Allimmeno ‘na cosa bbona dinto a ‘sta tempurata

È gghiuta, guagliú, è gghiuta!Applavuso! Allimmeno ‘na cosa bbona dinto a ‘sta tempurata, ca p’ ‘o mumento è asciutta ‘e zuco e scarza ‘e zuccaro…, allimmeno ‘na cosa bbona c’è riuscita: âmmo aggranfato ‘a semifinale ‘e Coppa Italia, mannanno â casa cu ddoje sfugliatelle ‘ncartate dint’â guantiera e menanno fora d’ ‘a Coppa chella scuatra ‘e  chianchiere ‘e chillu sbruffone ‘e Ranieri ca ademasso (oltre) a ttené ‘o difetto d’essere rumano,  comm’ecchese juventino   è ppure  ‘nu ‘nchiaccato ‘e sossazza (lebbra) jancae nnera e s’ ‘o ppenza cchiú isso ca ‘o ggrano d’ ‘a carastia e ca ajere a nnotte â fine d’ ‘a partita jette ascianno a Ccristo ‘int’ê lupine e s’ ‘a pigliaje cu Celi ca, a ccomme diceva isso,  nun êva visto ‘nu ricore ‘ncopp’ô principe trattenuto sí p ‘ ‘a maglia  ‘a Maggio, ma quanno ‘o principe steva ‘a mez’ora nn’orzo ‘e cose (in fuorigioco) ca ll’arbitro nun êva siscato. E ‘o sbruffone rumano s’allamentaje comme a ‘nu vitiello, ‘mmece  ‘e ringrazziarlo a ll’arbitro ca nun aveva vuluto vedé n’ati dduje ricure p’ ‘o Napule. Ma forze quatto sfugliatelle fósseno state troppe! Accuntentammoce ‘e avercene rijalato ddoje, chiene ‘e zuccaro e penzammo ca mo ‘nzemifinale ce aspetta ‘o Siena ‘e Calaiò e C. e pirciò tenimmo ‘accasione ‘e levarce ‘e paccare ‘a faccia d’ ‘o pareggio ‘ncampiunato. E nun ce scurdammo ca si vattimmo ‘o Siena,(e ll’âmm’ ‘a vattere!) ‘nfinale ce aspetta ‘o ‘a juventus(sa), o ‘o Milan(no) o ‘a Lazzio e… scusate si è ppoco. Ma, si vulimmo salvà ‘a tempurata…, chi songo songo avimm’ ‘a vencere! Pure si p’ ‘o mumento ‘ncampiunato dummeneca ca vène ce aspetta, p’ ‘a primma ‘e ritorno,  ‘o Genoa ca ce tène puntate pe levarse ‘a faccia ‘e pacchere d’ ‘o seje a uno ‘e ll’annata; ma nuje âmm’ ‘a essere capace ‘e farle annuzzà ‘ncanna ‘o vulio ‘e vengarse (vendicarsi)! Turnammo a ajere a nnotte e vedimmo ‘e ppaggelle:

DE SANCTIS 7 Sicuro ‘int’ a  tutte ‘e circustanze fuje overo
furmidabbile quanno  ‘ntervenette a mmestiere tre vvote ‘e fila ô finale   d’ ‘a partita, salvanno ‘o risultato.

CAMPAGNARO 6  Ancòra quacche discetta (scoria), cu quacche jerro, soprattutto ô primmo tiempo.S’êsse ‘a arrepusà ‘nu poco. Jette bbuono però ô siconno tiempo.
CANNAVARO 5 Milito fuje n’accunto (cliente) scommeto assaje e ‘o capitano cuano,  ancòra troppo mpresuttuto, s’ êtte arrangià paricchio pe metterlo ‘a musarola e cquanno vedette ‘a mala parata, lassaje ‘o cuntrollo d’ ‘o principe a Totò Aronica. Me facette vení ‘o friddo ‘ncuollo pe n’indecisione aspettanno ca De Sanctis ascesse.  Possibbile ca pe Mazzarri nun se po’ ffà a mmeno d’ ‘o frato d’ ‘o guappo d’ ‘a Turretta?Possibbile ca nun ‘o ccapisce ca cu Cannavaro ‘ncampo, primma o doppo p’ ‘o Napule fernesce malamente?…

ARONICA 5,5  Bastantamente sicuro, pure si quacche  vvota stette fora pusizzione e  nun sempe riuscette a cuntènere ‘e ‘scarpadure (discese) d’Alvarez(zo). ‘O tiro ‘mporta nun è articulo suĵo comme quanno ô primmo tiempo concludette centralmente ‘mmano a Castellazzi,  sciupanno ‘na granna uccasiona.

