Sto’ ‘ncazzato guagliú, ‘ncazzato assaje e nun ce ‘a perdono!… Pecché nun se ponno jettà dduje punte comme facetteno ajere ‘e cuane ca doppo ‘nu primmo tiempo inutile, senza sapore, senza sale e senza zuco, doppo d’essere riuscite a mmetterse ô siconno tiempo ‘ncopp’ô doje a zzero, neh fujeno crestiane ‘e farse arrivà ncopp’ô doje a ddoje dâ scuatra catanese ca niente aveva fatto, ma ca sfruttaje a mmestiere dduje corner(re). Dich’ i’ stammo currenno p’ ‘o terzo e fforze pure p’ ‘o siconno posto e vvuje sciupate st’uccasiona? E che saciccio! Ll’ora lecale e gghiucà ê ttre nun ce purtaje furtuna! Che se po’ ddicere? Ca simmo state sfurtunate? Forze ma i’ penzo ca ‘a partita d’ajere ‘a vulette pariggiarla Mazzarri mantenenno ‘ncampo a Dossena inutile e casinista; e nun ce scurdammo po ca ‘e ddoje rredde ‘o Napule ‘e ppigliaje quanno ‘o mister(ro) ne facette ascí a Fernandez(zo) pe fà trasí a Culo’echiummo. Sino a cchillu mumento ‘o Napule nun aveva pigliato rredde cu ttutto ca De Sanctis era asciuto ddoje vote a fraffalle, ma asciuto Fernandez(zo) e trasuto Cannavaro ‘o Napule pigliaje ddoje rredde ‘e capa… Cosa ‘e pazze! A Mazzarri lle manca certamente quacche viernarí!Possibbile ca nun riesce a ccapí Cannavaro è ‘o peggio difenzore d’ ‘a serie A? Possibbile ca nun se fa capace ca chillo lla ddereto nun se va a nnisciuna parte, manco a Muntevergene?
‘A cunclusione fuje ca ajere pariggiajemo ‘na rencontra ggià vinciuta! Jucajemo sulo nuje e nuje sule sbagliajemo.’Ncopp’ê tire libbere ‘a difesa abballa sempe e pure ajere succedette: comme ô ssolito ddoje squine (due angoli) ddoje rredde.Accussí a Llondra accussí ajere; sperammo ca overamente Fernandez(zo) êtt’ ‘a ascí pe bbia ca lle venetteno ‘e crampe ca sí no overamente Mazzarri s’à dda ricoverà â Colucci.Ora mo ce aspettano apprimma ‘a Juve e ppo ‘a Lazzio; spero ca Mazzarri se fa capace ca coccosa à dda cagnà: ‘mprimmese à dda levà a Cannavaro e ppo à dda capí ca è ‘na strunzata a ‘nzistere cu Dossena e a tené ‘mporta a De Sanctis ca nun sape ascí e quanno jesce se fa scappà ‘o pallone ‘a mano manco fósse troppo ‘ngrassato.Si nun tene ati titulare pescasse dint’â Primmavera e se désse a ccapate dint’ô muro pe nn’avé mannato Mannini e Vvitale!
Passammo ê ppaggelle:
DE SANCTIS 4,5 Nun à capito ancòra ca ‘nu purtiere ‘e serie A, pe ddà sicurezza ê cumpagne à dda ascí specie ‘ncopp’ê squine. Isso ascette ddoje o tre vvote a vvacante e si nun era p’Aronica mo stessemo parlanno ‘e ‘na scunfitta!
Si tène ‘a ‘ntenzione ‘e fà ‘a stessa rencontra d’ajere dummeneca ca vène a Torino, è mmeglio ca se votta malato e se sta â casa!.
CAMPAGNARO 5,5 Facette ‘na bbona atalossa cu ‘na sola meza fessaria: ‘a mancanza ‘e cupertura ‘ncuollo a Spolli ca ce custaje ‘o doje a uno!
FERNANDEZ 6,5 – Atalossa cratista d’ ‘o guaglione argentino ca riuscette sempe a mmettere ‘a musarola a uno comme a Gomez(zo) ca ajere pareva tenesse ‘o diavulo ‘ncuorpo. Mazzarri ‘o facette ascí e succedette ‘a disturbata! (dô 65° CANNAVARO 4 Una d’ ‘e ddoje rote sgunfiate d’ ‘o Napule Nun ne ‘ncarraje meza e purtroppo se vedette!)
ARONICA 6 Sbagliaje coccosa ô pprincipio d’ ‘a rencontra, ma po chillu salvataggio doppo d’‘a puttanata fatta ‘a De Sanctis valette comme a ‘na rredda!
