E che ne parlammo a ffà, guagliú

E che ne parlammo a ffà, guagliú?! Guagliú tengo ‘o vveleno ‘mpont’ô musso e sto’ ‘ncazzato niro doppo d’ ‘o fullé d’ajere, ca s’êss’ a avuto vencere e ‘mmece fenette cu ‘nu sciuliamazzo ca fuje ‘na cosa ‘a romperse ll’uosso sacro! Ajere continuaje ‘o periodo niro d’ ‘o Napule ca perdenno ô Bentegodi pe ddoje a zzero, perdette ll’urdemu treno d’ ‘o campiunato, ca pe mme fernette ajere e ll’urdeme diece jurnate ca rummano ‘a jucà ponno sulamente peggiorà ‘a situazziona e cchi à visto ‘o fullé m’ à dda dà raggiona datosi ca ‘o Napule fuje assulutamente fora juoco, ‘mprimmose cu ll’uommene simbulo: Marekiaro assente ngiustificato,’nzieme a n’ati tre o quatto, ca po ve dico; pe nun parlà ‘e Cavani ca addirittura sbagliaje ‘nu ricore e restaje ancòra a sicco ‘ncampiunato, addivintanno ‘o sibulo ‘e ‘na scuadra ca nun gira cchiú, ‘na squatra ca nun se putette guardà; tutte bucciate, accummincianno ‘a chille ca ànnu fatto ‘na partita’e scenufreggio (disastrosa) e senza zuco: Cavani,Marekiaro e Inler(ro), tutta ggente ca se chiammaje fora comme si ‘o fatto nun le riguardasse. So’ tutte culpevole ‘e ll’uccasione perza, ma chillo ca tène cchiú sfarma (colpa) è Wallerettino Mazzarri ca n’êsse ‘ngarrata meza: planiamiento (assetto tattico) senza fantasia , maje ‘nu cagno apprupriato a siconna d’ ‘a cundizzione atletica ca si manca perdimmo ‘o 50 pe cciento d’ ‘a forza nosta… Se sapeva ca s’êva jí a cChievo pe vvencere contro a ‘na scuatra ca comme a ll’annata ce avesse miso ‘ndifficultà…; se sapeva e s’ avev’ ‘a ‘nciarmà coccosa presempio accumincianno cu ‘nu quatto, tre, ttre e soprattutto cercanno ‘e nun ghittà ‘e primme quarantacinche minute. E ‘mmece proprio chesto succedette proprio comme ll’urdemi quatto o cinche vote ssempe cu risultate fantanguse (pessimi); Mazzarri nun riuscette maje a cagnà tatticamente ‘a partita ‘ncorza! Ciuccio e presuntuoso ‘nconferenza stampa ‘mmece ‘e fà mea culpa e sbatterse ‘mpietto jette truvanno scescé tiranno ‘mballo ‘e ssolite scuse fésse!A chistu punto forze fósse inutile fà ‘e ppaggelle, ma nun voglio perdere ll’abbitudine:
DE SANCTIS 3,5 È ‘nu guajo passato ormaje! Pigliaje ‘a primma rredda ‘ncopp’ a ‘nu tiro ‘a trentacinche metre, partenno ‘nritardo;’ncopp’ô dubblato d’ ‘o Chievo po facette ‘na papera comica assaje; cumminfatte chillo ‘e Thereau [ca sinamparco steva ‘nnurzo ‘e cóse, ca ll’arbitro nun vedette]cchiú ca ‘nu tiro me parette ‘nu pasiglio ca però passaje sott’â panza e sott’â mana ‘e Morgàn(no). Cose ‘e pazze! E ddicere ca a cchisto ce ll’àmm’ ‘a tené pe n’ati ddoje tempurate!
CAMPAGNARO 5 Tutto summato fuje ‘o meglio d’ ‘a sezziona arretrata. ‘O fatt’è ch’ è isso e nno ll’ate a ttené ‘nu cuntratto ggià firmato cu n’ata suggità…eppure me parette ll’unico ca lle ‘mpurtasse quaccosa lla ddereto!
ROLANDO 4 Me fósse aspettato quaccosa ‘e cchiú, ma nun fuje accussí: troppo braduso (lento) e spisso ‘ntricato (macchinoso). ‘Nfase ‘e réclaggia (impostazione) sbagliaje dicisamente troppo.
GAMBERINI 4,5 Ajere troppo muollo e ssenza cegna; avastaje ‘na spallatella pe spustarlo. Thereau ô pprincipio d’ ‘o fullé facette ‘e pprove generale d’ ‘a rredda liberannose troppo facilmente d’ ‘o difenzore ècchese Fiorentina.Assaje ‘nritardo ‘ncopp’â siconna rredda,facette ‘a damma’e san Bicienzo e lle mancaje a cattiveria nicessaria pe gghiucà dint’ô campiunato ‘e serie A. (dô 46° DZEMAILI 4,5 Riuscette a cumbinà poco e nniente).
MAGGIO 4 ‘O giuvinotto nun è cchiú isso: a ‘stu mumento avasta ‘na seggia, n’albero,’nu scannetiello, ‘na funtanella, ‘na rota ‘e camion(ne), ‘nu rasiero, n’ostàculo qualsiase pe fermarlo. Nun riuscette maje a zzumpà ll’avverzario e cchiú ca ‘nu treno frecciarossa, a ‘stu mumento pare ‘a bonanema d’ ‘o papunciello ‘e piazza Carlo III.
INLER 3 ‘Nu chianto! Forze ‘o peggio ‘ncampo;Chi ‘o vedette? Praticamente nun servette nè ppe ffrijere, nè p’ arrostere, sia ‘nfase ‘e plantamiento (di impostazione) ca ‘nfase ‘e trancara (di contenimento). ( dô 57° Armero 5 Appena appena cchiú mmeglio d’ ‘o cunnazziunale Zuniga, ma nun appicciaje tracche; sulo quacche fitti-fitto!).
