Napule comme â Spagna
co Blasi e Zalayeta?

Avesse vuluto fà ‘nu cummento all’articule cu ‘e ddichiarazzione d’ ‘o  signurino Dela  ca vede ‘o Napule comme â Spagna; nun aggiu truvato spazzio, pirciò chello ca lle  vulevo dicere lla,  ce ‘o ddico cca ‘a fora mano…
Presidè, Napule comme â Spagna? Seh, seh, n’atu vullo e ppo se coce!
‘O Napule sarrà comme â Spagna quanno a ccentro d’ ‘a difesa tenarrà a uno comme a Puyol, capace ‘e difennere e gghí a ssignà, e nno a uno ca se chiamma  Paolo Cannavaro ca è nnegato  sia comme a ddifenzore, ca comme a ghiucatore ‘e pallone e ô mmassimo po’ gghí a gghiucà ‘mmiez’ ê bbeduine d’ ‘o deserto assieme a Blasi, a Zalayeta e ô  frato Fabbio Cannavaro! Jammo annanze:
‘O Napule sarrà comme â Spagna quanno ‘mmiez’ ô campo tenarrà a uno comme a Inniesta e nno a ‘nu chianchjere comme a Blasi, ca è capace sulo ‘e fà a mmazzate e ppo nun vede ‘a porta manco si ‘o sparano! ‘O Napule sarrà comme â Spagna quanne annante putarrà tené a  dduje comme Villa e Torrèsso e nun s’avarrà da accuntentà ‘e Quagliarella (ch’è ‘o rre d’ ‘a chiena e d’ ‘a vacante…) e de ‘nu matarazzo ‘e ziccule comme a Zzalayeta!
P’ ‘o mumento, comme stammo mise, Presidè ‘o Napule po’ sulo assumiglià a ll’Italia ‘e Lippi o â… Scafatese, senza offesa  p’ ‘a Scafatese! Si ll’acquiste ca  tanti vvote avite  prummise, presidè, si ll’acquiste songo Santacroce e Ddossena ca ànnu jucato poco e nniente ll’anno passato, o ‘e cavalle ‘e ritorno comme a Bblasi e Zzalayeta i’ ‘a veco nera, nera assaje! Dicimmo pure ca ll’anno ca vène Santacroce e Ddossena farranno cchiú assaje, ma abbastarranno pe sistimà ‘a difesa  e ‘a fascia? E nun crero! Ma ‘o discorzo cchiú sserio è cchillo ‘e Blasi e Zalayeta. Se tratta ‘e cavalle ‘e ritorno;  si ce ll’êvamo levate era pecché nun erano bbuone, mo ched’é? So’ addivintate bbuone tutto ‘nzieme: so’ state miraculate? E ‘a Chi?… Nun è ppussibbile! Nun ce scurdammo ca  Bblasi e Zzalayeta so’ dduje ex-juventini e pirciò so’ dduje allurdate ‘e lebbra comme a tutte chille (‘a fora ‘e Sivori), passate, presente e future c’ànno avuto ‘a faccia tosta ‘e se mettere ‘a maglietta janca e nnera d’ ‘a juventús. Nun so’ bbuone comme nun erano bbuone quanno ‘a juventùs c’ ‘e ddette;(si erano bbuone s’ ‘e teneva e nun c’ ‘e ddeva a nnuje!) E ppo ll’aggiu ditto e ‘o rripeto: so’ dduje allurdate ‘e lebbra juventina ca nun so’ ddegne ‘e se mettere ‘a maglietta d’ ‘o Napule: ‘a cammarejano (la contaminano!) Quanno ce  ll’êvamo levate  pecché nun erano bbuone,  avevo mannato a appiccià ‘na lampa perenne ‘e ringrazziamento a san Gennaro: nun me custringite mo a stutarla! Blasi e Zalayeta? Vedite a cchi âte ‘a darle, ma  nun m’ ‘e facite vedé cchiú, faciteme ‘a carità! E accattàte tre o quatte bbuoni jucature (Bocchetti, Inler, Zuculini e Fred o Klose)pe vedé si ‘o Napule po’ assumiglià ‘nu poco â Spagna! Grazzie assaje.

Raffaele Brak

ilnapolista © riproduzione riservata