E pe furtuna fernette

Fernette guagliù! Pe furtuna fernette! A vvrenna e sciuscelle…, ma pe furtuna fernette e allimmeno p’ ‘o mumento ce levajemo ‘a nante ê piede ‘sta E/L ca (pe comme sta miso ‘o Napule ‘e mo) risultaje cchiú ‘nu ‘mpiccio ca ato. Ma pe furtuna fernette ajeressera quanno doppo ‘e ttre bbirre gelate ca c’êvano servute a nNapule, ce ne servettono n’ati ddoje â casa lloro e ce facettono fà n’ ata fijura marrò ‘nnAiropa!E ddicere ca ‘e nuoste erano partute ‘a cca quase sicure ‘e jí a ffà ‘nu miraculo. Seh, seh! Unu miraculo ce fuje ajeressera e ffuje chillo ca ‘o Victoria Plzen ce facette sulo ddoje rredde e nno tre comme era succieso a nNapule. E ‘a scuatra nosta? Chi t’ ‘o ddà?! ‘O Napule ce mettette ‘o scuorno ‘nfaccia a ttutte quante e dint’ a cumplessive cientuttantaquatto minute nun fuje crestiano ‘e signà manco una rredda! E che saciccio!No, no… meglio ca fernette comme fernette e allimmeno p’ ‘o mumento ce levajemo ‘a nante ê piede ‘sta E/L. ‘A cosa ca me dispiace è una sola: ca a ll’arranqua chillu nnacchennello ‘e Mazzarri (ca se penzaje ca dinto a trenta, quaranta minute ‘o Napule êsse pututo fà quatto rredde [quanno dinto a cumplessive cientocinquanta minute nun n’aveva fatto manco meza…]) menaje dinto inutilmente pure a uno dicenno ch’era Cavani e ne guaragnagne sulamente ca ‘o guaglione s’abbuscaje ‘nu cartellino jalizzo e, diffidato comm’era, â tempuata ca vene, addó se joca, joca à dda zumpà pe scualifica ‘a primma jurnata! ‘A copp’ô ccuotto, acqua vulluta! E che saciccio!No, no… meglio ca fernette comme fernette! E ‘sta vota ‘e ppaggelle ‘e ffaccio!
DE SANCTIS 4,5 Maje seriamente ‘mpignato pe tutto ‘o primmo aione; a ll’arranqua capitulaje ô primmo tentativo ‘e Kovarik(ko) nun trattenenno ‘o pallone, facennoselo passà pe sott’â panza e ‘nzècuito nun dètte maje sicurezza â difesa! A ggiugno ce serve assulutamente ‘nu purtiere cu sette parme ‘e ca**o!
MAGGIO 5 Nun appressuraje maje restanno sempe vascio, ma nun riuscette ô stesso a tené ll’avverzario sujo perdenno sistematicamente tutt’ ‘e sfite; chelli ppochi vvote ca scennette ‘ncopp’â linia ‘e funno-campo ssbagliaje ‘e cruzze.
GAMBERINI 6- Tenette ‘a bbòtta pure si fuje assaje nervuso, ma luttaje cu camàra (con orgoglio)pure doppo ca se facette male e â fine s’êtt’ arrennerse e avette ascí.(dô 65° CANNAVARO 4,5 E che ne parlammo a ffà! È scadente e ‘o dimustraje ancòra ‘na vota: overo ca ‘a situazziona fuje ‘e tre contro a ccinche ma isso se facette ‘nfilà ‘ncontropiete,dànno via libbera a tTecl dâ mancina!)
ROLANDO 6+ ‘Nu poco cchiú appesantuto rispetto ô fullé d’ ‘o san Paolo, ma sinamparco (comunque) ‘o meglio lla ddereto, bbuono pure ‘nfase ‘e plantamiento (impostazione) quanno ascette dâ difesa con bbona perzunalità.
ZUNIGA 4.5 Lassaje troppu spazzio a rRajtoràl(lo) ‘ncopp’â primma rredda dô Plzen. ‘ Nfase uffenziva aizaje troppa porvera dimustranno poca cuncentrazziona dint’ê mumente ‘mpurtante.
