Che suddisfazzione guagliú, che suddisfazzione!

Che suddisfazzione guagliú, che suddisfazzione mannarne n’ata vota â casa ancòra scunfitta  chella scuatra ‘e  chianchiere ‘e chillu sbruffone ‘e Ranieri ca ademasso (oltre) a ttené ‘o difetto d’essere rumano e pirciò smargiasso,  comm’ecchese juventino   è ppure  ‘nu ‘nchiaccato ‘e sossazza  janca e nnera e cu ttutto ca  s’ ‘o ppenza cchiú isso ca ‘o ggrano d’ ‘a carastia, cu ‘a scuatra d’ ‘o benzinaro va recuglienno fijure ‘e mmerda e   ajere a nnotte â fine d’ ‘a rencontra teneva ‘na faccia ‘e vecchia  cestunia mazziata ch’era ‘na maraviglia cu ll’uocchie abbacchiate e cu ‘o ffèle ca le scurreva ‘a n’angulo d’ ‘a vocca storta. Che suddisfazzione guagliú, che suddisfazzione! Peccato sultanto ca Lazzio e Udinese nun ànnu falluto ‘o colpo e stanno sempe pusiziunate ô terzo posto a 45 punte e nnuje, p’ ‘o mumento, ce âmmo accuntentà d’ ‘o quinto a 40 punte; ma ‘o campiunato è ancòra luongo e nun è détto ca nun po’ succedere ca ‘o ‘ncappammo ‘o terzo posto! P’ ‘o mumento è già ‘na suddisfazzione stà annante â Roma e a ll’Interre.

Passammo ê ppaggelle:

DE SANCTIS 6: Se guardaje ‘a rencontra pe quase tutto  ‘o primmo tiempo.Urdinaria amministazzione ‘e tre o quatto ‘ntervente suoje d’ ‘o siconno tiempo.

CAMPAGNARO 7: Cuntrullaje a  Forlan(no) e chiunque lle capitaje annante  senza difficultà né apprenzione.  Cu ‘o turbante ‘ncapo turnaje a essere ‘o Toro ca cunuscimmo:  ‘nsuperabbile, dimustranno ‘e mmeretarse ‘a  cunvocazione cu ‘a   nazziunale argentina!Signaje pure, ma ll’arbitro (pe mme ‘ngiustamente) annullaje ‘a rredda…

CANNAVARO 6-: Pe grazzia ‘e dDio puttanate grosse nun ne facette e cuntrullaje abbastanza a  dduvere a  Milito. Me facette vení ‘o friddo ‘ncuollo sulo quanno ô mumento culminante d’ ‘o finale travulgente se perdette a Ppazzini ca pe ffurtuna però  sbagliaje ‘a capata e depositaje ‘o pallone fora.

ARONICA 6-  :’Int’ê degaggé (nei disimpegni)fuje troppo precipituso e ‘mpriciso.Stranamente preoccupato sbagliaje pure quacche cuntrollo; proprio ‘nu jerro ‘e cuntrollo lle custaje ‘nu sacrusanto cartellino russo. MAGGIO 5,5 : ‘A sfita cu  Nagatomo ‘o vedette  vincitore paricchi vvote. Mmacenaje  comme a ssempe tanti chilometri, ma mancaje ‘e pricisione ‘nfase ‘e sustentazzione e cu ‘e cruzze.

INLER 7: Granne sarto/geometra d’ ‘o centrocampo mmesuraje, tagliaje, ‘mbastette e cusette meglio ‘e Rubinacci e Finamore. Certamente jucaje senza  paura e senza preoccupazzione  rispetto a  ll’inizio d’ ‘a tempurata dimustrannose ‘ncrescita custante e pruvicciosa (redditizia). Benturnato lió!

GARGANO 6,5: Sradecaje centenare ‘e  pallune dê piere ‘e ll’avverzarie, radduppiaje custantemente ll’esterne, dètte   equilibrio â scuatra,senza scurdarse ‘e correre senza fine;  nun mullaje maje ‘e ‘nu  centimetro. E s’‘o vulevano vennere!

