ilNapolista

Lavezzi ‘nu capitone, Hamsik se sta repiglianno

Ajere ‘a dummeneca nun era accumminciata bbona cu ‘a vittoria ‘e mazzo d’ ‘a juventussa contro ô Ggenoa e cu cchella d’ ‘a Roma contro a ll’Udinese, ma pe furtuna nosta ‘a jurnata se nchiudette bbona quanno sotto ô patapato ‘e ll’acqua, ô San Paolo ‘nu Napule cuncreto e acetuso (cinico) castigaje ‘nu Bologna troppo liggiero e sbariuso (disattento)piazzannose ô terzo posto ‘nsulitaria,’a cuollo â juventussa, â Roma e addirittura a ll’ Interra verola (vedova) ‘e Murigno. E sperammo ‘e nun fermarce lla!
Passammo ê ppaggelle:
DE SANCTIS 6,5: Nun fuje maje ‘mpignato pe tutto ‘o primmo tempo facennose ‘nu purpetiello sotto a ll’acqua senza ‘mbrello; po ô siconno tempo s’êtte ‘a zuzzià ‘e guante , facennose truvà attiento e cuncentrato ‘ncopp’ô tiro ‘e Siligardi; p’ ‘o riesto d’‘a serata nun s’êtte spremmere cchiú ‘e tanto!
SANTACROCE 6,5: Mazzarri andivinaje tutto cosa a farlo jucà ô posto ‘e Grava e ‘o guaglione, finalmente!, doppo d’ ‘a ggià bbona prestazzione ‘e Cagliari, lle cunfermaje ca po’ tturnà a essere chillu difenzore apprezzato a Nnapule durante â primma annata all’ombra d’ ‘o Vesuvio.
CANNAVARO sv, ma 3.5 ‘e stima: nun sape jucà a ppallone e nun se sape manco pruteggere; pe ffurtuna nosta se facette male praticamente subbeto e a ppe isso (da solo) e Mazzatrri ll’’êtte ‘a levà!
CAMPAGNARO 7+: Ô ssolito fuje ‘o Beckenbauerro d’ ‘o Napule.’Ndifesa praticamente ‘nsuperabbile spisso spisso ‘mmertecaje (ribaltò) ll’azzione ripartenno palla ô pede.
Trasette pure dinto a ll’azzione d’ ‘o tre a zzero!
MAGGIO 6,5: Forze, pe ffurtuna d’ ‘o Napule, nun tene cchiú prubbleme cu ‘a mugliera e s’è acchianato cu ‘a capa. Cert’è ca ‘o primmo gollo levantino (veloce) fatto a ll’inizzio ll’ ajutaje psicologicamente, e finalmente riuscette a gghiucà quase comme pe ll’anne passate.
GARGANO 6,5: Parette ca ll’avesse muzzecato ‘nu pappamosca velenuso( una tarantola), luttaje e combattette nfino ô stracquamiento (allo sfinimento) contro ê centrocampisti murtadellare…
PAZIENZA 7: Ô ssolito fuje ‘o geometra d’ ‘o centrocampo cu rriga cumpasso, livella e squatretta e se facette sèntere ‘nfase ‘e ‘mpiedeco (d’interdizione). ‘Mpurtante l’assisto p’ ‘o siconno gollo ‘e Marechiaro.
DOSSENA 5,5: Cuonce cuonce, cu ‘o siddivò e ssenza pressa se sta repiglianno pure si nun fuje ancòra ô ciento pe cciento, tanto è vvero ca se facette anticipà ‘e capa ‘a Meggiorini dinto a ll’ uccasione d’ ‘o gollo d’ ‘e murtadelle.
HAMSIK 7,5: Pure isso se sta repiglianno e migliuraje ‘a partecipazzione soja â fase ‘e manovra, ma soprattutto fujeno fundamentale ‘e duje golle ca facette!
LAVEZZI 7+: facette perdere ‘e ccerevelle ê difenzure d’ ‘o Bologna,ca pe fermarlo avessero sulo avuto ‘a mettere ‘o ssale ‘ncopp’â coda: n’anguilla, ‘nu capitone! Dimostraje pure ajeressera d’essere ll’autentico capaddurece (leader) ‘e chistu Napule!
CAVANI 6,5: È isso, è isso l’attaccante ca mancava ô Napule ‘a anne. Pure quanno, comme ajere, nun è dint’â meglia serata, riuscette a ddà ‘na cianfata decisiva proprio ô mumento ca ‘o Bbologna vuleva pruvà a arapí n’ata vota ‘a partita!
CRIBARI 6:è ‘nu signore difenzore (assaje meglio ‘e culo’echiummo-cannavaro); ajere trasette cu ‘a squatra ggià ‘nvantaggio e cuntrullaje senza troppi prubbleme ‘e scarze (rare) surtite ‘e ll’avante murtadellare.
SOSA 6: Putesse fà ‘e cchiú e si Mazzarri ‘o trova ‘nu posto avimmo a cche vedé! Ajere fuje bbello l’assisto a Cavani, e poco ato….
MAIELLO 6: ‘O criaturo ‘a tene ‘a perzunalità e riuscette pure a dimostrarlo dint’ê pochi minuti a disposizzione… Turnarrà utile, peccato ch’è liggiero assaje!
MAZZARRI 6- : Sotto a ll’acqua lle se schiarettero ‘e cerevelle e nun facette ‘a fessaria ‘e sette juorne primma:ajere se fidaje ‘e Santacroce.’Ncarraje pure tenenno ‘ncampo a Maggio e a Marekiaro cu ttutte ll’urdeme partite deludenti, ma ô posto ‘e Dossena avesse fatto jucà a Vvitale!
Gervasoni 6: St’arbitro mantuvano era sbarcato a Nnapule purtannose ‘a nnummenata ca lle feteva ‘o naso (era irascibile) e teneva sempe a mmanese ‘o cartellino jalizzo (giallo), ma ajere nun se vedette e sentette giacché pe‘na partita comme a cchella d’ajere cu ‘o risultato maje ‘ndiscussione s’êsse pututo pure fà a mmeno ‘e ll’arbitro!
Ce sentimmo!
Brak

ilnapolista © riproduzione riservata