Ripeterse é ‘mpussibile senza caschiglie (innesti) ‘mpurtante

Che serata amara, guagliú…. e che fijura ‘e seje sorde!!’O Siena jucaje ‘mbuttunato ‘e riserve (addirittura ‘mporta ce stette ‘o terzo purtiere) e ‘o Napule nun riuscette a assicurarse ca ‘a miseria ‘e n’ utobbutto(autogol)ca tène ‘nvita ‘na speranzella d’arrivà ‘nfinale vincenno a Nnapule ‘o ritorno d’’a semifinale…, ma i’ ‘a veco difficile; avévamo miso tutt’ ‘e speranze noste, pe salvà ‘a tempurata, ‘ncopp’â cunquista d’ ‘a Coppa Italia,ma ‘e chistu passo cca nun vincimmo manco ‘na scopa a ssette mano a mmano: purtroppo troppi jucature   so’ pestimmate  (sopravvalutate); ll’anno passato,  ‘nu poco ‘a surpresa, ‘nu poco ‘o mazzo…(ca si nun ‘o tiene t’ ‘o fanno), mazzarri e ‘e guagliune facettero ‘o miraculo, ma ripeterse era ‘mpussibile senza caschiglie  (innesti) ‘mpurtante…., ‘’mmece succedette ca De Pezzentis, Biguncino e giacchettella Mazzarri ‘mmece ‘e fà quacche caschiglio,  ne caccajeno cchiú ‘e ‘nu jucatore rummanenno senza riserve  cu ggente sfruttata e spumpata ca nun ce ‘a fa cchiú! Pirciò Mazzarri se nn’à dda jí e pprimma ‘o ffa,meglio è! E De Pezzentis  o fa atrupiglie  (investimenti) ‘mpurtante o tornammo a ffà ‘e ppezze ‘int’ a ll’anunimato!

Passammo ê ppaggelle:

DE SANCTIS 5.5: Se spartette cu  Cannavaro  ‘a respunzabbilità d’ ‘a primma rredda e ppo rummanette a vederse ‘a partita.

CAMPAGNARO 6:Nun sta ô massimo, ma Mazzarri, ca nun tène riserve a ll’ardezza,  s’ ustinaje a farlo jucà. S’ammeretasse ‘e repusà ‘nu poco,ma fuje periculuso sotto porta d’ ‘o Siena cuglienno ‘nu travesagno!

CANNAVARO 4,5:’O solito guajo eterno: ggià ô quarto minuto s’ammappenaje isso e De Sanctis e poco mancaje ca Bogdani nun ‘e ffuttesse a ttutte e dduje; ô quarantadujesimo po se facette superà ‘a ‘nu pallunetto ‘e Mannini ca lanzaje a Reginaldo ca superaje ‘ntromba a Aronica e ghiette a ffà sicco ô Pirata. Sempe ‘nsufferenzia’ncopp’ê ppalle aute aizaje póvera pe tutt’ ‘o siconno tiempo quanno ‘o Napule attaccaje a ccapa sotta e isso jette a ddà ‘mpiccio annante e affannaje pe turnà arreto lassanno puntualmente ‘a difesa scummigliata.

ARONICA 5,5: Cumplessivamente assicuraje â difesa    equilibrio e sustanza, pure si facette surpassà‘ntromba a Reginaldo, doppo d’ ‘a puttanata ‘e Cannavaro.  Eppure Mazzarri pe ffà trasí a Lavezzi levaje proprio a isso e nno a a Cannavaro…e ‘o pecché ‘o ssape ‘o Pataterno!

(Dô 57° LAVEZZI 6: Êsse avuto dà ‘o ppoco ‘e  velitusità (imprevedibilità),ma nun sempe le riuscette. Allimmeno però appacciucaje  (propiziò) ll’ utobbutto(autogol))

MAGGIO 4.5: Stanco e senza cegna, nun lle riuscette maje ‘e zumpà ll’ommo e nun ‘ncarraje ‘nu cruzzo! Pure isso, è cchiaro, sta fisicamente  cu ‘e rrote ‘nterra e ‘ncopp’â curzia ‘e dritta   ammanca (e se sente!)’o puzamiento suĵo  (la sua spinta) ‘e ll’anno passato.

GARGANO 6.5: Moto-perpetuo fuje ‘o faro d’ ‘a mediana. Tutte ‘e pallune passajeno ‘nfra ê piere suoje e fujeno assaje chilli pallune ca isso   srarecaje dê piere ‘e  ll’ avverzarie. Certamente ‘o meglio d’ ‘o mazzo a ‘stu mumento.