ZUNIGA 6- : ‘A chiena e ‘a vacante:comme criaje accussí scarrupaje;facette quacche ghiucata ‘nteressante, ma po rallentaje ll’azziona luvarda cu inutili ricate e nfente varie. Pe furtuna ô siconno tiempo cagnaje riggistro, risultanno cchiú cuncreto.

DZEMAILI 7,5 – Forze ‘a meglia rencontra jucata dô  svizzero nfi’ a mmo, ancòra ‘na vota comme  trecquartista. Galliggiaje ‘nfra ‘e linie, pressaje ‘ncuntinuazzione cu ccegna , dialucaje cu ‘e pponte  e servette a  Lavezzi,  doppo ‘nu granne cagno ‘e passo,  ‘nu pallone valiuso(prezioso) ca ‘o Pocho mettette ‘mporta risulvenno ‘a rencontra!

Cu ‘nu bbellu tiro ‘a luntano ‘mpignaje a Julio Cesar ca ll’ annecaje ‘a rredda. ( da ll’ 88° DOSSENA sv)

LAVEZZI 8 :N’arillo tirato a llucido…. E  che vuó fermà? Manco vattennolo! Facette vení ‘o male ‘e capa nun surtanto a Faraoni ma a tutta ‘a difesa ‘nterista custretta a metterse ‘a scolla ‘nfronte! Finalmente accummencia a vvedé ‘a porta sempe cchiú spisso e cu granna pricisione, dimustranno d’essere overamente sempe cchiú fforte e ppunto ‘e  riferimento ‘e tutta ‘a scuatra. Mo comme a mmo nun se po’ penzà a ‘nu Napule senza d’‘o Pocho. (da ll’ 81° BRITOS 6 Se piazzaje ‘ndifesa dànno  ‘na bbona mana)

CAVANI 6,5: Pe vedé ‘a  primma cunclusiona soja  ‘mporta s’ êtte aspettà ‘a  mez’ora d’ ‘o  primmo tiempo ma ‘a capata ascette fora; ‘e poco, ma ascette! Chiammato a ffà reparto isso sulo doppo ‘a sustituzzione ‘e Lavezzi, avette quacche difficultà a guvernà ‘o pallone, ma nun mullaje maje e spisso se vedette pure ‘ndifesa.Speraje ca signasse, ma ajere nun fuje pussibbile!

All. MAZZARRI 7: Terza vittoria cunzecutiva ‘ncampiunato, eppure  aveva presentato ‘a rencontra comme periculosa;  e ‘mmece tutto jette a cciammiello: scuadra cumpatta, urdinata e ssempe accorta, cu tutto ‘o sforzo fatto durante â semmana   contro ô Chelsea e risultato ‘mpurtante!

L’arbitro BERGONZI 4,5 e ll’aggiu trattato!

È ‘na meza cazetta comme ô riesto ‘e tutte ll’arbitre italiane; facilmente se fa ammagagnà e se porta ancòra appriesso ‘o pisemo  d’ ‘e critiche ca avette p’’e duje ricure (sacrusante, comme po se vedette!) date ô Napule (staggiona 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie e s’appila ‘e rrecchie… Ajere primma ‘e siscà ‘na punizziona a ffavore ‘e Lavezzi sistematicamente mazzuliato dê ‘nteriste ce penzaje seje vote… e ppo nun siscaje; ma ‘o capolavoro ‘o facette quanno annullaje a Campagnaro  ‘a rredda ca fósse stata  d’ ‘a sicurezza, rredda signata dô Toro ‘int’a ‘na ‘mbrugliata sotto porta ‘nterista e isso vedette n’ urzo ‘e cóse (fuorigioco) ca nun steva nè ‘ncielo, nè ‘nterra! Sperammo ca nun ce ‘o mannassero cchiú!

E nchiudimmola cca; se ne parla â prossima vota  speranno ca ‘o Napule nun se sentesse appacato e nun se fermasse… P’ ‘o mumento gudimmoce ‘stu quinto posto.

Si dDi’ vo’ ce sentimmo. Staveti be’

R. Bracale Brak

ilnapolista © riproduzione riservata