ilNapolista

Qua’ 17 e viola funesto! Lla fuje ‘na festa ‘e Piererotta

Che putimmo dicere guagliú? Ca meglio ‘e comme jette ajeressera nun puteva jí! E ‘a suddisfazzione grossa fuje ca, facenno ‘e cunte sott’ô lampione, ‘o Napule  se purtaje ‘ncrassifica a trentasette punte ‘a cuollo  â scuatra ‘e chillu sbruffone ‘e Ranieri e a chistu punto penzà d’arrivà a ffine ‘e capiunato ô terzo posto  è ‘na cosa ca se po’ fà visto ca ‘e guagliune ‘o vvonno fà e ‘o dimustrajeno proprio ajeressera facenno ‘na rencontra tutta cegna e cuncentrazzione ammullanno tre purpette tre â scuatra ‘e chillu Delio Rossi ca pe tutt’ ‘o tiempo se rusecaje crussieramente  (sguaiatamente) ‘a dentiera facennome avutà ‘o stommaco.

Ma avette voglia ‘e rusecà; ajeressera ‘e guagliune cuane facetteno vedé chi erano futtennose ch’era ‘nu viernarí diciassette ‘e ‘nu mese curto e amaro, de n’anno bissesto (bisestile), anno funesto e ca se jucava contro a ‘na scuatra cu ‘a maglia viola.Qua’ funesto e ffunesto! Lla fuje ‘na festa ‘e Piererotta e ‘a vittoria d’ajere se po’ cunziderà ‘na degna trasetura (degno antipasto) p’ ‘a rencontra cu ‘o Chelsea ca – si ‘e guagliune nuoste mantenono ‘e prumesse – se ne po’ turnà ‘a Napule carreca ‘e maraviglia. Passammo ê ppaggelle:

ROSATI 6 Allignato (schierato)’ncampo ô posto ‘e De Sanctis ca teneva ‘a freva,  nun ‘o facette agnurà (rimpiangere); nun fuje  chiammato a ffà ‘e straurdinarie, ma chellu ppoco ca facette ‘o facette a mmestiere, mustranno granna sicurezza soprattutto ‘int’ a ll’asciute.
CAMPAGNARO sv
Jellato! Manco ‘nu quarto d’ora e se n’êtte ascí pe prubbleme musculare.

(dô 13° GRAVA 6,5 ‘O surdatiello trasette súbbeto ‘mpartita, cuntrullanno n’accunto scòmmeto comme a Joveticcio. Badaje â sustanza e nun ghiette p’ ‘o suttile  allontananno ‘e pericule sempe enercicamente.)

CANNAVARO 6 Ascette quase a mazzate cu Amauri e tutto summato lle mettette spisso ‘a musarola.

BRITOS 7 Giustamente ce mettette ‘o fisico e ‘e mmaniere cuncrete riuscenno  a ffà ‘o spezziale ch’êv’ ‘a fà. ‘Ncopp’ê ppalle aute fuje ‘nsuperabbile e ô siconno tiempo pigliaje ‘ncunzegna  a Amaurí annullannolo. Peccato ca menaje fora ‘nu pallone gurmante (goloso)!

MAGGIO 6 Nun fuje ancòra isso, ma vincette ‘a sfita  cu Vargas (chillu viola), nun lassanno buche ‘ncopp’â curzia ‘e dritta e se lanzaje  spisso annante accumpagnanno ll’azziona.

DZEMAIL 6.5 Accumminciaje bbuono, po se ne scennette ‘nu poco, ma cumunque mantenette auta ‘a pressione nun mullanno maje nfi’ a ll’urdemu siconno e ajutanno a Ddossena ‘nfase difenziva.

