Per me si è salvato solo Fernandez

E chi s’ ‘o fósse aspettato guagliú! Che fetenzia! Si me ll’avesseno ditto, nun ce avesse creduto… e ‘mmece ajeressera jette proprio ca pejo nun puteva essere.’O Napule abbuscaje n’ata vota! E che saciccio! Doppo d’ ‘e ttre purpette pigliate ‘ncopp’ô campo d’ ‘a juventussa e doppo chell’ati ttre pigliate a Rroma ‘ncopp’ô campo d’ ‘a lazzio,penzavo ca ‘o Napule avesse fernuto ‘e fà fijure ‘e mmerda e mmaje putevo mmece suspettà ca pure ll’Atalanta veneva a paccheriarce ô san Paolo dànnoce pure essa tre purpette sotto a ll’uocchie ‘e De Pezzentis ca teneva ‘a faccia d’ ‘a ‘nzularchia! Fraditanto ‘a juventussa metteva sotto ‘a Lazzio e ‘a Roma stenneva ll’Udinese… e ‘a cunclusione fuje ca mo ato ca terzo posto, ‘o Napule à dda vedé si â fine ‘e ‘stu campiunato arriva a piazzarse ô sesto posto. ‘Nzomma primma fernesce ‘stu sparpetuo meglio è e pprimma forze De Pezzentis se fa capace ca cu Mazzarri e Biguncino s’ è sciupata ‘na tempurata e nn’ à dda cacciarle ‘mparanza cchiú ampressa ‘e súbbeto e accummincià tutto ‘a capa e ccapa: à dda ruttamà ‘a difesa,sarvanno sulo a Fernandezzo, piglià dduje bbuone esterne e allimmeno n’attaccante ‘e nomme e dde piso! Certo dispiace a ddirlo, ma ‘e fatte stanno proprio accussí: ajeressera ‘o Napule dimustraje chiaramente d’essere a ccurto ‘e sciato, forza e ccegna, de tené ‘e ppile malamente esaurite e a ll’ Atalanta avastaje ‘nu jucaturiello, Maxi Moralez(zo)pe metterce ‘ndifficultà;’e jucature cuane nun ce ‘a fanno cchiú; e ‘o fatto è ca Mazzarri à abbituato a gghiucà chilli tridece o quattuordece jucature suoje e cchilli poche ate a stà ‘mpanca a guardà senza pripararse!Mo ca ‘e chilli tridece o quattuordece,ne manca quaccheduno, se capidsce ca chille ca traseno nun songo all’aldezza; pe nun dicere po ca de qualcuno nun esiste ‘o sostituto, comme pure aggio ll’impressione ca ggente comme a Ccavani à mullato dâ rencontra cu ‘o Catania pecché chillu juorno succedette coccosa, ma nun saccio che. Me putesse fermà cca, ma ‘sta vota però ‘e ffaccio ‘e ppaggelle:

DE SANCTIS 4 Scuraggiato e assaje ‘nsicuro: ‘a primma e ‘a terza rredda ‘e tenette isso ‘ncopp’â cuscienzia! CAMPAGNARO 6- ‘Mmiezo a ttanti fantaseme ll’argentino provaje allimmento a combinà coccosa.

FERNANDEZ 6- ‘O guaglione ce mettette tanta bbona vuluntà dimustranno ‘e mmeretà cchiú spazzio, specie si jucasse dinto a ‘na difesa a cquatto!

GRAVA 4,5 Purtroppo ‘sta vota ‘o surdatiello affunnaje cu tutta ‘a scuatra e nun riuscette a ddà ‘na mana! (Dô 75° ARONICA s.v.)

DZEMAILI 5 Custretto a gghiucà a ‘nu pizzo ca nun è ‘o suĵo, ce mettette tanta cegna ma cu risultate scarze.

GARGANO 4 Ajeressera se turnaje a vvedé ‘o Gargano ‘mpriciso e ‘nzicuro d’ ‘o ppassato. ‘O zeffunnajeno ‘e sische quanno ascette.(Dô 69° VARGAS 5 Trasette, comme ô ssolito,ô mumento difficile d’ ‘a rencontra, ma nun ne ‘ncarraje una!)

HAMSIK 4,5 Marekiaro cuntinuaje cu ‘o periodo ‘e fromma scadente aggravato dô fatto ‘e jucà a ‘nu pizzo ca nun è ‘o suĵo! .(Dô 64° INLER 5,5 Pruvaje a mettere ‘ncampo rica e cumpasso, ma oramaje quanno trasette fuje troppo tarde).

DOSSENA 4 E cche ne parlammo a ffà?! N’ ata fijura ‘e seje sorde!Se tratta ‘e ‘nu jucatore a ffine ‘e carriera, destinato ô scasso e nun capisco pecché Mazzarri se ‘nfessette a tenerlo ‘ncampo pe tutt’ ‘a rencontra;â fine d’ ‘o primmo tiempo avesse fatto trasí a Ddezi!

LAVEZZI 5,5 Assaje ‘mpriciso; purtroppo ‘a rredda ca facette servette poco o niente!

PANDEV 4,5 Ll’unica cosa bbona: ll’ajuda pe Llavezzi, po aizaje pórvera e giustamente ne fuje cacciato ‘a ll’arbitro pe ‘nu caucione inutile a Maxi Moralez(zo).

CAVANI 5 Nun è cchiú isso e nun me spieco ‘o pecché!
All. MAZZARRI 4 – Si ‘a scuadra è stanca e sse vede ‘a colpa è ‘a soja ca nun à vuluto ‘na panca longa; pe gghionta ‘e ruotolo sbagliaje mettenno ‘ncampo ‘na scuatra azzardata e senza loggica cu ghiucature ô pizzo sbagliato,ggente spumpata, senza cegna e senza idee.C’è poco ‘a fà: st’ ommo nun dà cchiú cunfianza (
affidamento)! Se nn’à dda jí primma ‘e súbbeto!

E fermammoce cca. Bbona salute e ce sentimmo si dDi’ vo’ â prossima vota, speranno ca nun abbuscammo pure a Llecce!

R.Bracale Brak

ilnapolista © riproduzione riservata