E che ne parlammo a ffà, guagliú? Chella d’ajere fuje n’ata ‘e chelli partite ca ‘o Napule sciupaje, nun sapenno apprufittà ca pe quase tutto ‘o siconno tiempo ‘o Milan(no) êtte ‘a jucà ‘ndiece pe bbia ca Ibraimovic(cio) ne fuje cacciato â via ‘e fora, avenno dato ‘nu buffo a Totonno Aronica, ca po s’ ‘a scuntaje cu Nocerino; ‘o Napule nun ne apprufittaje perdenno ll’uccasiona ‘e purtarse â casa tre ppunte ‘mmece ‘e chillu sulo punticiello ca â fine ce mettettemo dint’â sacca! Ma, tutto summato (e nun me pigliate pe ppazzo), tutto summato meglio accussí: avessemo vinciuto, ajere ‘a rubbentus(sa)- ca pe parta soja ‘mpattaje ‘ncasa zzero a zzero cu ‘o Siena – êssemo vinciuto, ‘a rubbentus(sa) avesse alluncato ‘ncuollo ô Milan(no) iputecanno ‘o campiunato… E nun me fósse piaciuto. Lassanno ‘e ccose accussí: ‘nu punto peduno, ‘e joche nun so’ ancòra fatte e ttutto po’ ancòra succedere! Ma lassanno perdere ‘sta cuziderazione, i’ dico guagliú, ca ajere ô Napule so’ mmancate perzunalità, curaggio e ppalle sotto… Ora mo tutte ‘sti ccose si se ponno accattà De Pezzentis ce ll’avesse avute ‘a accattà ggià ‘a paricchio e forze sta ancòra a ttiempo cunzideranno ca ajere contro ‘nu Milan(no) orfano d’ ‘a meglia pedina avesse vinciuto chiunque, pure ‘na scuatra ‘e promozziona, ‘a fora d’ ‘o Napule ca Mazzarri nun sapette mettere ‘ncampo: Vargas(so) è stato accattato pe sostituí a Llavezzi, o no? E cquanno Lavezzi, comme ajere nun ce sta ‘ncampo,tanno à dda jucà ‘o cileno e nun s’ à dda aspettà ll’urdemi ddieci minute pe mmettere pure a Pandev(vo) levanno ‘nu difenzore, visto ca ‘o Milan(no) sta jucanno cu una ponta e manco periculosa! Cannavaro, pe pparta soja dicette ca nun avevano attaccato pecché s’erano appaurate ‘e ‘nu paro ‘e cuntrattacche d’ ‘o Milan(no)! Ma jate ârrubbà dint’ê cchiesie, jate a ffà ‘e ppezze ‘mparanza cu De Pezzentis, Biguncino e Mmazzarri ‘ntesta!
Venimmo ô ppaggelle: DE SANCTIS 7 Salvaje ‘o Napule ‘nu paro ‘e vote e fuje furtunato ca chille d’ ‘o Milan(no) spisso sbagliajeno a ppe lloro. Morgan se dimustraje sicuro quanno ascette dimustrannose po capintesta emutivo d’ ‘a scuatra.S’abbuscaje ‘nu cartellino jalizzo ca nun s’ammeretava.
CAMPAGNARO 6 Quase sempe priciso e chino ‘e cegna , risulvette cchiú ‘e ‘na situazziona; assaje rifinito (determinato) ‘ncopp’ê ppalle avete.
CANNAVARO 6 ‘O miraculo! Riuscette, senza fà danno, a mettere ‘a musarola a ‘nu bbrutto accunto comme Ibrahimoviccio. Pure isso s’abbuscaje ‘nu cartellino jalizzo, ma – m’âte ‘a crerere – nun saccio ‘o ppecché!
ARONICA 6.5 Nun cummettette sfregazze gruosse ‘ntervenenno sempe pulito ma cu dicisione e ccegna. Se perdette a Ibra sulo ‘na vota; ‘ncumpenso sbrugliaje diverzi situazzione cu diacunali azzeccate.
(da ll’ 80° PANDEV sv trasette troppo tarde).
MAGGIO 5,5 Nun è cchiú isso: custringette sí a Antonini a stà assaje vascio, ma nun riuscette a sfunnà ‘a chella parte! Se ne scennette assaje ô finale e se facette spisso surprennere ê spalle.
GARGANO 7 Si ce stett’uno chisto fuje ‘o meglio d’ ‘o mazzo: tantu sacrifiggio pe motu-perpetuo ca nun dètte rispiro a nnisciuno… Sbagliaje ‘nu paro ‘e passagge, ma spisso cagnaje passo prupunenno ll’azziona uffenziva cu ccegna e ustinazziona.
