ilNapolista

‘A rota sta accumincianno n’ ata vota a ggirà

Songo  cuntento guagliú! Ajere a nnotte, doppo cchiú ‘e quarant’anne ascette ‘o doje   ‘ncopp’â strazzione  ‘e Palermo  e ‘o Napule se levaje ‘a suddisfazzione ‘e scutulià a dduvere a scuatra ‘e Mutti e Zamparini. Certo me fósse piaciuto ‘e cchiú si ‘e guagliune cuane  avessero vinciuto pe ttre a zzero e nun avessero permettuto a ‘nu rasoterra comme a Miccoli ‘e signà (dint’ô bburdello d’ ‘o finale…) ‘e capa(!) ‘a rredda d’ ‘a bbannera. Ma nun ghiammo a ccercà ‘o pilo dinto a ll’uovo si no diceno ca so’ ‘ncuntentabbile e ca niente me va bbuono! Dicimmo ch’è gghiuta bbona accussí e ca ‘o Napule m’à dato ‘o sfizzio ‘e mettere ‘na cucchiara ‘e cavicia ‘mmocca a ttanti ciucciuvettole.E senza esaggerà aggio ll’impressione, corna facenno, ca ‘a rota sta  accumincianno n’ ata vota a ggirà  comme si deve p’ ‘o verzo justo e ca ‘o terzo posto ( a ppatto ‘e vencere ‘e prossime quatto partite) ‘o putimmo fà nuosto.

Passammo ê ppaggelle: DE SANCTIS 5  Beneditt’ ommo! Dich’i praticamente nun tenette niente ‘a fà pe tutt’ ‘a partita e dinto a ll’unica uccasione ch’êsse avuto fà coccosa, se facette fottere ‘a chillu ze-pochiello ‘e Miccoli ca ‘e capa (!) lle facette ‘nu pallunetto telefonato. E che saciccio!

ARONICA 6  ‘Nu paro ‘e ‘mprecisioni ch’êssero pututo custà caro, ma p’ ‘o riesto facette chello ch’êva ‘a fà cu relativa tranquillità.

CANNAVARO 5,5 Cchiú ‘e ‘na vota   fora pusizzione, se perdette a Miccoli cunzentennole ‘e signà ‘e capa(!) ‘a rredda d’ ‘a bbannera. Fósse ora ca Mazzarri ‘o levasse pe ddà spazzio a Fernandez(zo) o a Britos(so)!   CAMPAGNARO 6,5  ‘O meglio d’ ‘a difesa cunzideranno pure tutte ‘e puzamiente ca dette jenno annante.’Nnagutabbile! (Inesauribile).

DOSSENA 6- Quacche jerro crossié (qualche svarione grossolano) ô pprincipio… po andivinaje quacche cruzzo sfruttate malamente dê cumpagne; ‘o principale difetto suĵo è ca è troppo bradúso (lento)!

GARGANO 8 Atalossa (prestazione) straurdinaria pe moto-perpetuo. Poco mancaje ca ô primmo tempo nun signasse cu ‘nu granne bòlito!Jucatore refriscato e ritruvato  (rivitalizzato e ritrovato). (Dô 70° DZEMAILI s.v.)

INLER 7+  Finalmente ‘na prova majateca d’ ‘o turco napulitano. Nun è n’autentico direttore d’urchestra, ma sape cósere ‘o juoco,repartíe sserví a mmestiere ‘e cumpagne. ‘A mettere ‘ncurnice ll’ajuda pe Marekiaro.

MAGGIO 6  Cu ttutto ca nun steva assaje ‘nserata vincette ‘a sfita cu  Balzaretti, dimustranno ca ll’ecchese juventino a nnuje nun ce serve proprio… Sbagliaje ‘nu paro ‘e cruzze, ma ce mettette tanta corza.

HAMSIK 7  Comme ô ssolito se jette annascunnenno pe paricchiu tiempo, ma po venette fora comme sape isso.’Na rredda overamente bbella ca m’arricurdaje una fatta ô Genoa quacche anno fa! Beneditto guaglione! Che lle custasse jucà ‘nu poco ‘e cchiú?! (Dô 76° Zuniga 6,5 – Trasette a mmestiere ‘mpartita e dinto a ppochi minute mustraje granni ghiucate  e vivacezza  (dinamismo).)

PANDEV 7,5  Partette cu ‘a martellina tirata…, po ritruvaje fiducia e gghiucate signanno ‘na granna  rredda (pe cuntrollo ‘e palla e precisione) ca sbluccaje ‘a partita. Po tanta qualità, ati rredde sfiurate e ‘na ‘mpurtanta fatica  raccurdanno   centrocampo e attacco.( da ll’81°  CHAVEZ s.v.)

CAVANI 7,5  ô primmo tempo se magnaje ddoje rredde, ma po ‘a solita corza ’nnagutabbile, ghiucate ‘e qualità e ‘na rredda assaje bbella ca lle facette mmeretà ll’applavuso pure d’ ‘e palermitane facettero sí ca ll’aggi’ ‘a mettere ‘nu voto aveto.

MAZZARRI 7  Purtroppo ‘o  Napule dinto a ògne partita cuncede sempe ‘nu pare ‘e palle retissante(clamorose)  all’avverzario, ma po ‘e cuane  sanno attaccà ‘e spazzie  comme  a ppoche e arrivano addó vonno arrivà: ajeressera ‘o  Palermo nun me parette   ‘nu granché,ma ‘a vittoria rummane fundamennale pe cchello ca ‘o Napule à dda fà.

arbitro MAZZOLENI  4 (‘e stima) Chist’arbitro ô san Paolo ce porta male, ma fora ô ccuntrario ce dice bbuono…, ma è bergamasco e juventino e ppirciò po’ pittà pure  ‘o sole nun s’ammereta maje cchiú ‘e quatto.

‘Ncuncrusione ‘o duimilaeddudice è accumminciato bbuono e ringrazziammo ‘o Cielo! E mmo ve saluto e ce sentimmo si vo’ dDio â prossima vota.

Staveti bbe’

R.Bracale Brak

ilnapolista © riproduzione riservata