Tenco ‘o bbeleno ‘mpont’ô musso guagliú. ‘O Napule ajere jette a Llecce e i’ me credevo ca fosse turnato cu ttre ppunte… Addó?! Ggià doppo d’’o primmo tempo êtte ‘a cagnà idea e accummincià a penzà ca fósse stato bbuono accuntentarse d’ ‘o quarto ‘e bbullito (‘nu punto ciovè) pure si pe tarantiello ce fósse attuccata zizza ‘e vacca (ammunizzione e cacciata fora ‘e coccheduno ‘a scuntà po cu ll’Interre…).Ma jette pejo: addirittura se perdette e ‘o risultato ‘o prevedette pure cu ‘e nummere. E quanno trasette Chevantonno m’aspettaje ‘a ‘nu mumento a ll’ato ca signasse ‘o gollo d’ ‘o doje a uno. Nun me sbagliaje; se sape ca â fine d’ ‘o campiunato cierti favore se fanno pe norma e regula, nun ce sta ‘a farse maraviglie. M’accurgette ca coccosa nun ghieva p’ ‘o verzo sujo ggià dô primmo tempo: ‘e cuane napulitane (gli azzurri partenopei) ggiravano a vvacante aizanno póvera e ppo stevano stranamente troppo nervuse comme si tenessero ‘o mariuolo ‘ncuorpo… Mazzarri pe parta soja faceva avvedé ca ‘o fatto nun era d’ ‘o sujo, bbeveva e fumava futtennose d’ ‘a partita; ‘nzomma se tuccava cu ‘a mana ca sotto nce steva ‘na pastetta, ma mo nun me venite a ddimannà urganizzata ‘a chi, ca nun ‘o ssaccio; chello ca saccio ca s’aunette ‘a funicella corta e ‘o strummolo tiriteppo (‘a squatra ca aveva e vuleva perdere, ‘o misterro ca ggià aveva fatto ‘e bbalice pe se nne jí a Torino, sponna janca e nnera (addó pare ca se carreja appriesso p’ accummincià Aronica, Gargano e Pazienza destinate a ffà panca) e ll’arbitro ca metteva ‘a terza dô puntone…
Ditto chesto, cunzentiteme ‘e fà quacche cunziderazzione ‘ncopp’ê jucature e ‘ncopp’ô misterro.
Cavani ggià ‘a quacche ghiurnata gira a vvacante e ato nun fa ca (spisso però a rraggione) prutestà nervosamente e inutilmente, tanto ca ajere s’ammeretaje n’ata apòstraca (espulsione) cu relativa squalifica e addio ô suonno ‘e capocannoniere. Chill’inutila smarrunata (fallo) ‘ncopp’ô difenzore leccese, smarrunata ca ll’à fatto abbuscà ‘o siconno cartellino jalizzo è sintumatico ‘e comme sta miso cu ‘o fisico e cu ‘e cerevelle…. Peccato, pecch è stato maiateco (grandissimo) fino a poche semmane fa.
Lavezzi nun riesce cchiú nemmeno a zzumpà ll’ommo e nun à ancòra capito ca ‘o tiro ‘mporta nun è articulo suĵo. Maggio e Dossena songo stanche e ppe nniente dunate (incisivi). Aronica e Culo’echiummo cunfermano ca cchiú ‘e chellu ppoco ca fanno nun sanno e nun ponno fà.
Tutte ll’ate oramaje stanno a ccurto ‘e sciato, chi cchiú, chi meno.
Mazzarri: ‘na delusione! E ppo ve dico. Turnammo â partita d’ajere.Che peccato guagliú, che peccato! I’ ‘ngenuamente me credevo ca ‘o palazzo ce facesse fà ‘o spezziale ‘e pigliarce a Llecce ‘nu punto p’arrivà tranquillamente ‘nCiampionsa…. Addó?! Me sbagliaje… ‘O Napule dà ‘mpiccio e lle s’êva spezzarle ‘e passe. E mmannajeno ‘nu mammasantissima spicializzato: ‘o signor Valeri ‘nu sischetto rumano ca ati vvote êva purtato bbuono ô Napule e pirciò nun puteva fà suspettà ‘o trave ‘e fuoco! Ca ‘mmece ce facette, accurdanno ‘nu ricore inesistente ô Lecce e ppo ve spieco e dispenzanno cartelline jalizze e rrusse ca ce custajeno caro e amaro. Tutto chesto naturalmente pe tarantiello d’ ‘a pastetta ca vv’aggiu ditto. Passammo ê ppaggelle:
DE SANCTIS: 5. Durante ô primmo tempo nun tenette quase niente ‘a fà eppure truvaje ‘a manera ‘e sbaglià ‘e rilance. Nisciuna respunzabbilità p’ ‘o ricore ‘e Corvia tirato forte e dritto a ll’incrocio,e ccomme ce arrive? Ma ‘ncopp’â bbotta ‘e Chevantonno rummanette fermo a gguardà; êsse pututo tentà coccosa, ma êva sapé d’ ‘a pastetta pe ccuje se stette fermo.