ZUNIGA 5 Partette bbunariello po chianu chiano se stutaje comme a ‘na cannela cunzumata. E ffuje isso a scappà a ssuonno ‘ncuollo a Lanzafame ca signaje ‘o pareggio d’ ‘o Catania..
DZEMAILI 7 Scatenato e ‘mpalla ‘a cummannaje isso ‘mmiez’ô campo domina in mezzo al campo. Cu ‘na granna cagliosa ‘a fora purtaje ‘nvantaggio ‘o Napule e cchiú ‘ngenerale facette n’ atalossa cratista!
GARGANO 5,5 Stanco, arrancaje e nun fuje isso. Ma strignette ‘e diente cantanno e purtanno ‘a croce. DOSSENA 4 Chell’ata rota sgunfiata d’ ‘o Napule e se tratta ‘e ‘na bucatura ca nisciunu gummista po’ apparà…Se facette pezzecà sempe ‘nnúrzo ‘e cóse e ‘e ppoche vote ca lle jette bbona sbagliaje ‘e cruzze. Chisto nun po’ gghiucà manco ‘mprumuzzione! E penzà ca pe tenerce a chisto ne mannajemo a Mannini e Vvitale Cose ‘e pazze!
HAMSIK 6 Partette bunariello, agrassivo e cchino ‘e cegna; po â ‘ntrasatta sparette senza dà nutizzie e fuje sustituito giustamente, ma troppo tarde.
(dô 56° PANDEV 6,5 ‘Nu jucatore a ccierti mumente straurdinario. ‘Nu paro ‘e vote se nne jette ‘mtromma lassanno cu tanto ‘e naso ê catanese e rijalanno jucate ‘a veru sciantiglione (fuoriclasse). Peccato ca cugliette ‘nu palo e nun riuscette a signà comme tutte ce aspettàvamo).
LAVEZZI 5,5 Si muvette bbuono, ma ‘o Pocho me parette troppo stanco e nun riuscette a ffà ‘o spezziale cullabburanno poco e nniente cu Cavani. (dô 75° INLER 5 ‘Mpalpabbile e senza cunsistenza ‘o cuntribbuto dato dô turco-napulitano.)
CAVANI 7,5 Sempe dicisivo, forze jucaje cu ttroppa liggerezza e cierti vvote êsse pututo cuncretizzà meglio…, ma facenno ‘e cunte sott’ô lampione doppo ‘e nuvanta minute risultaje ‘o meglio d’ ‘o Napule.
all. MAZZARRI 4 Pe tutto chello ch’aggiu ggià ditto.E priciso: si è overo ( e i’ nun ce credo) ca Fernandez(zo) tene ‘e crampe, miette Aronica a ccentro, sposta Campagnaro ‘ncopp’a ‘a mancina e fa’ trasì a Ggrava… ma maje a Culo’echiummo ch’è ‘o peggio difenzore d’ ‘a sere A! E fforze ‘o Catania nun ce deva ddoje purpette! N’ata cosa po: tenimmo ‘nu stannardone ‘e purtiere ‘e riserva bravo a ascì… ce ll’à urdinato ‘o miedeco e fà jucà sempe a De Sanctis, ca nun ghiesce e si jesce sbaglia sempe?! C’è poco ‘a fà: Nun è overo ca ‘nnItalia nce stanno 60.000.000 d’allenature ‘e pallone, pecché ce ne stanno sulo 59.999.999; cumminfatte Mazzarri ‘e pallone nun ne capisce manco ‘o ca**o!E ‘o dimostra tutte ‘e juorne!
arbitro GERVASONI 6 Nun m’addunaje ca ce steva.
‘Nconcrusione ajere due punti certamente perze; mo
sperammo ca dummeneca ca vène ‘a rubbentus(sa) nun ce fa ‘nu mazzo tanto e ca riuscimmo a ffà ‘e stessi punti d’ ‘a Lazio e ppo ce ‘a jammo a gghiucà a Rroma e ssempe Forza Napoli!
E mmo, primma e lassarve ve mmito a precà ‘nzieme a mme: “Padre nostro De Pezzentis dacce ogge stesso Montella, Handanovic(cio) Benatia e Chivu e libberace ‘e Mazzarri, Culo’echiummo e Dossena!
Si dDi’ vo’ ce sentimmo ‘a semmana ca vène speranno ‘e nun ‘ntussecarce ‘a dummeneca a Ttorino.
Staveti bbe’!
R.Bracale Brak
