O quarto ‘e bullito, guagliú

‘O quarto ‘e bullito, guagliú… ajeressera chesto ce purtajemo â casa: ‘o quarto ‘e bullito! Ajeressera ô san Paolo, ‘o Napule s’êss’ avut’ ‘a vennere pure ll’anema, ma ll’êss’ avut’ ‘a vattere ‘a zoccola janca e nnera (ajere tutta nera) e ‘mmece, ‘mmece sí e nno ‘e cuane pattajeno ‘o fullé accuntentannose d’acqua ca nun leva sete, accuntentannose ‘e rummané a sseje punte dâ rubbentús(sa). E che saciccio, pe nun dicere n’ata cosa! ‘O fatt’è ca sulo nuje aute tifuse vulevamo vencere, ma Wallerettino Mazzarri e ‘e jucature ‘mmiez’ô campo proprio no. A lloro ‘o siconno posto ll’avasta e suverchia e soprattutto ll’avasta a mMazzarri ca cuntinua a pruporre ‘na scuatra ‘mpustata ‘ncopp’ô contropiede ca però doppo appena diece minute ggià sta ‘nzotto ‘e ‘na rredda. ‘O fatt’ è ca Wallerettino Mazzarri nun à capito ancòra ca pe ffà ‘o juoco d’ ‘o contropiede à dda tené ‘na difesa forte assaje,accumincianno dô purtiere ca à dda essere capace ‘e fà miracule[e nun po’ essere De Sanctis], ‘na difesa ca à dda tené ‘a forza ‘e mettere ‘a musarola a chiunque arrivasse dint’â camma ‘e ricore, fósse pure ‘nu terzino delinquente[‘o ddice ‘a faccia soja , no io!] e ffiglio ‘e puttana comm’è Chiellini ca ajeressera, sciso annanze, zumpaje e ppe piglià ‘a palla ‘e capa affunnaje a bBritos ca se facette fà senza darle ‘na capata sott’ ê mmole. No, no! Pe ffà ‘o juoco ca dice Wallerettino Mazzarri ce vo’ ggente cu ll’amice ‘e Maria De Filippo sotto e nno ‘e ddame ‘e carità ca tène ‘o Napule, chelli ddame ca, ajeressera, â primma meza palla arrivata dint’â camma se facetteno fottere! Passammo ê ppaggelle va’:
DE SANCTIS 5,5 Maje ‘nu miraculo è overo? Maje!‘Ncopp’â capata ‘e Chiellini nun ‘a tentaje nemmeno ‘a parata. LLe jette meglio, però a mmazzo, quanno salvaje cu ‘nu vraccio ‘nu tentativo ‘e Vucinic(cio) ch’êsse pututo fà ‘o doje a zzero e nchiudere ‘o fullé. Affetto ‘a guallarite acuta recidivante ô finale, quanno s’êss’ avuto ‘a accellerà, isso rallentaje assaje ‘e subbaste (rilanci) e nun favurette ‘a manovra.
CAMPAGNARO 7 Ll’unico d’ ‘a difesa a salvarse!Durante ô primmo aione fuje chiammato a ‘na granna fatica ‘nfase ‘e puzamiento (spinta) pe sustené ll’azziona ‘e Maggio e pruvà a sfunnà.’Ndifesa nun concedette niente e guvernaje bbuono ‘o pallone nsi’ a ll’urdemo.
CANNAVARO 5,5 Riuscette spisso a anticipà n’accunto periculuso comme a gGiovinco, ma durante ô primmo aione spisso se truvaje fora posizzione quanno ‘a rubbentús(sa). puzaje (spinse) periculosamente.
BRITOS 5 Senza cazzimma e cu ppoca cegna (grinta) ‘ncopp’â rredda juventina se facette fà ‘a Chiellini, pe nun dicere ‘e quacch’atu sfregazzo (sbavatura) ch’êsse pututo custà ‘o dubblato (raddoppio) janco e nniro.
(dô 46° DZEMAILI 4 Trasette sí bbuono dint’ô juoco aizanno spisso ‘a pressione, ma – beneditto ‘o Cielo! – se truvaje ‘mmiez’ê piede – servuto ‘ncopp’a ‘na guantiera d’oro ‘o pallone d’ ‘a vittoria e ‘o fravecaje a llato â via ‘e fora! E va a ffà ‘nu poco cchiú dinto ‘e dinto addó saje tu, guaglió!)
