Ato ca San Paolo
stévamo ô San Carlo

Caro prof.nun so’ d’accordo cu ‘o nove pulitico comme nun fuje d’accordo ‘ncopp’ a ‘o diciotto pulitico, forze pecché fossero 24 o 27 ‘e mie me ll’avette sudà uno ‘nfila a n’ato. A ‘o ssolito cerco uspitalità: Che v’aggi’ ‘a dicere guagliú? Tengo ‘o core dint’ô zzucchero e ‘nu debbeto cu don Carluccio Bellipiere, antico cusetore ‘e famiglia, pe farme allargà tutt’ ‘e vestite. È stata ‘na serata troppo bbella, me so’ divertito assaje e nun ve dico ‘a cuntentezza ‘e sèntere a mio nipote Giulio (diciotto mise) ca se vedette tutt’ ‘a partita e a ogni gollo alluccaje cu mme aizanno ‘e braccelle GOOOOOL! Cheste so’ suddisfazzioni… Puteva essere ‘a serata ‘e Fabbio mmerdarella e ‘mmece fuje ‘a serata ‘e Edinson Cavani: ‘o zengariello nuosto arrunzaje ‘a juventussa, ‘a sutterraje cu tre purpette tre ca ‘o ripurtajeno ‘ntesta â classifica d’ ‘e cannuniere e soprattutto ‘o ‘ncurunajeno definitivamente rre d’ ‘o San Paolo. E ‘o Napule turnaje a ccantà: vattenno ‘a juventussa, ‘e napulitane facettero cu ‘na bbotta ddoje fucetole: ‘o siconno posto ‘nclassifica e ‘na preta ‘ncopp’ ê sufferenze ‘e ggiovedí d’ ‘a Pifania a Milano contro a l’Interre. E vvaje accussí! Che piacere! Ato ca San Paolo; stévamo ô San Carlo: A gentile richiesta, uno d’‘e tre tenure napulitane replicaje ‘a zinfunia d’‘e ttre purpette ‘e ll’anno passato. Maestro cuncertatore e direttore… Mazzarri! Me vedette ‘a partita ‘ncopp’ê frequenze ‘e skysport commentata ‘a duje juventine …… che gudimento senza fine! Siconno lloro Toni (arrivato frisco frisco dint’â juventussa e tesserato p’ ‘a serie: Si nun so’ delinquente nun ‘e ppigliammo…) non aveva fatto fallo ‘ncopp’ô purtiere……..Che facce toste!………Forze era colpa ‘e De Sanctis che era juto a cercà ‘o vraccio ‘e chillu zimmaro ‘e Toni pe sbatterselo ‘nfaccia???? Sgatòffie (ridicoli) e spantecuse (penosi)………..Buono p’ ‘o Napule ca Morganti ‘o siscariello riuscette a cecà bbuono e annullaje ‘o gollo!… Passammo ê ppaggelle: DE SANCTIS: 7,5. Sfoderaje dduje miracule ‘ncopp’ a Amauri e a Ttoni ê mumente cchiú ‘mpurtante d’ ‘a partita. Curaggiuso, attiento e allebbrecante (reattivo) ‘ncopp’ê palle aute e tagliate e‘ncopp’ê punizzione… GRAVA: 7,5 Accumminciaje ‘a partita cu ‘a martellina tirata, arrancanno‘ncopp’ê muvimente p’ anticipà, e ‘ncopp’ê cuntraste, po, pe ggrazzia ‘e dDio, se sciugliette ritruvanno velocità ‘e cosse e pulezzia ’ e ‘ntervento; curiaceo comme m’aspettavo e succedette, jucaje sempe d’anticipo e ô siconno tempo cancellaje cumpletamente a Del Piero, ch’è overamente ‘na puzza sfiatata! CANNAVARO: 6+ Finalmente ‘na partita ‘e culo’echiummo senza fessarie… ‘O capitano se piazzaje ‘ncuollo a cchillu zimmaro ‘e Toni e riuscette a… sterilizzarlo, cumpurtannose