So’ cuntento guagliú! Ajere a nnotte è asciuto ll’uno ‘ncopp’â strazzione ‘e Napule e avimmo vattuto ‘a prima ‘nclassifica cu ‘o cchiú classico d’ ‘e risultate: ddoje a zzero.
Aggio ll’impressione, corna facenno, ca ‘a rota sta accumincianno n’ ata vota a ggirà comme si deve p’ ‘o verzo justo. Rifrettenno me pare ca chello ca va chist’anno, è senz’auto ‘a difesa, prutetta a dduvere dô centrocampo e pure ‘a ll’attaccante:’nu muraglione mobbile ca cunzente â squatra avverzaria sulo tire ‘a fora. ‘Mparticulare ajere a nnotte Inler turnaje a essere isso (manuvranno comme sape e ppo’ ffà…) e facette girà bbuono tutt’ ‘a squatra accumpagnato ‘a Dezmailí ca nun facette agnurà (rimpiangere) Uragano Gargano;straurdinarie Lavezzi e Cavani, ca stanno chiaramente migliuranno…Jammo però cu ‘e piere ‘e chiummo senza abbagliarce (illuderci): sàpato ce aspetta ‘na partita tosta assaje; ‘o Catania è ‘na bella squatra, allenata a mmestiere, ca monta ‘a guardia ê ccurzie laterale comme a ppoche e ausa ‘nu 4-4-2 ca addiventa ‘ntrasatta ‘nu 3-4-3 e è ‘nu motulo vincente.’E duje paregge ‘e Firenze e Rroma stanno lla a dimustrarlo.
Purtrace‘a Catania â casa ‘na vittoria ‘a veco difficile, pure si nce spero…, ma purtrace ‘nu punto è n’ uperazzione pussibbile e i’ nun ce sputasse ‘ncoppa!
Mo però nun ce facimmo piglià dê cchiacchiere e dâ frennesia; carma e ggesso! Stammo lla dint’ ô gruppo e cchisto è ‘nu campiunato livellato. Nuje ‘o duvere nuosto ‘e vattere ll’Udinese ll’âmmu fatto, pure si vincenno âmmu fatto ‘nu favore â vecchia zoccola piamuntese… Pacienza: nun se po’ avé ‘a votta chiena e ‘a mugliera ‘mbriaca! Primma ‘e passà ê ppaggelle tenco ‘na dimanna pe ttutte vuje: Ma che ce fa ògne partita chillu cestariello ‘e De Magistris sempe ‘ncullato vicino a cchillu capitalista ‘e De Laurentiis ca po manco ‘o vuleva pe sinnaco ‘e Napule? E ppo De Magistris nun tifava Inter(re)? Pecché nun se ne va vicino a Moratti a San Siro e ttène luntano chill’uocchie stuorte suĵe dô Napule nuosto?
Venimmo ê ppaggelle:
DE SANCTIS 8 –Dètte sicurezza â difesa e facette ddoje parate ca cuntajeno comme a ddoje redde fatte! Pirciò s’ammeretaje otto!
CAMPAGNARO 7 – Sempe priciso e ppuntuale ‘ndifesa , smarrunaje sulo ‘na vota purtanno troppo ‘o pallone. CANNAVARO 6 – Avette ‘nu prubblemino musculare, ma stringette ‘e diente e se vedette; rummanette ‘ncampo e riuscette a mmettere ‘a musarola ô spauracchio Floro Flores. Nun me facette disperà e ringrazziammo ô Cielo!
ARONICA 6,5 – ‘Nu paro ‘e diacunale azzeccate salvajeno ‘a difesa luvarda. Ll’ unicu jerro (svarione) â fine d’ ‘a partita.
Cumplessivamente assaje utile.
MAGGIO 7,5 – Armero fuje ‘na mina errante (vagante), ma a lluongo ‘o guaglione cuano avette ‘a meglio. Priciso e devastatore (devastante) ‘o stacco ‘e capa ca dètte ‘a redda d’ ‘a sicurezza.
INLER 6,5 – ‘Ncrescita proprio contro â vecchia squatra soja. À dda turnà a essere sulo ‘nu poco cchiú zzelante e s’êsse ‘a fà vedé cchiú spisso ô tiro ‘a luntano.
DZEMAILI 6,5 – N’aiuda ‘e zuccaro ô primmo tempo e ‘nu passaggio fantastico ô siconno pe lanzà a Ccavani ‘mporta e avastassero ‘sti ddoje cose pe ddicere ca ‘o ggiuvinotto facette proprio ‘na bbona fijura dimustranno ca cu isso ‘ncampo ‘o centrocampo tène cchiú cqualità e assennatezza (equilibrio). (dô 79° ZUNIGA 5 – Pure ajere, doppo chella contro ô Parma se magnaje n’accasione sapurita assaje e nun ce ‘o pozzo perdunà… sta addivintanno ‘nu vizzio!)
DOSSENA 5,5 – Avesse pututo appressurà (spingere) ‘e cchiú ‘ncopp’â curzia soja, ma s’accuntentaje ‘e dà ‘na mana ‘ndifesa; troppo poco!
(Da ll’ 87° MASCARA sv, ma sàpato ca vene lle desse spazzio a Catania!)
HAMSIK 5,5 – Signaje ‘na redda ca parette recolare e sulo ‘a moviola dimustraje fatta ‘nforajuoco ‘e centimetre; po alternaje jucate ‘e qualità cu ate poco curaggiose.
(dô 72° SANTANA 6 – Pruvaje a ffà ‘o centrocampista centrale; poche minute, ma bbuone.)
LAVEZZI 7,5 – Sustanziale (determinante), sbagliaje ‘nu paro ‘e jucate, ma purtaje annante ‘na quantità ‘mpressiunante ‘e pallune. Finalmente vedette ‘a porta e facette ‘na redda ‘a mettere ‘ncurnice!
CAVANI 6,5 – Eccezziunale ll’ ajúda spalle â porta pe Lavezzi; nun fuje ancòra friddo sotto porta, ma tutte ‘e granne artigliere (bomber) ponno attraverzà mumente ‘e carestía (di magra).Ll’âmm’ ‘a aspettà!
All. MAZZARRI 7 – ‘A riggistrà ‘e muvimente ‘e Dossena e de Zzuniga, ma ‘a squatra cumplessivamente parette cumpatta e mutivata. ‘O schema d’ ‘a siconna redda è overamente bbello.
LL’ARBITRO DE MARCO 5; 4 ‘e stima p’avé permiso senza sanziunarlo ‘o juoco viulento a cchille ‘e ll’Udinese troppo spisso grazziate pe ffalte sistematice,e p’avé annullato ‘na redda a Marekiaro ca si ll’avesse signata uno d’ ‘a rubbentussa maje ll’avesse annullata…, ma 6 pecché ‘a moviola, ‘ncopp’ a ‘sta cosa lle dètte raggione; media 5
Ce sentimmo ‘a prossima vota , si Ddi’ vo’. Staveti bbe’!
R.Bracale Brak