MAGGIO 5,5 A ncora nun ce simmo: riuscette a sfunnà sí e nno ‘nu paro ‘e vote e ssulo a ll’arranqua… Troppo poco pe chello ca putesse fà! Stranamente spisso se sperdette dinto a ‘nu bicchiere d’acqua, pure si ô finale ‘mpignaje a bBuffòn(no).
BEHRAMI 7,5 ‘O meglio sàraco d’ ‘a spasella, addó nun ‘o semmenaste, lla ‘o reculiste;ricuperaje tante ‘e chilli pallune ca ne perdette ‘o cunto e riuscette pure a sustellà (limitare) a pPirlo;pulitelico (prezioso) pure comme urdemu ommo, comme ‘int’ a ll’ accasione ‘e ‘nu periculoso repuzamiento (respinta) centrale ‘e De Sanctis.
INLER 6,5 Croce e delizzia. Accumminciaje malamente, abbuscannose cchiú ‘e ‘nu sisco, quanno sbagliaje ‘nfase ‘e plantamiento (impostazione). Prubbabilmente ‘o peggio d’ ‘e suoje durante ô primmo aione, ma po cu ‘na granna cagliosa ‘a vinte metre, deviata ‘a Bonucci rijalaje ‘o pareggio ê cuane. Nsi’â sostituzziona però facette poco ato. (da ll’83° ARMERO sv)
HAMSIK 5,5 Pe bbona parte d’ ‘o primmo aione aizaje porvera pure si tuccaje paricchi pallune ‘nfase ‘e plantamiento (impostazione), ma nun le riuscette maje ‘e fà male ‘nfra ê linie ‘scarpanno (sgusciando) ê spalle ‘e Pirlo. Ô finale ‘mpignaje a bBuffon e Dzemaili nun riuscette a sfruttà ‘o repuzamiento (respinta) d’ ‘o purtiere!
ZUNIGA 5 Cuncentrato soprattutto ‘nfase difenziva [e sinamparco (tuttavia) se perdette a cChiellini] nun appressuraje (spinse) quase maje comme êss’ avuto ‘a fà, e cchiú ancóra quanno, a ll’arranqua, passata ‘a difesa a cquatto se mettette a ffà ‘o terzino.
PANDEV 5,5 Accumminciaje assaje bbuono, riuscenno a ffà chello ca ll’êva ditto Mazzarri e cioè ‘e mantenere palla pe fà saglí ‘e suoje e isso ‘o facette pure si chilli chianchiere ‘nchiaccate ‘e sossazza(lebbra)janca e nnera ll’abbuffajeno ‘e cauce e ‘o fravecajene ‘e fóte (falli) ca Orsato nun siscaje maje! Accumminciaje assaje bbuono, ma po se ne scennette ‘e posa chiammanose fora dô fullé pe paricchiu tiempo. (dô 66° INSIGNE 6 Trasuto troppo tarde, tuccaje appena ‘nu paro ‘e palloni, ‘mbriacanno cchiú ‘e n’avverzario, ma nun le riuscette però a mmettere dinto â camma quacche pallone ‘nteressante.)
