ilNapolista

NO AL MEAZZA!” ‘A sede naturale è Rroma

Sento ‘e dicere ca p’ ‘a finale ‘e Coppa Italia ce stanno prubbleme d’ordine pubbrico a ffarla jucà a Rroma. I’ mo vulesse sapé ‘a do’ s’ ‘e stanno caccianno ‘sti prubbleme ca, pe mme ce  putessero essere si ‘a partita ‘nquistione fósse che saccio mo Juve-Torino,oppure Juve-Milàn(no),Intèr(re)- Milàn(no), Milàn(no)-Sampedoria ,Verona –Chievo, Procadaverica – Virtus perucchie……, ma se tratta ‘e jucà Juve-Napoli e vvisto ca ‘a partita s’êss’ avuto ‘a jucà a Rroma comme deciso n’anno fa e comme succede dinto a tutt’ ‘e paise ca  ‘a finale ‘e Coppa se joca dint’ô statio d’ ‘a  capitale. Cca mo pare ca ‘mmece vonno spustà ‘a partita ô Meazza ‘e Milano justo pe gghí a cchillu servizzio ê tifuse napulitane ca ggià s’erano urganizzate e  erano pronte a pupulà ll’Olimpico ‘e Roma e mmo ‘mmece s’êsser’ ‘a fà ‘nu scarpinetto ‘e mille chilometre. ‘Sta cosa puzza, puzza assaje pecché si nun è ffatta pe favurí ‘e tifuse rubbentine (ca a Mmilano so’ cchiú assaje d’ ‘e tifuse napulitane), è una  d’ ‘e ssolite manovre p’ alluntanà  ll’attenzione dô pallone jucato; nun saccio comme va a fferní ‘sta facenna, ma i’ spero ca piglia d’ acido e rummane ‘ncopp’ô stommaco ‘e chi ‘e duvere: De Pezzentis, Agnelli o chi è isso.

P’ ‘o mumento ‘mmito a ttutte quante a ddicere “NO AL MEAZZA!” ‘A  sede naturale è Rroma  e Rroma à dda restà! Chiste ce vonno sprupriarce ‘e ‘na festa! Se ne mettessero scuorno e vriogna!

Sulo cca dint’ô stivale se po’ penzà ‘e fà  ‘na cosa ‘e chesta! Ripeto: ‘a finale d’ ‘a  coppa nazziunale ‘int’ a  ttutte ‘e paise civile se joca dint’ô statio d’ ‘a  capitale, pure si generalmente ‘a capitale tène almeno ddoje scuatre ca ‘nteoria putessero arrivà a ghiucarse ‘a finale. È accussí addó se va va. Ve ‘mmagginate vuje  si ‘a finale d’ ‘a  Coppa d’Inghilterra ‘mmece ca  a Llondra se jucasse  a Newcastle ? Ve ‘mmagginate vuje  si ‘a finale d’ ‘a  Coppa ‘e Spagna  ‘mmece ca  a Madrid  se jucasse (che saccio mo?) a Oviedo? Che dicesse ‘o rre?

Ovviamente …….‘o prubblema è  ttaliano,  è de ‘stu paese nuosto addó  ‘a crassa pulitica à rignute tutt’ ‘e spazzie (sport(o) cumpreso) cu ‘mbruoglie, apparde e  gaspillagge  (sprechi) a ccagno ‘e niente visto ca ‘e  stadie so’ ssempe cchiú scamuse e scardate  (fatiscenti)  cu sservizzie pejo ‘e chille d’ ‘o  da terzo munno…, legge ‘ncopp’ a llegge  e ssempe ‘ndanno d’ ‘e tifuse, maje pe cchi arrubbaje sorde pubbreche ( Italia ‘90 ),pe nun parlà d’ ‘e    forze  ‘e ll’ordine (centenare!) chiammate a prestà servizzio ògne vvota  ( cu   trasferte e straurdinarie pavate pure ‘a chi se ne strafotte d’ ‘o pallone…) cu ‘o risultato ca nun esiste ‘na cultura spurtiva fatto ca se rifrette dint’ê cumpurtamente  barbare ca venono permise. Sulo cca dint’ô stivale! Che brutta ggente, che bbrutta nazziona!

A ccomme stanno ‘e fatte ‘stu paese s’ à dda sulo ‘nzerrà e ghittà ‘a chiave!

R.Bracale Brak

ilnapolista © riproduzione riservata