Simmo riuscite a ce levà ‘a jastemma ‘a cuollo

Êv’ ‘a succedere ‘na bbona vota! E finalmente è ssucciesso: ce simmo riuscite a ce levà ‘a jastemma ‘a cuollo! Ce ll’âmmo fatta! Non ne putévamo proprio cchiú ‘e Totti, Sensi, Ranieri e cumpagnia cantante. Nun se ne puteva proprio cchiú d’ ‘a presumenzia lloro, ‘e ll’ufanità ‘e senterse superiori a nnuje e de puterce fà ‘nzogna e ppummarole quanno e ccomme credevano…; finalmente ‘e capepurpe(sbruffoni) gialle e rrusse, ànn’ ‘a avut’ ‘a pusà ô san Paolo ‘e tre ppunte e se ne songo turnate â casa cu ‘na mano annante e n’ata arreto! Che cuntentezza! Erano troppi anni ca non succedeva….e finalmente è succieso e âmmo stutato tutt’ ‘o sfarzetto (arroganza) ‘e Ranieri e soci e ce stammo alliccanno ‘e ddete vedenno ca nuje stammo a dduje punte dô paraviso a pparo a pparo cu ll’Interre e ‘o Milanno e lloro stanno lla bbascio a ‘nu passo dô ‘nfierno!… E mmo sotto a chi tocca accummincianno fra quinnece juorne a Catania!
Vedimmo ‘e ppaggelle meje; putesse mettere 7 a tutte quante visto comm’è gghiuta, ma nun me pare justo.
DE SANCTIS 6 ‘e stima Non fuje maje seriamente ‘mpignato ‘a nisciuno d’ ‘a Roma, ch’ è veramente poca cosa…Me parette però – pe comme se muvette – ca avesse sfunnacato (smaltito) ‘a scigna (la sbornia) d’ ‘a partita cu ‘e rumene e me parette ca avesse ritruvato ‘mparte ‘a sicurezza accussí ‘mpurtante pe ttutto ‘o pacchetto arretrato. Fosse ca fosse riturnato ‘o pirata ca ce serve? Spero proprio ‘e sí; n’ aspetto ‘a cunferma a Catania!
CAMPAGNARO 6,5 ‘A partita nun lle cnsentette assaje molta libbertà ‘e sganciamento, ma mantenette ‘a zzona soja cu ‘a nicessaria cuncentrazzione, fermezza (determinazione) e prestiggio (carisma). Dâ parta soja,ajere fuje overamente difficile passà. Ll’unica vota ca lle riuscette ‘e se sgancià custringette a Juanne a ffà ll’autogollo ca dètte ‘a sicurezza d’ ‘a vittoria napulitana. Cumplimente!
SOSA s. v. Trasette all’urdemo a ttutto, pe mantenere ‘a palla, ma ggiraje a vvacante, senza tuccarla maje!
CANNAVARO 6 ‘e stima Overo ca ‘a Roma d’ajere fuje poca cosa, ma cumunque culo’echiummo-cannavaro ajere nun facette danne e cchesto è ttanto pe uno comme a isso ca nun sape ched’ è ‘o pallone; Borriello primma e Vucinic doppo ,ca se diceva fosserro assaje ‘nforma dinto a chistu periodo ,avessero avuto ‘a essere dduje accunte (clienti) overamente tuoste, ma ajere aizajeno póvera tutte e dduje e ‘o capitano nuosto avette, pe ggrazzia ‘e Ddio vita facile mustrannose cchiú concentrato d’ ati vvote!
ARONICA 7 Forze ‘o turno ‘e riposo lle ggiuvaje assaje, e difatte ne risentette pusitivamente tutta ‘a difesa.Cierti vvote facette addirittura ‘a parte d’ ‘o palo ‘e fierro e chi ‘o cauciava se struppiava isso! Ô siconno tempo spisso spisso ‘o vedette rinfurzà, cunvinto ‘e chello ca puteva fà, ‘o settore mancino quanno s’attaccava… Utilissimo!