comme a ‘nu muro addó rimbalzajeno e tornajeno arreto ‘e tentativi (nun sulo ‘e Toni ma pure ‘e Amauri) ‘e dà sponne ô muvimento d’ ‘a juventussa. ‘E duje lungagnune fujeno custrette a gghí a spennere a ati puteche, ma asciute ‘a vocca d’ ‘o cane fernettero ‘mmocca ê lupe (Grava e Campagnaro). CAMPAGNARO: 7,5 Quanno se trattaje ‘e marcà fuje senza zelle (fu impeccabile) e nun sbagliaje niente e fuje pessino alicante quanno ascette dâ difesa palla ô pere. Secutaje comme a ‘nu cane ‘e presa tutte ll’avante turinesi ca capitavano dê pparte soje e dètte ‘na bbona mana â manovra quanno s’avasciaje a centrocampo. Ma c’ato êsse ‘a fà? MAGGIO: 7. ‘Na vera susta (Un autentico elastico) a ttutta curzia: tuosto ‘ncupertura,schiuppante (esplosivo) quanno affunnje. Truvaje spisso spisso ‘a linia ‘e funno e ‘ncarraje ‘nu granne crosso p’’a capa ‘e Cavani ca mettette dinto ‘o pallone d’ ‘o vantaggio. PAZIENZA: 8. ‘Na bbarriera ‘nsuperabbile pe ttutte ‘e centrocampiste avverzarie. Cummigliaje ‘a difesa e cummannaje ‘e tiempe juste cu pricise sciuchejate (fiondate) quanno s’êtte arapí ‘o juoco pe ll’esterne. Majateco (grandissimo), ato ca cederlo a ggiugno, s’êsse fà ampressa a rinnuvarle ‘o cuntratto… GARGANO: 6+. Accumminciaje pur’isso ‘a partita cu ‘a martellina tirata,sbagliaje cchiú ‘e ‘na vota dint’ â zzona ‘a cchiú periculosa, po (cunzigliato ‘a Mazzarri) se ripigliaje e pe ttutta ‘a partita addiventaje ‘o sciato ‘ncopp’ô cuollo d’ ‘e geometri juventini, facenno ‘a parte mobbile d’ ‘a bbarriera fatta assieme a Pazienza(ca currette ‘e meno, ma raggiunaje ‘e cchiú). Gargano assicuraje filtro, raddoppio e distribuzzione ‘nvelocità. Se mettette a fà ‘a fatica cchiú sporca,facette quacche piccola fessaria, ma – tutto summato – Aquilani e Marchisio rusecajeno ‘nfacci’ô guveto e nun riuscettero a metterlo ‘ndifficultà! DOSSENA: 6,5. ‘O cuntrasto (il duello) cu Krasiccio fuje abbencente e ‘ndiciso. ‘O passo nun è ancòra chillo d’ inizzio staggione, ma ormaje s’è miso ‘ncopp’â strata justa d’ ‘o cumpleto ricupero. ‘A fine d’ ‘o munno e priciso ô mmassimo ‘o crosso miso a ccentro ‘e ll’area juventina p’ ‘o bisso d’ ‘o tiratore scivito ‘e Mazzarri. Dô 68° ARONICA: 6. LL’allenatore ‘o piazzaje ‘ncopp’ a ll’esterna mancina destinannole ‘e spiccià ‘a fase ‘e cuntenimento, e isso facette chello ch’êva ‘a fà cu divozzione e attaccamento, ma assicuraje pure n’ aiuto sustanziuso â mmestuta (alla spinta). HAMSIK: 7- Tanta fatica annascosa ‘e Marekiaro ca assicuraje cunzistenza e ppiso â fase ‘e nun pussesso. Nun è ancòra ‘o jucatore spigliato ca cunuscimmo, ma ‘e truvate ‘mpruvvise e ll’assisto accèuzo (sopraffino) pe Cavani fujeno jucate d’ ‘e tiempe cchiú mmeglie. Se facette apprezzà pure ‘nfase ‘e ricupero. Dô 77° YEBDA: 6. Quanno