CAMPAGNARO: 5,5. Bbona ‘a cunsistenza difenziva, ma ‘nfase ‘e smestuta (spinta) perdette spisso cuncentrazzione e pusizzione: monèido (ingenuo) quanno ritardaje ‘o rientro pe fermarse a prutestà inutilmente cu ‘o guardalinie. Scadente (grossolano), ma no faltosa (ma non fallosa) ‘a trasuta in aria ca ll’arbitro liggette pe ricore. Ô finale se vuttaje annante cu mecaloprepéia (con generosità) ma inutilmente
CANNAVARO: 4,5. Suffrette l’energia (il dinamismo) ‘e Corvia e fuje troppo bradíco (lento) dinto a ll’anticipe, ‘e radduppie e sbagliaje ‘a lettura ‘e ll’ inzerimente. Partita ‘nzufficiente e cartellino jalizzo pe pruteste inutile.
ARONICA: 5. Dossena fuje spisso ‘nritardo a turnà arreto (nel ripiegamento) e ‘o siciliano fuje custretto a ffà ‘e straurdinarie, ma nun saccio cu cquanta bbona vuluntà visto ca smalizziato e scafato comm’è sapeva bbuono a che se jeva a fferní
MAGGIO: 5-. Comme aggiu già ditto, ‘o guaglione è arrivato â frutta eô desserto; se so’ scarrecate ‘e bbatteriere e nun tène cchiú energia ‘ncuorpo Nun riuscette maje a ffà ‘nu crosso decente o a zzumpà ll’avverzario; quase inesistente ‘e tagli suĵe comme attaccante agghiuntato. Pe gghionta ‘e ruotolo ‘o vattettero sistematicamente e ll’arbitro zitto!
GARGANO: 5. ‘Nu poco meglio ‘e ll’urdeme asciute, ma po capette ‘a museca e dint’â ‘mbrugliata ggenerale pur’isso perdette ‘a tramuntana.
YEBDA: 5,5. Partette bastamente bbuono cu ‘nu sustanziuso taglie e ccuse po, passanno ‘e minute minuti, s’ammusciaje ‘o bbattaglione, nun trovaje cchiú ‘o capo d’ ‘a matassa, perdette colpe e ‘e mmesure juste.
(Dô 62° MASCARA: 6,5. Ll’unico ca nun ll’aggarbaje ‘a pastetta e trasenno pigliaje ‘e faccia ‘a partita: ‘nu gollo,acabbature (rifiniture) e viaja (bordata) dâ distanza a ffilo ‘e palo. ‘Ntelligente pure ‘na falta tatteca (un fallo tattico)’ncopp’ a ‘na ràpita repartenza (una veloce ripartenza) d’ ‘o Lecce p’ ‘e vvie centrale. Â fine mancaje pe ‘nu niente ‘a cabbesera (la zuccata) ca âsse pututo valé matematicamente ll’enfòche (l’accesso) ê ggirone d’ ‘a Ciampionsa. Ma forze po cumpagne e misterro ll’êssero vattuto, pecché ‘a pastetta è pastetta e va rispettata! Peccato pe ll’ammunizzione: diffidato,zumparrà comme a Cavani ll’urdema ô San Paolo contro a ll’Interre.)
DOSSENA: 5. Pur’ isso stracquo ô pprincipio tentaje ‘e fà quacche cusarella po, passanno ‘e minute, se perdette e aizaje póvera…, nun rientraje cchiú custringenno ê straurdinarie a Aronica ca ‘o facette cu ‘na funa ‘ncanna (di mala voglia )
(62’ Zuniga: 6 +. Manco a isso – penzo – ll’aggarbaje ‘a pastetta e trasette subbeto ‘mpartita cu ‘na proschellata (una pennellata) a ttaglià ll’aria e Mascara se pecipitaje a ttuccà ‘e capa firmanno ‘o mumentaneo pareggio ca ‘e cumpagne poco apprezzajeno).