DZEMAILI 6,5 ‘Nfase ‘e nun-pussesso facette ‘o difenzore agghiuntato e ffuje ‘o primmo a ffà puggià ll’azziona ‘nvelocità (a far ripartire l’azione con velocità). Nun sempe, però, fuje priciso.
(dô 75°st INLER 5,5 Trasette inutilmente, mustrannose a ccurto ‘e perzunalità e sbaglianno cchiú ‘e ‘nu bbassurero(suggerimento).)
ZUNIGA 6,5 Accumminciaje bunariello dannoce dinto ‘ncopp’â curzia ‘e mancina, ma nun fuje maje priciso cu ‘e diaperune (traversoni). Pure durante ô siconno tempo tentaje ‘e fà coccosa, ma senza zuco e senza risultate cuncrete!
LAVEZZI 5 Pur’ isso accumminciaje bunariello dannoce dinto, ma ‘ncapo appena ‘na ventina ‘e minuti sparette dâ rencontra.Nun riuscette maje cu ‘e puggiate soje (con le sue ripartenze), a ffà succedere ‘o ndrànghete ca ce fósse vuluto e se mbunnaje (si limitò) a scarrecà ‘o pallone addó jeva jeva.
HAMSIK 6,5 Bbona ‘a partita a ttutto campo ‘e Marekiaro. Forze ‘o guaglione sta capenno ca tène ‘e ppussibbilità pe gghiucà tutt’ ‘a partita e nno sulo ‘nu quarto d’ora: grannu sacrifiggio nfase difenziva, dètte ‘na mana a bbluccà ‘e vie centrale ê milaniste. Ô siconno tiempo accumpagnaje ll’aziona cu qualità. Cu ‘na bbotta ‘a luntano scarfaje ‘e guante d’ Abbiati. Ll’êsse fatto cchiú spisso… chi sa’!
CAVANI 6- Bbona pressiona ‘ncuoll’ê difenzure milaniste e ggrannu succurro (aiuto) ‘ndifesa, ma fallette ‘e capa n’appetitosa uccasiona (una ghiotta occasione) ch’êsse pututo rijalà ‘a vittoria ê suoje.
MAZZARRI 5 Aveva dimannato cierti risposte â scuatra, e fforze n’avette surtanto quaccuna (Hamsik). Isso,mister giacchettella, pe pparta soja liggette malamente ‘a partita nun solo ô pprincipio, ma pure strata facenno soprattutto ritardanno quacche ccagno specie ô finale quanno , doppo ca Ibra ne fuje cacciato,avesse pututo trevezzà (osare) coccosa ‘e cchiú! Penzo ca cu n’ato allenatore cchiú curaggiuso e meno presuntuoso (supponente), ‘o Napoli a chest’ora tenesse quacche punto ‘e cchiú ‘ncrassifica e nun sulo p’ ‘a partita d’ajere. ‘Mmece, pure ajere avettemo n’ata cunferma ca Mazzarri nun è ccrestiano ‘e cagnà tattica quanno lle se presenta ll’ uccasiona. Me sto cunvincenno sempe ‘e cchiú ca Mazzarri è stato troppo pestimmato (sopravvalutato)!
l’arbitro RIZZOLI 4,5
E chist’è n’ato d’ ‘a pastafina… Vecchia cunuscenza scennette ‘ncampo cu ‘o mariuolo ‘ncuorpo e vulennose fà perdunà dê napulitane ‘e ffetenzie ca ll’êva fatte ati vvote proprio cu ‘o Milan(no) facette cchiú ‘e ‘na fessaria comme a cquanno nun détte ‘o ricore pe falta fatto ‘a Gargano o ‘a Zuniga (nun m’arricordo) ‘ncopp’a Robinho… e ccomme a cquanno nun ghiettaje fora a Aronica ca s’era vennicato
d’ ‘o bbuffo avuto ‘a Ibra, dannone uno a Nnocerino. ‘O fatt’è ca isso nun s’era addunato manco d’ ‘o bbuffo d’ Ibra e si nun ce ‘o ddiceva ‘o signalinie… avesse lassato correre. Ora mo nun saccio si facette chello ca facette pe favurí ‘o Napule o pe gghí a ppitoffio d’ ‘o Milan(no), visto ca aggio paura ca chisto è passato dô libbro paca ‘e Berlusconi a cchillo d’ Andrea Agnelli!
E bbasta accussí.
A viernarí, si dDi’ vo’! Staveti be’!
R.Bracale Brak