INLER 7 ‘A rencontra era tosta e ‘o turco-napulitano fuje mmitato a ccarne e mmaccarune levantannose (esaltandosi) dint’â canfa (nella lotta).Ademàsso ‘na granna ‘nterdizzione (Oltre ad una grande interdizione) fuje  priciso p’ ‘e bbassurere fatte e p ‘ ‘e cagne ‘e juoco! (nei suggerimenti e nei cambi di gioco).

DOSSENA 5,5 Niente ‘a fà! Dinto a ‘na serata ca tutte ll’ate fujeno a ll’ardezza, isso aizaje porvera ‘ncopp’â curzia ‘e mancina nun riuscenno maje a ppognere o a avé n’aizata ‘e mente e lassanno a  Ccassani spisso  campo libbero pe puté  affunnà ‘e colpe. Ô siconno tiempo sciupaje ‘na retissanta uccasiona tiranno auto.

HAMSIK 7,5 Rencontra spettaculara ‘e Marekiaro ca ‘mprímmese  facètte mancà sempe ll’aria   a Montolivo quanno chisto  pruvaje  a ‘mpustà ll’azzione e ppo fuje  sempe prisente ‘nfase difenziva e ‘nfase prupusitiva accumpagnanno sempe ll’azziona;straordinarie ‘e ddoje ajude  (i due assist) fatte pe mannà a saggena a Ccavani(per mandare a rete Cavani)!

(dô 69°  GARGANO 6 Trasette súbbeto ‘mpartita jenno a rinfurzà ‘a mediana  ddànnole ancòra cchiú sustanza e carattere)

LAVEZZI 6 (media ‘e 5 + 7) Primmo tiempo deludente,ma’nu granne siconno tiempo quanno trasette meglio ‘mpartita: apprimma sfresaje ‘na rredda  (sfiorò il gol) ca po  arrivaje ô finale doppo ‘na fantastica galuppata.

CAVANI 8 Â primma uccasione (terzo minuto) nun sbagliaje, mettenno ‘ndiscesa ‘a rencontra e se ripetette doppo diece minute d’ ‘o siconno tiempo. Generoso comme ô ssolito ‘nfase difenzivà, alluntanaje cchiú ‘e ‘na vota ‘o periculo viola comme difenzore agghiuntato.

(dô 73° PANDEV 6 – Tuccaje  pochi pallune,ma tentaje ‘e farse valé;  Borucco  ll’annicaje ‘a rredda cu ‘na parata ‘e pède  doppo ‘na bbella girata d’ ‘o macetone.)

MAZZARRI 6 Addimannaje ê guagliune ‘a  vittoria e ll’avette e ritruvaje pure ‘na scuatra ‘mpensabbile nfi’ a quacche gghiuorno fa, ‘na scuatra ca dimustraje juoco, cegna, cuncentrazzione e cumpattezza ca rappresentano ‘a cunnimma justa pe fà vulà ‘o Napule!

l’arbitro ORSATO 5 M’aspettavo peggio.’O sapevo e mm’ ‘o rricurdavo  pe uno ca ati vvote  ausaje sistematicamente dduje pise e ddoje mesure, siscanno contro ê napulitane â primma ‘ccasione e   cuncedenno ‘mmece a ll’avverzarie  ‘e vattere scientificamente ê napulitane senza mettere lengua.Ma ajeressera ‘a fora ‘e nun avé visto o vuluto vedé ‘nu sbuttulone avuto ‘a Cannavaro miso ‘nterra dinto a l’area viola quanno Dossena tiraje ‘ncielo…, e ‘a fora d’avé ammunito a Marekiaro ca mo à dda zumpà ‘a  prossima sfita cu ll’Interre, ‘a fora  ‘e chesto nun facette grossi puttanate; è cumunque scarzulillo comme a ttutte ‘e culleche suĵe!

E nchiudimmo cca gudennoce ‘sta vittoria nfi’ a  miercurí ca vène quanno – si dDi’ vo’ –  ce sentimmo n’ata vota!

Staveti be’!

R.Bracale Brak

ilnapolista © riproduzione riservata