Galliani, vicepresidente d’’a Leca Carcio e respunsabbile ‘mprimmese d’ ‘o Milanno,’ntervenuto â Dumneneca Spurtiva, ajere ssera seje ‘e marzo urdinaje: “Qui non si deve parlare di arbitri!!!”. E tutte quante stettero a ssèntere facenno ‘e sí comme a ttanti cacciuttielle ca facevano festa ô padrone lloro, accuvate (riverenti) e murtificati p’esserse permise ‘e penzà ‘e attreví (d’osare) ‘e apprettà (disturbare) ô “Capo”. E accussì, Paola Ferrari jonna jonna, Civoli, Collovati, Cabrini, Zazzaroni, peffino Bbagni, tutte addenucchiate a pparlà ‘e aria fritta; e se capisce: tènono famiglia e s’ ‘ann’ ‘a guardà ‘a castagna pe nun perdere ‘a zuppa data a parassite (ospiti) e cummentature; nisciuno sciataje ‘ncopp’ ê ‘nteressíe (gli scandali) e ‘ncopp’ê riale senzazziunale avute dâ Roma e dô Milanno dinto a ‘na quinnicina ‘e partite (‘na seria straurdinaria ‘e golle signate ‘nfuoriggioco o accumpagnate ‘a falle ‘e mane… , e n’ata seria straurdinaria ‘e fuorigioco ca nun ce stevano, siscati a ll’ avverzarie, ricure-fantaseme accurdate a Rroma e Milanno, ma annijate chilli spappate (evidenti) a ll’ avverzarie ‘e Rosellina Sensi e ‘e Berlusconi.Tutto â faccia ‘e Carciopoli ca nun è mmaje fernuta. Veramente cummovente Rai, Mediaset e parassite lloro minuorchi (loschi)! Che uccasione s’ è perza: se puteva parlà presempio d’ ‘e dduje reculamente d’ ‘o pallone, chillo overo e cchillo appricato a pparte,vota pe vvota surtanto p’ ‘e squatre milanese e pe chella rumana.
Ora mo quaccuno’e ‘sti parassite e cummentature d’ ‘a DS ô lunnerí venono a Nnapule, ê televisione lucale, e continuano a ffà ‘a smatamorfia clamurosa(compiere la clamorosa metamorfosi) fauza e cquóta (ipocrita), piglianno pe cculo Napule e i Napulitane. Se ne mettessero scuorno! Che vriogna!!!
R.Bracale Brak