È ‘na jastemma menata guagliú, ‘na jastemma! E ancòra ‘na vota ce cugliette! Ancòra ‘na vota e si nun me sbaglio è ‘a quarta, doppo d’ ‘a Ciampionsa ‘o Napule s’êtte accuntentà ‘e ‘nu pareggio. E ringrazziammo ‘o Cielo ca nun ghiette pejo! Ajeressera ‘o Napule doppo d’avé fatto ‘o squarcione ô Madrigal(lo) s’avesse avuto ‘a ripetere contro a ‘na mudesta scuatra comme è ‘o Novara ca tène ‘a peja difesa d’ ‘o campiunato e sta ancurata dint’ô scantinato d’ ‘a classifica. ‘Mmece ‘o Napule nun ne fuje capace dimustrannose, ô ssolito, granne cu ‘e scuatre grosse, granne assaje ‘nCiampionsa, ma overo piccerillo quanno ll’ avverzario ca tène ‘e faccia è mutesto. ‘Nzomma ajeressera c’êttem’ ‘a cuntentà ‘e ‘nu punto (ca è acqua ca nun leva séte)… e ringrazziammo ô Cielo pecché stévamo pure abbuscanno e sulo a cinche minute dâ fine riuscettemo a ‘mpattà! Coccosa nun quatra eh!
Passammo ê ppaggelle:
DE SANCTIS 5 Pigliaje ‘na redda ca se puteva evità: isso se menaje assaje tarde,mentre chilli tre ‘ntontere ‘mbarriera s’arapetteno senza mutivo e succedette ‘o ‘mpiccio!
CAMPAGNARO 6,5 Difennette e accompagnaje spisso ll’azione; ‘na ‘scarpadura (discesa)soja puteva custà cara ô Novara.
CANNAVARO 6 Rubino è n’accunto poco cunusciuto ma assaje vircante (molto spigoloso). ‘O capitano s’ ‘a cavaje mettennoce ‘o ppoco ‘e mestiere.
ARONICA 6 ‘Nu sfregazzo sultanto (una sola sbavatura) dinto a ‘na partita jucata a mmestiere.
(D’’o 75° ZUNIGA s.v.);
MAGGIO 6- Sbagliaje cchiú ‘e ‘nu cruzzo (cross) e ddoje redde ca s’êssero pututo fà facilmente; ‘ncumpenso assicuraje ’nu puzamiento cuntinuo (spinta inesauribile).
DZEMAILI 6,5 Aunestamente non aveva fatto granni cose primma d’ ‘a redda, ma ‘a pernata soja (la zampata) fuje ‘mpurtante nun solo pecché ce assicuraje ‘o pareggio, ma pecché dimustraje ca ‘o guaglione sta criscenno.
HAMSIK 5 Jucaje fora d’ ‘o ruolo suojo e pe mme se ne puteva fà a mmeno facenno jucà Inler(ro) o Gargano ô posto suojo! ‘Ncopp’â redda ‘e Dzemaili êva comicamente. ma…, pe furtuna, pisciato ‘a palla!
DOSSENA 5,5 Partette bunariello, po subbeto se sgunfiaje e nun ne ‘ncarraje meza! Ah, addó sta Vitale?! Addó sta?!
(‘a ll’80° INLER s.v.);
PANDEV 5,5 Miezu voto mancante pe chillu siconno tempo tutto ‘a scurdà. Ô primmo tempo êva arrepezzato ‘o juoco e pruvato, senza furtuna, ‘nu paro ‘e cuncrusione ‘a luntano.
LAVEZZI 6,5 ‘O solitu chianto ‘nfase ‘e cuncrusione, ma p’ ‘o riesto certamente ‘o Pocho è ll’anema d’ ‘a scuatra, pure si ê vvote s’annammora troppo d’ ‘a palla!
CAVANI 5 – Ripetette ‘a partita blafarda (scialba) ‘e Viallariale. Nè vvisto nè sentuto.
(D’ ‘o 67° MASCARA s.v.).
All MAZZARRI 5 – ‘A scuatra ajeressera, specie ô primmo tempo jucaje proprio malamente e isso nun fuje crestiano ‘ncorzo d’opera d’accuncià ‘o motulo. Hamsik s’êv’ ‘a tené fora e Cavani s’êv’ ‘a sostituí assaje primma.
ll’arbitro DE MARCO 4 P’avé permiso senza sanziunarlo ‘nu juoco viulento e pruvucatorio a cchille d’ ‘o Novara troppo spisso grazziate pe ffalte sistematiche,e ppe nun avé tenuto ‘o curaggio ‘e siscà a dduje minute dâ fine, ‘ncoppa ll’ uno a uno, ‘nu ricore a ffavore ‘e Pandev(vo) arrunzato ê spalle dô purtiere.
E fermammoce cca. Ce sentimmo ‘a prossima vota , si Ddi’ vo’. Staveti bbe’!
R.Bracale Brak
