Ma cumm’è ppussibile fà tanto schifo, comme?

Che ffijura ‘e niente, guagliú! Bbasta, bbasta accussí, fenimmola ‘e pigliarce p’’o prozo ll’uno cu ll’ato! Nujeaute ‘ntribbuna-divano tenimmo ‘e bbarbe janche, simmo ggente seria e nnun ce putimmo ammuccà ancòra tanti fessarie ca ce contano. Facitele pe Cchi ve mantene allerta: fenimmola ‘e purtarce p’’e viche! ‘O Ciccio visto ajeressera a Llondra contro a ll’Arzenale, êsse ‘a essere ‘a scuatra ch’à dda affurzà (vincere)’a Cuppetta airupea? Ma nun dicimmo puttanate! Cumme è ppussibbile si ‘e nuoste ajeressera nun foveno capace nun dico ‘e vattere ‘e padrune ‘e casa, ma manco ‘e darle ‘na carocchia, ‘nu pacchero o ‘na sputazzata ‘nfaccia… Chi t’’o ddà? Dint’a 94 minute ‘e nuoste sbaglieno tutt’’e pasiglie [mo luoinghe, mo curte, ma sempe fora mesura] e asseccajeno ddoje addaffe (reti)[una ô 14’ cu Ramsey, lassato sulo, e ll’ata ô 25’ pe ghiella,’o Ggialante tavillaje (deviò) ‘mporta soja ‘nu tiro sballato ‘e Torreira], ma nun ne riuscetteno nemmeno a ffarene una…, anze tirajeno ‘mporta ‘na grama vota e addirittura a ll’84’ quanno Ounas(se), mannaje verzo â porta ‘na palla ch’êsse parata pure nepotemo ‘e nove anne, ca nun ghioca ô pallone… figurateve mo ‘na vecchia vorpa cumme a Cce(c)ch(e)!!! Ma cumm’è ppussibile fà tanto schifo, comme? Dice coccuno ca lle piace ‘e cammenà cu ‘na mana ‘ncopp’ a ll’uocchie:

Il ritorno

“Va bbuó, ma ggioverí ca vene ànn’’a vení ô san Paolo e affurzanno (vincendo)tre a zzero passammo nuje!” Seh, seh, quann’’a fanno ‘sta pellicula? Quanno? Voglio proprio vedé cumme fanno a ffà tre addaffe (reti) senza pigliarene, si ajere nun foveno crestiane ‘e farene una! À dda sulo succerere ‘nu miraculo e ‘o Jancone n’à dda cagnà sette o otto ‘e chille viste ajeressera…Gnorsí i’ ê miracule nce crero, ma ‘o Cielo tene ato che ffà i ‘e strummole a ddispusizzione d’’o Jancone chille songo e ffenimmola ‘e pigliarce p’’o prozo! Rassignammoce e ddammoce ‘nu pizzeco ‘ncopp’â panza: manco ‘sta tempurata (stagione) àmmu cunchiuso ‘nu saciccio, Jancone o nun Ghiancone! Mo êsse ‘a fà ‘e ppaggelle, ma sto troppo ‘ncacchiato e schifato: salvo sulo ô Lunganone, mettennole 6,5 pe bbia ca cu tre ttacculle, uno meglio ‘e n’ato facette sí ca ‘a carocchia pigliata fósse meno pesante… ma a ttutt’’o riesto mecco 4 e ttanto se mmeretajeno pe ccumme jucajeno e pp’o scuorno ca ce metteteno ‘faccia!
E bbasta accussí. Mo dummeneca ca vene all’ora d’’e ppastarelle se va a Vverona contr’ê pariente lasche ‘e chella zoccola ‘e Giulietta e aggio paura ca jammo a ffà n’ata fijura marrò … Sperammo ca mme sbaglio e cca si ‘o Cielo ‘o vvo’ v’o pozzo cunfessà llennerí ca vene.
Staveti bbe’.
Raffaele Bracale Brak