N’ata delusione guagliú ajeressera a Udine

È ‘na jastemma menata, guagliú E ce à cuóvete!N’ata delusione guagliú ajeressera a Udine… Me penzavo ca ‘e guagliune cuane fossero jute a vvencere facennoce scurdà quacche amarezza ‘e campiunato e d’ E/L …. e ‘mmece chi t’ ‘o ddà, chi t’ ‘o ddà! Ajeressera a Udine pure si ‘o Napule facette isso tutt’ ‘a partita e ll’Udinese se difennette sulamente pure a mmuorze, a ccauce, e a ppizzeche, nun riuscettemo a vvencere e ‘o fullé fenette cu ‘nu desulato (squallido) zero a zzero ‘nu poco pecché ll’Udinese facette trancara (muraglia) ‘nnante ô purtiere suĵo,’nu poco pecché a mMazzarri lle mancajeno ll’amice ‘e Maria De Filippo ‘e jucà cchiú spriggiudicato, ‘nu poco pecché Cavani e Marekiaro sbagliajeno ddoje bboni accasione e ‘nu poco pecché chella fetenzia ‘e ll’arbitro Damato nun ce dètte no uno, ma dduje ricure. Cunchiusione? ‘Ncunchiusiuone ‘o Napule perdette n’ata accasione ‘e tenè ‘o passo d’ ‘a juventús(sa) e mmo viernarí ca vene ll’à dda ‘ncuntrà stanno a sseje punte ‘nsotto! È ‘na jastemma menata, guagliú, mannaggia ê cane ‘e canciello! Passammo ê ppaggelle va’:
DE SANCTIS s.v. Maje ‘mpignato seriamente,nun êtte manco pavà ‘o biglietto.
CAMPAGNARO 6+ S’è ggià upuschizzato (promesso) a ll’Inter, ma cuntinua a ghiucà – e assaje bbuono – p’ ‘o Napule, dimustranno granna prufessionalità.
CANNAVARO 5, 5 Avette vita facile ‘ndifesa, ma quanno se trattaje ‘e custruí ‘o juoco aizaje porvera e s’abbuscaje pure ‘nu cartellino jalizzo.(da ll’85° DZEMAILI s.v.)
BRITOS 6,5 Cumplessivamente ‘nu fullé attiento e priciso cumpresa ‘na granna chiusura ‘nvelocità ‘ncopp’ a Di Natale sfujuto a cCannavaro.
MESTO 5 Ô primmo aione riuscette a menà ‘mmiezo quacche cruzzo, purtroppo inutile, ma a ll’arranqua tiraje ‘e rimme a bbuordo e s’assettaje.(da ll’89° ZUNIGA s.v.)
BEHRAMI 5,5 Bbona ‘a ruttura d’ ‘o juoco avverzario, ma lassaje assaje a ddesiderà ‘nfase ‘e repartita (ripartenza).
INLER 5 Cumplessivamente ‘a chietta (coppia) ‘e centrocampisti sguizzeri lla miezo nun suddisfacette. ‘O “Lione” ’e De Chiacchiaroniis troppo spisso e cu risultati scarze tentaje quacche inutila cunchiusione ‘a luntano ca nun preoccupaje maje a pPadelli.
(dô 61° PANDEV 5,5 – Ll’urdema rredda ll’êva signata a ll’annata e pproprio contro a ll’Udinese.Ajeressera sulo quacche bbuonu pasiglio (passaggio) , comme a cchillo ca purtaje Armero a tu pe ttu cu Padelli, ma cumplessivamente nun lle riuscette ‘e dà ‘a sterzata justa ô Napule!)
ARMERO 6,5 – Atalossa attienta e ttutta ‘agnanemità (generosità). Se ‘mpignaje assaje magnannose ‘a curzia soja cu ccegna e sciato; mettette dinto ddoje granni ppalle ca êsseno pututo fruttà ll’uno a zzero, ma nun fujeno sfruttate nisciuna ‘e tutt’ ‘e ddoje: una pe cCavani ca ‘a uttanta centimetro dâ linia ‘e porta se facette anticipà e chell’ata p’ ‘a capa ‘e Marekiaro ca, muollo, muollo ‘a passaje ô purtiere.N’ato arbitro ll’êsse dato ‘nu ricore a ffavore, p’essere stato tirato ‘nterra p’ ‘a maneca dint’â camma ‘e ricore, ma Damato nun ce ‘o dette, anze ll’amunette ‘ngiustamente pe simulazziona.Cose ‘e pazze!