DZEMAILI 5: Nun è ‘nu reggista  e s’arrangiaje; êsse avuto dà ‘o cagno ‘e passo â scuatra, allargà ‘o juoco e llanzà ‘e pponte; facette poco e malamente tutt’ ‘e ttre  ccose.

(Dô 74° INLER 6: Cercaje  ‘e dà  acutigliara  (ordine) ô mumento ‘e  ll’assalto finale. Smistaje quacche  bbuonu pallone).

ZUNIGA 5.5: Preferito a Ddossena, assaje  raramente arrivaje  ‘ncopp’â linia ‘e  funno e nun lle riuscette quase maje ‘e fà ‘nu cruzzo decente; êsse ‘a jucà a ddritta ô posto ‘e Maggio ca sta stanco, ma po ‘ncopp’â mancina, visto ca s’ànnu vuluto levà Mannini, Vitale e Datolo,  nun tenimmo chi po’ sustituí Dossena ca oramaje fa sulo ‘e fuosse ‘nterra.

HAMSIK 5.5: Urdinato e cchesto è cquanto! Tuccaje sí ‘nu tummolo ‘e pallune, ma senza zuco e senza sale mancannole  ‘o sprinto d’ ‘e  tiempe bbelle. Avette n’uccasione  retissanta (clamorosa), ma da  pusizzione favurevole preferette dà ‘a palla a   Ccavani ca steva nn’urzo ‘e cóse ( in fuorigioco).

PANDEV 6-: Pronti via, ‘a primma uccasiona bbona  fuje  súbbeto d’ ‘a soja; Farelli ll’ annecaje ‘a rredda e ppo chianu chiano isso sparette d’ ‘a rencontra.

(Dô 71° VARGAS 5: Mazzarri ‘o menaje dint’â bagarra pe tentà ‘e ripiglià ‘o  risultato, ma ‘o guaglione nun truvaje maje  ‘o demmarraggio justo (lo spunto giusto).)

CAVANI 5: ‘Mpalpabbile, ‘ncunzistente nun ce mettette nè ggenio, nè fforza ‘int’ê cuntraste; se facette vedé ô ssolito ‘nfase difenziva, ma (isso ch’êsse fà ‘o centravanti…) fuje assente ‘ngiustificato annante.

MAZZARRI 4,5: ‘A  scunfitta d’ajere  mette ‘o Napule ‘ncundizzione disperata  ‘e vencere pe fforza ‘a rencontra ‘e ritorno, senza piglià rredde e ‘a voglio proprio  vedé ‘sta cosa….cu ‘na difesa ‘mperiata ‘ncopp’a Cculo’echiummo! Nun cunvincette  ‘o cagno ‘e Aronica cu Lavezzi: passaje a cquatto addereto, ma cu Zuniga e Maggio ‘ncopp’ê curzie ‘a scuadra se scummigliaje  troppo e cumminfatte pigliaje ‘a siconna rredda. E ffuje sulo bonasciorta si ô  finale ll’utobbutto(autogol) ‘e Pesoli dètte  n’ata vota ‘na speranzella  ê cuane mettennole(si venceno ‘a rencontra  ‘e ritorno, senza piglià rredde)  ‘ncopp’ â strata d’ ‘ a finale ca vincennola po’ apparà ‘a tempurata d’ ‘o Napule. Ma p’arrivà â finale, â rencontra ‘e ritorno serve tutto n’atu Napule cchiú  cazzemmuso (furbo e cattivo) annante, cchiú tuosto e cuncentrato  ‘ndifesa, cchiú attiento e fantasiuso a mmità campo. Accussí sperammo.Ca a ‘stu mumento sulo ‘e speranze putimmo campà.

l’arbitro DE MARCHI 4,5 Ô ssolito tenette ‘ncampo n’atteggiamento ‘e rre cummannascoppole;scuntentaje ‘e cuane nun vedenno ‘na falta ‘e vraccio ‘e Contini, (ca però – secondo ‘sta meza cazetta – era stato spustato ‘a Cavani) e se tenette dint’â sacca ‘e cartelline jalizze ca ‘e tuscane se fossero ammeretate ‘ncuntinuazzione.

E chest’è.

Si dDi’ vo’ ce sentimmo marterí ca vene.

Staveti be’

R. Bracale Brak

ilnapolista © riproduzione riservata