MAGGIO 4,5 Nun me piacette nè ‘ndifesa, nè quanno s’attaccava: tène ‘e ccosce mosce e se vedette… Ddoje songo ‘e ccose: o ‘o matrimmonio nun le porta bbuono o doppo quatto mise sta ancòra troppo arzillo e ‘a spusina ‘o fa arrivà ‘ncampo spumpato…
GARGANO4,5 Forze sta pavanno ‘o fatto ca praticamente joca sempre, quindi ajere se nutajeno n’ ata vota cchiú ‘e difiette ca tène ca quacche cusarella bbona ca facette.Pe tutto ‘o primmo tempo facette ‘e fuosse ‘mmiez’ ô chirchio d’ ‘o centrocampo. S’avesse arrepusà ‘nu poco; sperammo ca ‘a sosta le servarrà; pe comme ‘a veco i’ isso è ‘mpurtantissimo p’ ‘a linea mediana nosta,tuosto e tignuso comm’è quanno sta bbuono. Aspettàmmelo!
YEBDA 5,5 Ll’uggetto misteriuso sta accummincianno a ffà vedé coccosa…Menu male! è overo ca ajere trasette ô posto ‘e Gargano e nun ce vuleva assaje p’esserne meglio, ma cumunque ll’algerino ajere nun sfiguraje, anze accumminciaje pusitivamente a ffà sèntere ‘a presenza soja!… Me fa piacere! Vuò vedé ca nun è stato n’acquisto troppo sballato?’O giuvinotto è ttuosto e tenace: nun po’ essere ‘o sostituto ‘e Marekiaro, ma ‘e Gargano sí!
PAZIENZA 7+ Non se facette nutà camme a ati vvote, ma zittu zitto facette tutto chello ca aveva fà e pure ‘e cchiú tenenno presente ca Gargano quase nun ce stette. Nun ce scurdammo po ca ajere Pazienza come in’ altre occasioni ma, di fronte oggi aveva a cche ffà cu De Rossi e Pizarro, ca nun songo proprio gll’urdeme arrivate ultimi arrivati. ‘O senzo d’ ‘a pusizzione e ‘e geometrie pricise so’ ‘a granne dote ‘e ‘stu jucatore ca ce sta sempe e ce se po’ sempe fà affidamento! Pe mme è fundamentale.
DOSSENA 6,5 Finalmente ‘nu vero rappresentante d’ ‘o ruolo d’ esterno cu ‘a maglia azzurra. Fuje n’autentica spina chiantata dint’ ô scianco d’ ‘e rumaniste.. Riuscesse a tirà ‘mporta meglio…
HAMSIK 7-: Quanno partette ‘nfra ‘e llinee d’ ‘e mediane rumaniste nun ‘o putettero fermà. Cu ttutto ca nun ce stevano assaje spazzie ô momento ca servette sapette vení fora e sfruttanno ‘na granne finta ‘e Cavani ca lle spalancaje ‘a porta, signaje ‘o primmo gollo… Peccato ca primma se nn’era magnato n’ato tiranno ‘mbracci’ô purtiere! Ciert’uccasione nun s’ànn’ ‘a sbagglià!
LAVEZZI 7,5: Ajere ‘o meglio d’ ‘o mazzo. Quanno doppo ‘nu primmo tempo sunnacchiuso, ‘o Napule se scetaje fuje isso ca sunaje ‘a carica: ‘ncopp’â fascia mancina fuje addirittura devastante. Cancellaje sia a Cicinho ca a Cassetti ca nun riescettero a frenarlo, nè cu ‘e bbone, nè cu ‘e ttriste. Praticamente ‘o primmo gollo ‘o facette isso!
CAVANI 6,5: M’aspettavo ‘nu poco ‘e cchiú: ‘o guaglione m’à abbituato malamente; pure ajere fuje sempe pronto a culpí, soprattutto ‘ncontropiede, ma ‘sta vota fuje meno stralucente (brillante) d’’o ssolito e sprecaje n’uccasione d’oro.

ZUNIGA s.v. ‘Ncampo pe pocu tiempo nun accusaje nè ccuntaje!

MAZZARRI 7 Chistu Napule tène carattere e cchesto ggià ‘o ssapévamo. Chist’anno però, cchiú lla d’ ‘o carattere, pare ca tène pure coccos’ato. Nun voglio farme diebbete cu ‘a vocca: aspettammo, senza sbalanzarce assaje!
Brak

ilnapolista © riproduzione riservata