HAMSIK 4,5 Avesse allimmeno jucato diece minute o miso dinto chillu pallone avuto da Armeno! Ma ajeressera Marekiaro, chi sa’ pecché, nun ce stette proprio e me facette magnà ‘a rezza d’ ‘o core!
INSIGNE 5,5 Quacche nummero sulo ô primmo aione quanno fuje vivace e vulenteroso, ma tenette troppo ‘a palla e ‘a ‘ntesa ci cCavani scarsiggiaje. Poco cuncreto.
CAVANI 4,5 Ancòra ‘na vota a ssicco ‘o giuvinotto, ca cchiú ce penzo e cchiú me cunvinco ca nun è ‘o vero Cavani, ma sulo ‘nu dublo, ‘na controfijura: ‘o vero Cavani chillu pallone d’ Armero ll’êsse menato dinto, nun se fósse fatto anticipà. È overo ca Damato nun le dètte ‘nu ricore sacrusanto p’essere stato cauciato e aizato ‘a terra dint’â camma ‘e ricore, ma oramaje è cchiú ‘e ‘nu mese ca ‘o guaglione nun è isso e à perduto ‘o cuntatto cu ‘a rredda. Sperammo ca me sbaglio e ca ‘o guaglione me scunfessasse ô san Paolo â prossima vota contro â juventús(sa), ma pe mmo nun pozzo metterle ‘e cchiú! E me dispiace!
All.MAZZARRI 4,5 Sbracciarse nun servette a nniente! Chella d’ajeressera fuje ’na partita ca s’avesse avuto ’a vencere assolutamente e a isso lle mancaje ‘o curaggio ‘e accummincià ‘o fullé cu ‘o quatto – tre – ttre. È naturalmente, pure si ‘mparte, respunzabbile d’ ‘o calo d’ ‘a scuatra soja dinto a ‘sta fase pre-primmaverile.Troppo teluse (tardivi) ‘e cagne cu zZuniga e Dzemaili; rutto pe rrutto i’, ‘mmece d’ ‘o sguizzero êsse visto meglio a cCalaiò.
arbitro DAMATO 3 Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê jucature ‘e Guidolín(no) e nun vedenno ‘o juoco viulento e pruvucatorio d’ ‘e delinquente cu ‘a maglia janca e nnera; ausaje dduje pise e ddoje mesure; largo ‘e maneca cu ‘e nurdiste e stritto ‘e pietto cu ‘e napulitane comme a cCannavaro ca â primma accasione s’abbuscaje ‘o cartellino jalizzo. M’aspettavo però ‘e peggio ‘a ‘stu barlettano, ca ripeto – comme a ttutte ‘e puglise – quase certamente è tifoso juventino…,e cumminfatte nun me sbagliaje; ‘o nnacchennello ce annijaje no uno, ma dduje ricure comme aggio già ditto!
Cunchiudenno che putimmo dicere? Ca p’ ‘o Napule ‘o campiunato fernette ajere? Gnernò: ‘o campiunato è ancòra luongo e, si Mazzarri cagna mentalità,si ‘e jucature se decideno a ccaccià ll’amice ‘e Maria De Filippo, quaccosa ‘e bbuono ‘o putimmo ancòra fà… pure si i’ nce spero poco (sapenno a mMazzarri) e m’accuntentasse ‘e riuscí a difennere ‘o siconno posto; p’’o vencerlo ‘o scutetto aspettammo ‘e cagnà allenatore e ddirettore generale e aspettammo ca De Chiacchiaroniis addeventa quaccuno dint’ ô Palazzo. Ca si no levàmmoce ‘stu penziero ‘a capa e nun ce facimmo zimàire (illusioni) inutile!
Staveti bbe’ e si dDi’ vo’ ce sentimmo sàpato ca vene doppo d’ ‘o fullé cu ‘a juventús(sa)!
R.Bracale Brak

ilnapolista © riproduzione riservata