mmaggio, p’ ‘a finale ‘e Coppa, Mazzarri capisce coccosa e ‘a scuatra scenne ‘ncampo misa meglio cu cchiù ccegna, cazzimma e risulutezza.

Ora mo solitamente mecco ‘e ppaggelle; ma ‘sta vota nun ve faccio perdere tiempo guagliú e senza stà  a  pelià mecco quatto a tutte quante, arbitro Orsato cumpreso ca cunvalidaje ‘a primma rredda juventina  signata ‘a Bonucci  ‘nn’urzo ‘e cose (in fuorigioco) e ca jettaje ‘ngiustamente fora a Zuniga pe ‘na guvetata ‘nvolontaria ca ‘o napulitano êva  data ‘nfaccia a  Chiellini tentanno ‘e libberarse d’ ‘o delinquente juventino ca ‘o steva abbrazzanno e strattunanno…

A Mazzarri però ll’aggi’ ‘a mettere a fforza tre

pecché sbagliaje tutto e doppo d’ ‘a scunfitta murtificante d’ajeressera se nn’à dda jí assulutamente!

E basta accussí: è mmeglio ca nun me faccio ati diebbete ‘e vocca e mme fermo cca!

Si dDi’ vo’ ce sentimmo dummeneca ca vène speranno ca sàpato succedesse ‘o miraculo a Rroma!

Staveti bbe’!

R.Bracale Brak

ilnapolista © riproduzione riservata