Che gudimento a llevarse ‘e pacchere
Che bellu Napule guagliú, che cuntentezza vedé ajere ssera ‘e guagliune cuane scamazzà a ll’Inter(re) doppo dicessett’anne ‘e sufferenze e fetenzie subbíte a san Zziro.. Che gudimento a llevarse ‘e pacchere e soprattutto che granna guzzata (goduria) a vvedé ‘a faccia scura ‘e Ranieri (ca ‘o tengo ‘a paricchio ‘ncopp’a ‘na ponta pecché è rrumano e ppirciò sbruffone e ppo pecché è n’allurdato ecchese juventino…), che guzzata a ssènterlo ‘e allamentarse ‘e ll’arbitro (Dicette Presutto ‘na vota peduno, spetta a ttutte!). Nun ‘a tenevo ‘nfrisco si no êsse spilata ‘na bbutteglia ‘e sciampagna! Grazzie ô mister(ro) e ê guagliune cuane,ma mo mantenimmo ‘a carma e rummanimmo cu ‘e piede ‘nterra! Nun ce facimmo speggisme (illusioni) e nun ce scurdammo ca ‘o campiunato è lluogo e chino d’ambusce (pieno di insidie). Comme diceva Bettina ‘a rossa d’’o Chiatamone: ‘E cunte se fanno sott’ ô lampione. Arricurdammuncello! Jucammo ‘ncopp’ a ttre fruntiere . Sperammo ca a Ggennajo chi de duvere facesse ‘o sforzo ‘e accattà ‘nu paro ‘e rinforze ca ce vonno, soprattutto ‘nu bbuonu sostituto ‘e Cavani…; ma mo nun penzammp a ‘sti malincunie. Gudimmoce ‘sta granna vittoria e ggrazie ancòra a ttutt’ ‘a squatra luvarda!
Venimmo ê ppaggelle:
DE SANCTIS 6. – ‘Na sola esitazzione (sbavatura), ô primmo tempo, quanno respingette ‘na meza chiaveca ‘nu pallone ca Pazzini menaje dinto, ma stanno ‘nfora juoco e Rocchi annullaje!
CAMPAGNARO 8. – Nun me fa maje truvà busciardo: chisto è ‘nu granne jucatore e ajere ssera Ademàsso (oltre) d’ ‘a redda,facette na prestazzione retissanta(clamorosa).’Ntribbuna nce steva pure Prandelli…, ma sperammo ca nun ‘o chiamma; si ‘o Toro se fa male jucanno cu ‘a nazziunale ‘o Napule è ffuttuto!
CANNAVARO 6,5. – ‘O miraculo, ‘o miraculo, ‘o miraculo! Forze pecché ce steva ‘o frate ‘ntribbuna e ‘o capitano vulette fà bbella fijura, forze pecché Pazzini nun steva ‘nforma,cert’è ca ‘o capitano lle mettette ‘a musarola e riuscette a ccunvincere pure a mme ca (se sape) nun ‘o stimo.
ARONICA 6,5. – Ormaje Totò nun è cchiú ‘na surpresa; pare ‘e vedé ‘a stessa situazziona sperimentata cu Grava… E ddicere ca ‘o vulevano jettà!…
(A ll’87°FERNANDEZ 6. ‘e stima.)
ZUNIGA 5,5. – Me fósse piaciuto metterle ‘nu voto aveto, ma ‘a redda ca se magnaje a pporta spalancata nun ce ‘a pozzo perdunà!
INLER 7. – Se piazzaje annte â difesa e ffuje ‘nu muro. Mazzarri cuntaje assaje ‘ncopp’ a isso e ‘o turco napulitano nun ‘o deludette.
GARGANO 7. – Uragano sette-purmune o ‘o moto perpetuo. Ah si tenesse ‘o tiro bbuono!
MAGGIO 8,5. – E ddicere ca rientrava ‘a n’accidente (infortunio). ‘A curzia ‘e dritta d’ ‘o Meazza fuje ‘e proprietà ssoja e ô mumento adatto s’ammuccaje a ccentro pe mettere ‘a siconna purpetta dint’â saggena ‘e Julio Cesar
Prandelli se cucculaje ‘a luntano ll’esterno cuano.
HAMSIK 7-. – Sbagliaje ‘o ricore pure pecché chella vecchia vorpa ‘e Julio Cesar se muvette primma ,ma servette n’aiúda spettaculare a Zzuniga, tenette palla pe fà rispirà ‘a squatra e ammenestaje ‘a terza purpetta, chella ca ‘nchiudette ‘e juoche.
PANDEV 5,5 – ‘Nu paro d’ jerre (di errori) tosche (grossolani).Fóss’ora ca se decidesse a truvà ‘na forma decente ca p’ ‘o mumento sta deludenno ‘e tifuse cuane!
(Ô 51° MASCARA 6+. – Trasette bbuono ‘mpartita mustranno grannna vuluntà ‘e mettersi a disposizzione d’ ‘a squatra.
LAVEZZI 7,5 – È isso ca facette cagnà marcia â squatra. Nun è ancòra a ll’ arribba, ma avastaje isso sulo a mmannà ô manicomio ‘a difesa ‘nterista. Ll’ aiúda pe Marekiaro fuje ‘na maggia.(ô 79° CHAVEZ s.v.)
MAZZARRI 8 – Auguri mister(ro) e nun sulo p’ ‘e cinquant’anne; chesta vittoria ca aspettavamo ‘a dicessette anne è mmeritata assaje; certo nisciuno me po’ fà scurdà ll’orrore ‘e Verona, ma maje me pozzo scurdà ‘o scialo d’ ajere a ssera ô Meazza…
arbitro ROCCHI 4,5 – E nno pecché ce avesse trattato malamente… anze! ‘Sta meza cazetta, cummerciante (ma nun se sape ‘e che…) fiurentino ca ati vvote (sempe a san Zziro, ma cu ‘o Milan(no))aveva spezzato ‘e passe napulitane, ajere pavaje ‘o debbeto ca teneva cu nnuje e fuje ‘e maneca larga dànnoce ‘nu ricore ca facette ‘ncazzà a Rranieri; ma meglio accussí: (Dicette Presutto ‘na vota peduno, spetta a ttutte!).
‘Ncuncrusione, ajere ‘a jurnata nun puteva ferní meglio ca vedenno ‘a faccia ‘e cestunia ‘e Ranieri e de Moratti ca tenevano ‘o vveleno ‘mpont’ô musso…. E ffósse sempe accussí!Facimmo corna e sperammo ca stasera(2/10) ‘a juventussa nun facesse cchiú ‘e ‘nu punto cu ‘o Milan(no)! Si ‘o Signore ce ‘o fa vedé ce sentimmo ‘a vota prossima!
Bbona salute!
R.Bracale Brak