trasette ‘a partita era oramaje ‘ncanalata ‘ncopp’ê binarie juste e ‘a isso Mazzarri vulette sulo ordine e semplicità dint’â ggestione d’ ‘a palla e ll’algerino l’accontentaje. LAVEZZI: 7-. Accumminciaje a gghiucà assaje tarde, ciovè doppo bbuone vinte minute ‘a ch’era accumminciata ‘a partita, ma po facette spassà ‘a platea accelleranno comme sulo isso sape fà e facenno a spezzatino ‘a retroguardia janconera. Manca ancòra quache cusarella pe ritruvà ‘a forma ‘e quacche tiempo fa, ma ‘a strata pigliata è cchella justa.Êsse pututo cunchiurere ll’azione devastante accumminciata stile slalommo gigante, ma preferette appujà verzo Cavani ca nun se ll’aspettava; peccato, puteva essere ‘o quatto a zzero! CAVANI: 9.Che ato punteggio se po’ dà a ‘nu jucatore ca ‘ncopp’ a cquatto palle bbone avute ne mena dinto tre e ‘a quarta ‘a sbaglia pecché ll’ave quanno meno se ll’aspetta? Ll’ultimo jucatore d’’o Napule a ssignà tre golle â juventussa fuje Careca. Il ‘O Matadorro s’è mmiso ‘ncopp’ â strata bbona pe ffà ‘o ssuoccio d’ ‘o brasilero (per emulare la carriera del brasiliano). ‘Na tripletta memurabbile p’ ‘o zengariello nuosto ca, pe ricordo,comme a ll’ ingresi,se pigliaje ‘o pallone e s’ ‘o purtaje â casa; tre prudezze e tutte ‘e capa ca schiattajeno ‘a juventussa e facettero vení ‘a ‘nzularchia e ‘o mmale ‘e fetaco a tutte ‘e jucature napulitane ca ànnu jucato cu ‘a maglia allurdata janca e nnera e ancòra tifano juventussa (Fabio Cannavaro,Ciro Ferrara e Quagliarella…), o a tutte ‘e napulitane traditure ca s’ ‘a tirano cu ‘a juventussa (e purtroppo ce ne stanno, ce ne stanno!). ‘Ncuntenibbile,granaruto (diabolico)’nfernale (devastante),forzemeglio ‘e sant’Antonio (uomo ovunque), tiratore scivito ‘nfallibbile (cecchino infallibile): ‘nu fuoriclasse cunfessato e cummunicato. Coppole ê denocchie (Standing ovation). ‘A ll’84° SOSA: sv. Pochi minute juste pe tené ‘o pussesso palla e purtà ‘mpuorto tinco-tinco ‘a partita (condurre in scioltezza la gara) dinto a ll’urdimi minute! MAZZARRI: 7,5. ‘O Napule trasette ‘ncampo deciso a ffà capí subbeto â vecchia zoccola janca e nnera, ca ‘o fatto d’ogge (dummeneca) nun era chillo d’ajere (ggioverí d’ ‘a Pifania) e ca fósse stato ‘mpussibbile o quase recogliere punti annante ô pubbrico napulitano.’E guagliune cu ‘a divisa azzurra jucarano a mmemmoria ,appilajeno ogni pertósa, ‘nzerrajeno tutt’ ‘e passagge vulanno cu ll’esterne ‘e dritta e mancina e levannose immediatamente ‘e paccare ‘a faccia doppo d’ ‘a mala notte ‘e Milano.’Ncarraje tutt’ ‘e cagne, tutte atleticamente priparate e cuncentrate ô mmassimo. l’arbitro MORGANTI: 6+ Chistu ‘nfurmatore d’ ‘e miedice (ciovè piazzista ‘e medicine) ’e Ascoli Piceno ati vvote aveva ‘ncruciato ‘o Napule e s’era sempe abbuscato 3,5. Epure ajeressera