CAVANI 5 Nun è isso; è ‘nu dubblo (sosia), ‘na controfjura. ‘A troppi fullé nun mette cchiú ‘a palla ‘mporta! Nun è isso, o si è isso s’è miso d’accordo cu De Chiacchiaroniis ‘e nun signà pe scadé dô core d’ ‘e tifuse e nun fà succedere ‘o burdello quanno a ggiugno De Chiacchiaroniis s’ ‘o venne, sempe ca nun se l’è ggià vennuto! Ajeressera s’arrennette a cchillu delinquente patentato ‘e Chiellini ca pe fermarlo ausaje ‘e bbone e cchiú spisso ‘e ttriste cumpreso muorze, pizzeche, cauce e ttirate ‘e capille e sistematicamente dint’â camma ‘e ricore ‘o marcaje abbrazzannolo e pigliannolo ê spalle pe canna pe nun farlo zumpà e cchillu scurnacchiato ‘e Orsato nun vedette o vulette nun niente e ‘o lassaje fà ! Ll’arbitro ghittaje ‘o sanco a vedé sulo quanno esasperato dê tanti fóte (falli) subbíte, ‘o zencariello nuosto perdette ‘e staffe e appujaje doce doce ‘nu guveto ‘nfaccia a cchillu ‘nchiaccato ‘e Chiellini [senza schiattarle n’uocchio comme se fósse mmeretato]. E ‘o zencariello nuosto se vedette sventaglià sott’ô naso ‘nu cartellino jalizzo: curnuto e mazziato! Nun è isso, nun è isso eppure sfiuraje ‘a rredda, ‘e capa, ‘ncopp’ a ‘nu cruzzo ‘e Maggio.
MAZZARRI 4 Tutta sfarma (colpa) soja si ‘a scuatra scennette ‘ncampo senza ‘a cegna nicessaria pe sbranà ‘a zoccola janca e nnera; tutta sfarma soja ca lle mancajeno ll’amice ‘e Maria De Filippo pe ffà ‘nu fullé d’ attacco e purtarse â casa ‘e tre ppunte! E menu male ca doppo d’avé pigliato ‘a rredda ‘a scuatra riaggette e Inlèr(ro) ce mettette ‘na pezza, si no i’ nce avesse miso cchiú ppoco. Ô ssolito troppo tardíe (tardivi) ‘e cagne, nè capisco a cche servette passà a cquatto arreto quanno s’êss’ avuto ‘a attaccà pe vencere, soprattutto cunzideranno ca a ll’arranqua ‘e tre centrali cuane spisso fujeno affruntate sortanto ‘a Vuciníc(cio) ca sinamparco (comunque) parteva ‘a luntano.
Arbitro ORSATO 3,5 E ll’aggiu trattato! Chesta meza cazetta teneva cchiú ‘e debbeto cu ‘o Napule e ajeressera, mmece ‘e se ne levà quaccuno, aumentaje ‘a ddosa facennose ‘nzurfà pe tutt’ ‘o fullé ‘a chillu nnacchennello ‘e Pirlo ca nun ‘o mullaje ‘nu mumento e lle cammenaje a ffianco pe tutt’ ‘o campo dicennole chello ca êv’ ‘a fà. E isso ‘o stette a ssèntere siscanno sí e nno tre punizzione p’ ‘o Napule e allimmeno sette vote tante a ffavore d’ ‘a rubbentús(sa) cu tutto ca ‘e piamuntise fujeno tanti chianchiere ca mazzulajeno sistematicamente ‘e nuoste senza ca ll’arbitro vedesse niente e infatti nun vedette pe tutt’ ‘o fullé ca Chiellini ‘o steva facenno martire a cCavani ca se fósse mmeretato ‘nu paro ‘e ricure a ffavore pe tutt’ ‘e trattenute avute dint’â camma ‘e ricore e p’ ‘e tante fute subbíte e mmece Orsato nun c’ ‘e ddétte e ll’ abbarrucaje ‘nu cartellino jalizzo quanno ‘o zencariello perdette ‘a pacienza e riaggette, mentre Chiellini se nn’ascette comme a ccicere ‘ncopp’â cucchiara! Carta canusciuta cuncedette ê cammurriste, delinquente juventine ‘e vattere sistematicamente ê cuane senza mettere lengua e pprima ‘e tirà fora ‘nu cartellino jalizzo ce penzaje mez’ora e ppo… nun ‘o tiraje!
E nchiudimmola cca e pacienza si ce simmo avute ‘a cuntentà ‘e ‘nu punticiello e ringrazziammo ô Cielo visto stammo ancóra ‘e casa ê piane avete e vvisto ca ‘a cuncurrenza nun s’ è fatta ancòra sotto e sperammo ca stasera nisciuno ‘e chille ca ce stanno addereto ghiesse assaje meglio ‘e nuje e ‘mpattasseno pure lloro!
Bbona salute e – si dDi’ vo’ – ce sentimmo n’ata vota!
Staveti be’!
R.Bracale Brak