E sse vincette, se vincette, ma cu troppa parpetazziona

‘Assa fà â Maronna, guagliú! ‘Assa fà â Maronna! Ajere a ll’ora d’ ‘o spasso a fForerotta ‘o Napule scennette ‘ncampo cu ‘a nicessità ‘e vencere a ttutte ‘e coste pe tené luntano ‘o Milàn(no) e ppe tènere ‘o passo d’ ‘a juventus(sa) ca sapàto a ssera era juta a vvencere a bBologna e ssoprattutto pe cercà ‘e nun cuntinuà a sciulià ‘ncopp’â mala scesa addó (da cinche fullé, cu cquatto pareggi e ‘na scunfitta) stevamo sciulianno. E ‘o Ciuccio ce riuscette cu ttutto ca a ffianco d’ ‘o presitente ce steva assettato chillu cestariello ‘e Giggino-uocchie stuorte ca nun saccio che ce vulesse p’ ‘o cunvincere a starsene â casa!
E sse vincette, se vincette, ma cu troppa parpetazziona ‘e core addó, si, una peduno ‘e tre tenure nun se fosseno magnate tre rredde e si chille d’ ‘a difesa,[parlo ‘e Culo’echiummo e D’ ‘o pirata] êsseno fatto ‘o duvere lloro!Dico ca fósse avastato n’aione sulo (‘o primmo) pe risolvere ‘a facenna e metterce dint’â sacca ‘e tre ppunte. E ‘mmece, ‘mmece êttem’ ‘a stà ‘mpreoccupazzione pecché pe ddoje vote ‘o Napule, passato ‘nvantaggio, pe ddoje vote se facette arrivà e pprima ‘e mettere dinto ‘a rredda d’ ‘a vittoria pe ttre a ddoje êttem’ ‘a fà ‘o cuollo luongo nfi’ a ll’ 81°!Ma a ll’abblativo se riuscette a vvencere e cchella d’ajere fuje ‘na vittoria ‘mpurtante assaje e nun tanto pe tentà ‘e jí a acchiappà ‘a juventus(sa), cosa ca nun penzo po’ succedere…, quanto (comme aggiu ditto)pe tené luntane ‘e pretennente ô siconno posto, chillu posto ca – mo comme a mmo – è ‘o mmassimo ca ‘o Ciuccio se po’ permettere allimmeno nfi’ a cquanno nun se decide a cagnà ‘o trainèr(ro), ‘o purtiere e a cCulo’echiummo e fino a cquanno De Chiacchiaroniis nun addeventa (campa, cavallo!) quaccuno dint’ ô Palazzo addó mo vale quanto a ‘o doje ‘e coppe a bbriscula, quanno ‘o triunfo è a mmazze! Passammo ê ppaggelle.
DE SANCTIS 4,5 Nun ce simmo, nun ce simmo! Oramaje nun dà affidamento; ‘ncopp’â primma rredda restaje a gguardà senza ascí e se facette fottere stesso dô cumpagno suĵo ca lle facette n’utobbutto (autogol) ‘a ridere si nun fósse stato ‘a chiagnere; piezzo e ppejo ‘ncopp’ô pareggio ‘e Denís(so) quanno ascette a scampule ‘e mele annurche, senza dicisione e ccegna nicessarie e sse ‘ncasinaje isso e ‘e cumpagne ‘e sezziona.Cu chisto ‘mporta oramaje nun se va a nnisciuna parte!
CAMPAGNARO 6- Da quacche partita è l’unico d’ ‘a sezziona difenziva ca scenne ‘ncampo cu ccegna (grinta) e ccuraggio; eppure ‘ncopp’â rredda ‘e Denís(so) se facette truvà fora pusizione, tanto ‘a custringere a bBehrami a tentà isso , sbaglianno, ‘a chiusura. Ma fuje ll’unica fessaria d’ ‘o Toro. CANNAVARO 3.5 Tanto pe nun cagnà jurnata no d’ ‘o capitano cuano.Apprimma n’utobbutto ridiculo e ppo appesantuto e sufferente ‘e doppia paposcia se ‘ntalliaje facennose fottere ‘a Denís(so) ca s’ ‘o facette ‘nvelocità e signaje ‘o mumentano pareggio, mentre isso penzava ê vvacche ‘mPuglia.Chisto nn’è n’ato ca à dda cagnà assulutamente aria!
GAMBERINI 5 Sballaje cchiú ‘e ‘na chiusura e nun riuscette a ddà chella sicurezza ca deva dint’â primma parte d’ ‘a tempurata… Eppure ‘a primmavera nun è ttrasuta ancòra!(dô 63′ ARMERO 6.5 Trasette súbbeto e bbuono ‘int’ô juoco. Se prupunette ‘ncopp’â curzia ‘e mancina comme sape fà isso e dê piede suĵe nascette ll’ajuda p’ ‘a rredda d’ ‘a vittoria ‘e Pandèv(vo))
MAGGIO 5 Ancòra fora forma; appressuraje poco e mmalamente senza riuscí maje a mmettere ‘mmieze ‘nu cruzzo decente. Êss’ ‘a darse ‘na mossa pecché ‘o stammo aspettanno già ‘a paricchiu tiempo e c’îmmo scucciate d’aspettà ca turnasse a ffà ‘o treno e nno ‘o papunciello. (dô 78′ INSIGNE 6 Trasette a mmestiere ‘int’ô fullé, dannannose e currenno ‘ncopp’a ttutt’ ‘e pallune. Ce pruvaje pure ‘nu paro ‘e vote, ma senza furtuna. )
BEHRAMI 6- Miezu punto mancante p’avé falluta chella chiusura ‘ncopp’a dDenís(so), cosa ca puteva custà caro, ma – p’ ‘o riesto – riuscette sinamparco (comunque) a ddà, pe tutt’ ‘o fullé ‘na mana ‘mpurtante pe cuntènere ll’ avverzarie.Svizzero d’ ‘a Duchesca me facette addecrià quanno ‘mpretto napulitano mannaje a ffà cchiú ddinto ‘e dinto ô prozo a ‘nu paro ‘e delinquente atalantise.