MAGGIO 4,5  Miezu voto ‘e cchiú p’ ‘a bbona vuluntà, ma aizaje póvera cu  gghiucate laste  (appannate) e senza zuco.Nun capisco ‘nu poco a ‘sta parte che ttène ‘stu guaglione!

INLER 5  Ancòra ‘na ‘sciantigliona decivante(prova deludente) d’ ‘o turco-napulitano. Neppure ‘nu passaggio straurdinario  e tanta difficultà  p’accumpagnà ll’azziona e ttruvà  ‘e gghiucate juste.

(Da ll’81° DZEMAILI s.v. – Poco mancaje ca nun signasse cu ‘na straccarellata ‘a luntano. Penzo proprio ca dummeca a Ggenova contro ê crifune,  parte titulare).

GARGANO 7+  ô  siconno tiempo sbagliaje ‘na rredda retissante (un gol clamoroso), ma fuje   praticamente ll’unico fullone (errore grave) ‘e ‘na ‘sciantigliona ‘a tené a mmente. S’êsse ‘a sparagnà ‘e tirà ‘e ppunizzione, tanto ‘e sbaglia! ‘Ncumpenso  luttaje comme a ‘nu lione,’ncarraje cchiú ‘e ‘nu  passaggio, currette pe ttre e facette  tantti bbelli ppúgge  (bei rilanci) Quse quase fuje ‘o meglio ‘ncampo!

ZUNIGA 6,5  Bravo soprattutto a cuntènere ‘e ‘scarpadure  ‘e  Maicon(no), custretto a levà mano e nun pruvarce cchiú;
‘nfase uffenziva però, pure pruvannoce cu cuntinuità,  nun dètte chello ca uno s’aspettava.

HAMSIK 6,5  Poco ‘ncisivo a ll’attacco ma bbravo ‘mmiez’ô campo comme  riggista d’ ‘a  scuatra.

(Da ll’87° DOSSENA s.v.)

LAVEZZI 6  Tanta corza a sservizzio d’ ‘a scuatra; s’abbuscaje tanti punizzione p’ ‘e ffalte cuntinuate d’ ‘e chianchiere ‘e Ranieri, dètte però ‘a sensazzione ca lle serve n’ a’ ppoco ‘e tiempo pe ttruvà ‘a cundizzione justa.

(Dô 65° PANDEV6,5  Sta attraverzanno ‘nu granne periodo ‘e fromma;  forze se fósse mmeretato ‘nu poco ‘e spazzio ‘e cchiú. Fresaje (sfiorò) ‘a rredda, servette tanti pallune ‘mmitanti e riuscette a fà  risciatà ‘e cumpagne dint’ê mumente difficile d’ ‘o finale ’e partita.)

CAVANI 7,5  ‘O meglio d’ ‘o mazzo p’ ‘e ddoje sfugliatelle servute a Ranieri e ê suoje. ‘Ntelliggente assaje  ‘o ricore cu ‘na bbotta centrale mentre Castellazzi se tuffava a mmancina lassanno ‘a porta aperta.. ‘Ndifesa  po  fuje assaje utile dinto a cchiú ‘e ‘na circustanza. Ancòra cuntratto,doppo d’ ‘o ricore signato  se  sbluccaje  e apprima servette  ‘nu pallone cucquittóno (delizioso) a Pandev(vo), po signaje ‘na rredda assaje bbella  ca stennette definitivamente  ll’Inter(re), lle facette ‘o servizzio e  nn’ ‘a mannaje â casa cu ‘o bbeleno ‘mpont’ô musso e cu ‘o prozo ca ll’abbrusciava.

MAZZARRI 5,5  Ô  primmo tiempo ‘a scuatra stette assaje bluccata cu  ll’Inter(re) ca  penzava sulo a difennerse senza cuncedere  spazzie. Ô  siconno tiempo, pure cagnanno bastantamente ‘a museca, doppo d’ ‘o ricore…, ‘a scuatra  subbette troppo dint’â fase centrale d’ ‘o juoco. Pandev(vo)  se fósse mmeretato ‘nu poco ‘e spazzio ‘e cchiú e quacche ghiucature avesse avuto ‘a tirà ‘o sciato…, ma nun cercammo ‘o pilo ‘int’a ll’uovo!

l’arbitro CELI 4 Scadente comme ‘o nuvanta pe cciento ‘e ll’arbitre taliane,êsse vuluto fà ‘o pignuolo e ‘o pricisino, ma sbagliaje tutto, scuntentanno a ttutte e risultanno ‘o peggio ‘ncampo!

E fermammoce cca. Appuntamento, si Ddi’ vo’,  a llennerí ca vene speranno ca ‘a primma ‘e ritorno nun ce facesse ‘ntussecà! Cu ‘na bbona salute!

R.Bracale Brak

ilnapolista © riproduzione riservata