BEHRAMI 5,5 Ce mettette granna cegna (impegno) radduppianno a tutto campo nfi’ a cche s’abbuscaje ‘nu cartellino jalizzo ca ‘o cundiziunaje e Mazzarri ll’êtt’ ‘a levà pe fà posto a Inlèr(ro). (dô 46° INLER 4,5 – Nun trasette ‘mpartita. Sbagliaje troppi bassurere (suggerimenti) soprattutto dinto a zzone d’ ‘o campo troppo periculose, comme succedette dint’a ll’accasione d’ ‘a siconna rredda ca ‘nchiudette ‘o tauto ‘ncuollo ô Ciuccio.)
DONADEL 3,5 Braduso (lento) e senza idee facette ‘na cosa dint’ô vernecale (stomaco)! Nun ce se po’presentà ‘nnAiropa cu ‘nu catavere ‘e chiste: tenimmo ‘na dignità e chisto ce ‘a fà mettere sott’ ê piere!
(dô 46° CAVANI 5 Trasette cu arraggia e ce pruvaje quacche vvota ‘a fora, ma senza zuco…Nun sto’ ‘mbriaco e – comme aggiu anticipato – penzo ca De Chiacchiaroniis ggià s’è vvennuto a cCavani e ‘a quatto, cinche fullé Mazzarri sta mannanno ‘ncampo ‘nu dubblo (un sosia))
DZEMAILI 4,5 Avette ‘o spazzio p’appressurà ‘nfra ‘e llinie, ma,a ccurto d’ idee, nun lle riuscette sbaglianno spisso bassurere (suggerimenti) pure si nsi’ a ll’urdemo currette tanto, ma spisso a vvacante!
INSIGNE 5,5 Accuminciaje buono superanno spisso ll’avverzario sujo; ô pprincipio fuje ll’unico a ttirà ‘mporta, ma po chianu chiano se ne scennette pure pecché nun avette ‘na bbona mana da ‘e cumpagne ca quacche vvota ‘o facetteno correre a vvacante senza vederlo.
PANDEV 5 Pe troppu tiempo giraje pe tutt’ ‘o campo, ma senza zuco. Quanno s’avasciaje pe favurí ‘a manovra nun riuscette a mettere ‘a qualità ssoja ô servizzio d’ ‘a scuatra.
CALAIÒ 5 Jucaje pochi pallune nchiuso dint’â morza d’ ‘e centrali d’ ‘o Plzen. Avette ‘na meza accasione ô finale, ma nun ‘a sfruttaje (forze pe sfurtuna) visto ca ‘o pallone ascette ‘e poco. Sinamparco fósse servuto sulo a levarce ‘a suddisfazziona ‘e signarla ‘na rredda!Troppo poco!
MAZZARRI 4 Ce aveva fatto vedé ‘a luna dint’ô puzzo parlanno ‘e miraculo, ma nun ce credeva manco isso! ‘A scuatra nun sulo nun accennaje ‘a rimonta doppo d’ ‘o 3-0 ‘e ll’annata, ma riuscette quase a ffà ‘a stessa fiujura ‘e seje sorde cu ‘nu primmo aione senza forze e senza idee muscio e braduso e cu n’arranqua piezzo e ppejo! Sperammo ca a ggiugno lassa ‘a stecca a quaccun’ ato!
ARBITRO 4 Scadente, siscaje quanno nun aveva siscà e nun siscaje quann’era ‘o caso comme quanno nun me ricordo chi affunnaje, dint’ â camma nosta a gGamberini e ‘o pallone arrivaje a uno sulo sulo ca facette ‘a rredda dicisiva!
E fermammoce cca speranno ca chello ca à ditto Mazzarri doppo d’ ‘o fullé e ciovè ca è mmeglio ca ‘o Napule è fora da tutt’ ‘e ccoppe airopee e non, fósse overo e ‘o Napule turnasse, senza ati penziere, a lluttà ‘ncampiunato pe difennere ‘o siconno posto visto ca i’ nun me faccio illusione superchie.E nun v’ ‘e facíte manco vuje si nun vulite avé ‘na delusione!
Fermammoce cca e si dDi’ vo’ ce sentimmo marterí doppo d’ ‘a trasferta a Udine, speranno ca ve pozzo cuntà cose bbone!
Staveti bbe’!
R.Bracale Brak