HAMSIK: 5. ‘N u poco ne vvuleva pe chiammarse fora dô juoco e cumminfatte appena capette comme stevano mise ‘e ccose, sparette quase cumpletamente e nun ce rialaje nemmeno ‘na jucata ‘a tené presente! (‘A ll’85° PAZIENZA:5- Pavaje cu ‘a panca ‘a brutta partita cu ‘o Genoa. Solamente 5 minute e pochi pallune tuccate e malamente.Nun riuscette a chiudere ‘ncuoll’ a Chevantonno. E penzo ca ‘o facette a bbella posta! )
LAVEZZI: 5- Me fósse aspettato da isso ‘na partita commifò, cunfessata e cummunicata (perfetta) pe nchiudere ‘o campiunato cu ‘nu dribblingo ‘ncopp’ê diafòre (sulle polemiche), e ‘mmece il Pocho nun ne ‘ncarraje una assente, e spaisato pe ttutta l’atlossa (la gara).
CAVANI: 4. Tre uccasione ‘e gollo fallite, una addirittura esaggerata e tanto, troppo nerviosisimo (nervosismo) ‘a mariuolo ‘ncuorpo. Primmo cartellino jalizzo pe pruteste però juste, siconno pe falta ‘e vertelugna (fallo di frustrazione): ‘o cartellino russo è ‘a fotò commifò (fotografia perfetta) ‘e ‘na prestazzione serista (di una pessima prestazione).
MAZZARRI: 4. Lassammo perdere ‘o discorzo ‘e pastetta e nun pastetta, ma Il’ atteggiamento suĵo overamente sta facenno ggirà ‘e pparte cchiú dellicate e cchesto nun ggià ‘a ajere,ma ggià ‘a paricchio. Se vede chiaramente ca d’ ‘a squatra nun lle ‘mporta cchiú ‘o riesto ‘e niente comme è dimustrato ca ggià durante â semmana Zuniga e Mascara avevano dimustrato d’ essere ‘mpalla e se fossero mmeretato ‘e jucà ô posto ‘e Maggio e Marekiaro ca ggià jevano a ttre. E ‘mmece Mazzarri à lassato ‘e ccose comme stevano strafuttennose ‘e chello ca succedeva…. ‘Nzomma s’ è dimustrato ‘nu mustòfaro (un mercenario) comme e cchiú ‘e ll’ate ca à ggià fatto ‘e bbalice destinazzione Turino (sponna janca e nnera) e praticamente ggià se nn’è gghiuto! E se nne jesse, se nne jesse…, anze fósse meglio ca De Laurentiis ‘o custringesse a rispettà ‘o cuntratto e ‘o tenesse fermo pe dduje anne mettennolo a scupà ‘nterra dint’ê spogliatoie . Puteva allimmeno starse zitto nfino ô quinnece ‘e maggio! ‘Mmece à vuluto parlà e cu ‘e pparole soje à cumpletamente squilibbrato (totalmente destabilizzato) ‘a squatra e mmo s’à dda sperà sulo ca ll’Udinese non ce leva, a ll’urdimu mumento, ‘a purpetta d’ ‘a qualificazzione diretta ‘a dint’ô piatto. Ma, pe ccomme stanno ‘e ccose (nun me chiammate cestariello e uocchie sicche (menagramo)) ‘a veco tosta, tosta assaje!
L’arbitro VALERI 3 Justa ll’apòstroca (espulsione) ‘e Corvia, assaje justa chella ‘e Cavani,ma inesistente ‘o ricore ‘ncuollo a Olivera,soprattutto tenenno presente ca ll’azzione s’era sviluppata doppo ca ‘nu salentino êva menata ‘a palla fora cu ‘na manata e isso nun sulo nun ll’aveva ammunito, ma aveva assignato ‘a rimessa laterale ô Lecce, facenno ‘ncazzà a Ccavani ca prutestaje malamente e ffuje ammunito; bbona ‘a decisione ‘ncopp’ô gollo ‘e Chevantonno,ma p’ ‘o riesto ‘nu guajo eterno e cumunque siscaje sempe pe partito pigliato, contro ô Napule sventulanno cartelline jalizze e rrusse ca ce custarranno caro e amaro pe ll’urdema partita ô san Paolo.‘Nzomma vriognoso, semplicemente vriognoso l’arbitraggio ‘e ‘stu signor Valeri. Crediteme, tifo p’ ‘o Napule dô 1954, jevo sempe ô statio, mo m’ aggi’ ‘a accuntentarme ‘e vederlo pe televisione e nun è abbitudine mia appellarme pe ll’arbitragge cuntrarie;’o ffacevo sulo quanno ero guagliunciello e ‘e ccose storte me facevano suffrí; mo so’ ppassato ‘e cóveta e nniente cchiú m’êsse ‘a meraviglià, avesse avuto farce ‘o callo a tutte ‘e schifezze…. Eppure no: me sta venenno n’attacco d’urticaria a penzà ca ajere fujeno nuvantacinche minute ‘e priatorio e m’attuccaje ‘e vedé troppi fetenzie: arbitraggio,pastetta e ‘nfamità (tradimento)!
Ce sentimmo. Staveti bbe’
R.Bracale Brak