steva pe succedere: viecchio, granne ,gruosso e gravante, sempe a ccurto d’ussiggeno e de sciato, curricchiaje ‘ncopp’ a ll’ova e cieco e surdo ô primmo tempo facette avvedé ca nun era succieso maje niente…;ô siconno tempo po se pigliaje ‘o ppusilleco (si divertí) affuscanno (agitando) troppi cartelline jalizze.Pe ffurtuna cecaje bbuono a vvedé ca quanno chillu zimmaro ‘e Toni signaje, aveva, cu ‘o vraccio, tentato ‘e scummà a ssanco a De Sanctis, e ll’annullaje ‘o gollo; e ppo sempe ô siconno tempo nun facette ‘o pesce ‘e cannuccia e nun se facette piglià p’ ‘o… naso dê jucature juventini ô ssolito, ‘mbrugliune, viulente, ‘mpruzature e ffigli ‘e ‘ndrocchia accummincianno ‘a Toni ca s’accuvaje ‘nterra e vuleva ‘nu ricore! ‘Mmece ‘o facette e ccomme ll’alleccuto quanno trasette Del Piero ca ‘a chillu granne figlio ‘e coperativa ca è accumminciaje a menarse continuamente ‘nterra (pure si Grava lle diceva dinto a ‘na recchia: Ma che bell’uocchie ca tiene!…) p’avé ‘e punizzione ca Morganti lle dètte sempe! Cchiú ‘ngenerale ‘stu siscariello governaje ‘a partita cchiú cu ‘a mutria (con la grinta) e cu ‘a boona sciorta, ca cu ‘a corza e ll’attenzione. Sarrà pure ‘nternazziunale, ma è n’ arbitro matèleco (pessimo) comme a ttutte ‘e culleghe taliani ‘ncruciati dô Napule; a ccunte fatte, ‘nternazziunale è ssulo n’aggettivo e lle ce vo’ ‘nu sustantivo ca mecco io: fetenzia; ecco: Morganti è ‘na fetenzia ‘nternazziunale! Pe mme ce vonno arbitri prufessionisti e ànn’ ‘a essere tedische o svizzeri! Ma siccomme nun à fatto gruosse ‘mpicce ‘sta vota lle mecco 6+. ‘Ncuncrucusione danno ‘nu sguardo â classifica, ‘o Napule rispetto a ll’anno passato tène sulo tre ppunte ‘e cchiú, però sta piazzato siconno. Si raffruntammo ‘e classifiche ‘e chist’anno e de ll’anno passato, Milanno e Rroma tènono ‘e stesse esatte punte ‘e ll’anno passato. Pure ‘o Palermo (+1) e ‘a juventussa (-3) stanno ‘nlinia cu ll’auto anno. ‘A differenza overa è ca l’interre reggistra tanti e tanti punti ‘nmeno (‘na quinnicina e à dda ricuperà solo ddoje partite (ô massimo seje punte!) Pe ccuje ‘o Milanno, ca pure nun à fatto ‘n campiunato meglio, è primmo! Ergo? Ergo, ll’uccasione è sapurita. Nun vulesse ca ‘nsocietà: Aurelione, Biguncino e cumpagne doppo chesta vittoria dicessero ca ‘o Napule nun accatta ggente ‘e livello pe nun rompere ll’armunia (l’equilibrio) d’ ‘a squatra; fósse ‘na fessaria; s’ànno assolutamente ‘a sostituí quacche pedina: Cannavaro ‘mprimmese, Santacroce (ca nun piace a Mmazzarri), accattà ‘nu centrale, ‘nu terzino mancino, uno putente e priciso a centrocampo, ‘na bbona riserva ‘e Cavani e verificà Lucarelli. Naturalmente ànn’ ‘a essere tutta ggente capace e cu ssette parme, no uggette misteriuse! Â prossima! R.Brak Grazzie assaje.