DZEMAILI 6- Miezu punto mancante pure a isso pecché lle mancaje ‘a pricisione, soprattutto sott’â porta, ma se rennette periculuso cchiú ‘e ‘na vota. ‘A jella e ‘a bravura d’ ‘a difesa atalantesa nun lle permettettono ‘e lassà ‘o signo, ma facette ‘nu fullé ‘mpurtante e sustanziuso.
ZUNIGA 7 Cratisto (ottimo) ‘o fullé ‘e Zuzú, ca ô ccuntrario d’ ‘o culleca ‘e ll’ata curzia, appressuraje cu cunvinzione e ddicisione, facenno bbuoni cruzze e crianno cchiú ‘e ‘nu prubblema a ll’atalantise . Se prucuraje ‘o ricore (sacrusanto!) ca sbluccaje ‘a sfita. Aspettammo ca riesce a mmigliurà ‘int’ â fase arretrata, p’addivintà ‘nu jucatore cumpleto e ‘mpurtante…
HAMSIK 6.5 Trasette súbbeto ‘int’ô fullé e ‘sta vota jucaje pe tutt’ ‘e nuvanta minute dâ mità ccampo a ssaglí prupunennose ‘ncontinuazzione e pruvanno spisso ‘a conchiusione e si nun truvaje ‘a rredda fuje sulo pe precipitazzione e p’ ‘a malasciorta ca ll’accumpagnaje. PANDEV 7.5 Se sbluccaje doppo mise ‘e dijuno rijalanno ‘e tre ppunte ê suoje. Ma a pparte chistu particolare,assaje ‘mpurtante, jucaje ‘nu granne fullé e ffuje comme ‘na spina ‘int’ô scianco atalantese e,proprio perché isso se muvette cuntinuamente purtannose appriesso ‘e difenzure, Cavani riuscette a avè tantu spazzio a disposizzione e n’êsse pututo apprufittà ‘e cchiú. Si Pandèv(vo) cuntinua accussí ‘o Napule,po’ avé bboni speranze pe cchello ca à dda vení.(dô 90′ ROLANDO s.v.)
CAVANI 7.5 Ddoje rredde (una cu ‘nu ricore). Riturnato ‘nforma ‘o Zengariello nuosto turnaje a ssignà e a crià pericule p’ ‘e difese avverzarie e ajere êsse pututo signà allimmeno n’ati ttre vvote, ma ‘a cosa ‘mpurtante fuje ca riuscette a scutuliarse ‘a cuollo ‘a parola “crisi” ca ll’aveva arravugliato e aveva fatto spaventà ‘e tifuse cuane.
MAZZARRI 5,5 – Soprattutto p’ ‘e fessarie ditte ‘o juorno primma quanno ll’êsse vuluto dô scartiello ‘e De Chiacchianiis e da ‘e tifuse e p’avé tardato a ffà trasí a Armero. Ajere ‘a scuadra avette ‘na bbona anfocua (un buon approccio), ma, ô ssolito, ‘na vota passata ‘nvantaggio se decuncentraje, concedenno troppo, specie ‘mmiez’ô campo, a ll’Atalanta ca, pure si a mmazzo pariggiaje; a ll’arranqua ‘o Napule cuntinuaje a custruí granni accasioni pe signà, ma culo’echiummo ‘nchietta cu ‘o pirata se facetteno fà ‘a Denís(so) ca mettette ‘a firma sott’ ô siconno ‘scarnio (seconda beffa) d’’a jurnata. Menu male ca ce penzaje Pandèv(vo),cu ll’ajuda (assist) d’ Armero. Proprio chisto dètte n’alternativa ‘e juoco ‘mpurtante furmanno ‘na granna catena ‘e mancina ‘ntandèm(mo) cu Zuniga. lL’avesse fatto trasí primma! Ancòra aggi’ ‘a capí pecché ô finale ne fuje cacciato fora isso e Biguncino.Ma tutto summato meglio accussí: cu Frustalupi ‘mpanca se vence!
arbitro VALERI 5 Justo ‘o ricore siscato a ffavore ‘e Zuniga Ma nun me piace!Niente ‘e particulare, ma ‘stu libbero prufessiunista (ma nun se sape ‘e che…) rumano ca siscaje sempe, pe partito pigliato, contro ô Napule caputianno ‘e ffalte (i falli) nun ce porta bbuono, pure si ajere nun lle riuscette e se limitaje a nun caccià quacche cartellino jalizzo contro ll’atalantise e ppo pe nun fa vedé ne sparagnaje pure quaccuno ê cuane scuntannosela cu Biguncino e mMazzarri! Ma a nnuje ‘sti favure nun ce servono e nun ‘e vulimmo!
E fermammoce cca; è mmeglio ca me stongo zitto, ca si mme scappano ‘e cavalle alliscio quacche ttre pesante.Dummenerca ca vene nun se joca e ppirciò si dDi’ vo’ ce sentimmo a pPasca speranno ca sàpato santo ‘o Napule turnasse a vvencere! Staveti bbe’.
R.Bracale Brak

ilnapolista © riproduzione riservata