Sto’ ‘ntussecato! Nun ll’avesse maje creduto

Sto’ ‘ntussecato! Nun ll’avesse maje creduto ca a Germania jettasse fora a ll’Argentina…. e mmaje avesse creduto ca po vincesse addirittura  pe cquatto a zzero!E tutto chesto cu tutto ca m’ ‘o sentevo ‘e scennere pe dereto ê rine giacché uno ca cunosco e ca forze è ‘nu poco jettatore m’aveva ditto: “Nun è detto ca ll’Argentina vence!” E ‘o fatto è gghiuto proprio accussí e me dispiace pe Maradona ca – pe ccomme ll’aggiu vist’ i’  – à sbagliato ‘a formazzione e ll’impostazzione d’ ‘a partita. Accumminciammo a ddicere ca nun è pussibbile tené fora ‘nu difenzore comme a Samuèl pe ffà jucà a uno ca se chiamma  ‘O-Samente (pardònne: Osamendi) ca comm’infatte doppo tre mminute ggià aveva fatto ‘a primma grossa strunzata,  quanno ‘ncopp’ a ‘na punizione germanese s’è mmiso a ffà ‘a controfigura ‘e Paolo Cannavaro currenno appriesso a Muller ‘mmece d’ ‘o ‘nticiparlo…. e pe tutt’ ‘o riesto d’ ‘a partita nun nn’à ‘ngarrata meza! e Maradona nn’à cacciato quanno ggià ‘a frettata era stata fatta e nun ce steva cchiú nniente ‘a fà; po Maradona m’avesse sempe ‘a spiecà pecché à lassato â casa jucature comme a  Lavezzi, Cambiasso e Zanetti…e pecché s’è purtato Milito E Palermo e nun ll’à fatte jucà!
Pe cquanto riguarda po ll’impostazione tattica d’ ‘a partita Diego s’avesse vuluto ‘nu poco ammesurà ‘a palla pecché ‘a Ggermania era (e isso ‘o ssapeva) ‘na squatra ggiovane cu ‘na granne difesa, squatra purtata a ffà ‘o contropiede…e a ffà male! E cumminfatte s’è vista comme è ffernuta: quatto a zero!
E mo? Mo spero sulamente ca ‘a Spagna stasera vence contro ‘o Paraguaje e ppo leva ‘e pacchere ‘a faccia a ll’Argentina contro â Ggermania, pecché pe mme si proprio ‘sti mundiale ll’ànno ‘a vencere ‘na squatra europea e nno una sudamericana       è mmeglio si vence ‘a Spagna e nno ll’Olanda o ‘a Germania.
A mmeno che ll’Uruguaje, pe pparta soja, nun facesse ‘nu miraculo. Ve saluto dicennove ca ll’unica cosa ca m’à fatto piacere è stato ca Klose (ca è sempe ‘o centrattacco ca me piacesse p’ ‘o Napule…) à fatto dduje golle! Bbona salute!

Brak

ilnapolista © riproduzione riservata