BEHRAMI 5 Currette comme ô ssolito cchiú ‘e tutte quante, ma spisso êtt’ ‘a fà ‘e cunte cu ‘a superiorità nummereca d’ ‘e centrocampisti d’ ‘o Chievo. lLe fósse servuta ‘na mana ‘e Inler(ro), ma ‘o cullega nun ce ‘a dètte.
ZUNIGA 4,5 Maje, maje ‘nu scevoscemà (una sovrapposizione). ‘Int’a nuvanta minute pruvaje sí e nno ‘nu tiro ‘mporta, sballannolo e ppo nient’ ato. Troppo poco!. (dô 63°PANDEV 4,5 â fine d’ ‘o fullé se putette ‘nfilà ‘a tuta senza farese ‘a doccia. Aizaje porvera pe ttutto ‘o campo).
HAMSIK 4 Manco isso sêtt’ ‘a fà ‘a doccia. Comme si ‘o fatto nun fósse stato d’ ‘o suĵo se purtaje ‘ngiro ‘a fascia ‘e capitano senza piglià cunto ‘e chello ca succedeva ‘ncampo e ssenza cercà ‘e strascenà ‘e cumpagne, risultanno assente ‘ngiustificato!
INSIGNE 5 Fuje ll’unico ca pruvaje a crià quaccosa, ma a ll’abblativo parette ‘a controfijura d’ ‘o Lorenzigno ‘e quanno jucava a Pescara; sfarma soja o d’Erode Mazzarri?
Cavani 3 Ajere Cavani addivintaje ‘o símbulo d’’a scuatra ca nun gira cchiú.’O zengariello risultaje appannato, anze stutato, pruvaje pochi muvimente, ‘e sòlite, senza però truvà maje ‘nu spunto ‘nteressante. Avette pure ‘nu ricore (sacrusanto!) a ffavore, ma, emuzziunato e sotto pressione pe bbia ca nun signava ‘a paricchio, ‘o sbagliaje tirannolo ‘na fetenzia e ffacenno fà ‘na bbella fijura ô purtiere d’ ‘o Chievo e mettenno ‘nmostra ‘e stà ê verbe difettive p’ ‘a cundizzione psico-fisica. E Mazzarri, ca nun capisce niente, manco se decide a ffarlo accumudà ‘mpanca p’ ‘o bbene suĵo, facenno jucà a cCalaiò (si no che ll’ànn’ accattato a ffà o pe vederlo jucà àmm’ ‘a aspettà ca Cavani se fa male o vene scualificato?!).
ALL. MAZZARRI 3,5 ‘A solita lettura sbagliata d’ ‘o fullé! Chi vo’ puntà ô massimo,scenne ‘ncampo cu ll’idee chiare e cu ‘o sanco a ll’uocchie, cu ‘nu motulo cchiú aggrissivo e prupusitivo e nno cu poche idee, ma paricchio ‘ncasinate comme chelle d’ ‘e cuane viste ajere.E ‘a respunzabbilità è d’ ‘o trainèr(ro), nun ce cuntammo chiacchiere: è isso ca sbaglia a schierà ‘o centrocampo, ca nun se decide a ffà piglià sciato a De Sanctis e a cCavani etc. E isso ca fa ‘e cagne troppo tarde e cu ‘a ggente sbagliata! ‘A scuatra ô primmo aione jucaje senza curaggio e me parette troppo bradosa.Nun sapette leggere ca Cavani steva sotto pressione e emuzziunato e nun avesse tirato bbuono ‘o ricore! arbitro ROCCHI 4 ‘E stima. Poco ‘a dicere ‘a fora ca ajutaje ‘o Napule … p’ ‘a scesa; overo ca ‘nu ricore ce ‘o dètte, ma è ppure overo ca cuncedette ‘o dubblato ô Chievo cu ‘na rredda signata ‘nnurzo ‘e cóse (fuorigioco). Cunchiudenno che putimmo dicere? Ca p’ ‘o Napule ‘o campiunato fernette ajere? ‘Sta vota penzo proprio ‘e sí!E ppure si ‘o campiunato è ancòra luongo cu ‘a scunfitta d’ajere ‘o Napule nun sulo à cunzignato ‘o campiunato â juventús(sa), ma penzo ca sta ‘mpericulo pure ‘e perdere ‘o siconno posto e ppure si Mazzarri cagna mentalità,si ‘e jucature se decideno a ccaccià ll’amice ‘e Maria De Filippo, oramaje è troppo tarde pe qualunqua cosa. Me vulesse sbaglià e sperammo ca me sbaglio e ca ‘nfra ‘na cosa e n’ata riuscesseno a difennerlo ‘o siconno posto; pe vencere ‘o scutetto aspettammo ‘e cagnà allenatore e ddirettore generale e aspettammo ca De Chiacchiaroniis addeventa quaccuno dint’ ô Palazzo. Ca si no levàmmoce ‘stu penziero ‘a capa e nun ce facimmo zimàire (illusioni) inutile!
Staveti bbe’ e si dDi’ vo’ ce sentimmo lunnerí ca vene doppo d’ ‘o fullé cu ll’Atalanta, ma i’, si fósse a De Chiacchiaroniis – dint’â semmanna arunasse a gghiucature, a ddiriggente e a ttrainer(ro) e ‘e purtasse a pPumpeje, a Muntevergene o â Maronna ‘e ll’Arco pe ffarle benedicere ‘a ‘nu monaco o ‘nu prevete pure si nun fósse ricchione!
R.Bracale Brak

ilnapolista © riproduzione riservata