Ancelotti aspettaje troppo pe ccagnà coccosa e Gasperini n’apprufittaje e cce futtette spustanno a Zzapata ‘ncopp’â curzia
Che fetenzia guagliú, che mmunnezza! I’ ancòra nun ce pozzo credere, ma ajere ‘o Napule mmerzo ê ssette ô san Paolo sott’ ô patapato ‘e ll’acqua e ‘nnante a ppoche masciadde… ce mettette atu scuorno ‘nfaccia facennose vattere pe ddoje a uno da ll’Atalanta e ddoppo d’averece ‘ntussecato tòrtano pastiera e ffellata ‘e Pasca, ajere ce mannaje ‘e travierzo frittate ‘e maccarune, pizza rustica, salame e ffave d’’o llunnerí d’idaffassaja (pasquetta). Che fetenzia guagliú, che mmunnezza! Nc’è ppoco ‘a fà: s’è rrotta ‘a pazziella e nce so’ rummase sulo ‘e ccrastule! ‘o Napule nun riesce cchiú a dd’ arfuzzà (vincere)… Votta a ppassà chist’ati ccinche sibbacche (match) e fenimmo ‘sta caracuddamma (stagione) arafrassa (fallimentare) e avutammo fuoglio! Turnammo a cchello ca succedette ajere
Quanno, cumme v’aggiu ditto ‘o Ciuccio ‘mmece ‘e farese perdunà ll’azzimma (sconfitta)cu ll’Arzenale, mettette ll’uoglio ‘a copp’ô peretto tiffiddanno (perdendo) pure cu ll’Atalanta,cosa ca nunn’êss’avuta maje succereree ‘mmece succedette cu ‘o Napule ca se facette rimuntà e vvatere dâ scuatra assineja (satellite) d’’a vecchia zoccola e nnun ll’avastaje quase n’ora jucata tutto summato bbunariello, ma sprecanno troppo…, nun ll’avastaje p’ affurzà (vincere) e avettem’’a ‘ncassà ‘a sesta azzimma (sconfitta) d’’o campiunato, siconna [si nun me sbaglio] ‘ncasa! Troppe! Troppe pe ‘na scuatra ca vo’ dicere coccosa ‘ncampiunato… Nun ce pigliammo p’’o prozo a ppe nnuje! ‘o Jancone ave voglia ‘e dicere ca ajere spennettemo assaje jenno ‘mpressione auta e ttenenno zzureje (ritmi) aute; p’p’affurzà (vincere) s’à dda signà, s’ànn’’a sfruttà tutte ll’accasione avute e nnun s’ànn’’a piglià addaffe (reti), si no nun serve a ‘nu saciccio niente ‘e niente i ‘e prumesse ‘e lasvellà (blindare)’o siconno posto cu ll’urdemi ccinche mubbare (partite)so’ zzifere ‘e viento!
I’ saccio sulo ca ajere ‘a delusione p’’a nichemata mancata e ppe ll’ azzimma (sconfitta) pigliata fove troppo, troppo forte e mmo ch’aggi’’a fà ‘e ppaggelle me venesse ‘o sfizzio ‘e mettere tre a ttutte quante e ttirarme ‘a porta…, ma fósse poco justo cu cchi facette coccosa ‘e bbuono… pirciò me dongo ‘nu pizzeco ‘ncopp’â panza e sso’ cchiú priciso:
OSPINA[Pastacrisciuta] 5 Êsse pututo e avut’’a fà assaje ‘e cchiú a ll’80’’ncopp’a ll’addaffa (rete) ‘e Pasalic(cio)quann’ascette a ccapa ‘e saciccio lassanno vacante ‘o specchio d’’a porta, senza scurdarce quacche ppalla nun trattenuta o repuzata (respinta) centralmente
MALCUIT[‘O Tignuto] 5,5 Atalossa (prestazione) mo sí, mo no ;scennenno mettette sí ‘ndifficultà ll’arcagge (esterni) avverzarie, ma nun riuscette a ffarese apprezzà arreto marcanno a dduvere quaccheduno.
CHIRICHES[‘O Vampiro] 6 Iellato, ancòra ‘na vota fove custretto a dd’ascí, doppo ‘na dicina ‘e minute pe bbia ‘e ‘nu ‘mpiccio a ‘na spalla! [ dô12′ LUPERTO 5,5 ‘O ggiuvinotto lIccese trasette cu ‘o genio ‘e fà, ma ll’emuzzione ‘o futtette ô 69’ quanno êsse avut’’a fà ‘e cchiù ‘ncopp’â mazzarra (traiettoria) d’’a palla ‘nnaccasiona ‘e ll’addaffa ‘e Zapata]
KOULIBALY[‘O Ggialante] 6,5 Tutto summato uno d’’e meglie d’’e suoje; facette chello ca putette pe mmettere ‘a musarola a Zzapata, ca sino a cche fove isso a ffermarlo facette acqua â pippa… peccato ca po ‘o lassaje a Mmeza Cucchiara ca s’’om perdette quanno Zapata, visto ca a ccentro nunn’era cosa se spustaje ‘ncopp’â fascia!
HYSAJ[Meza Cucchiara] 5 ‘a ferza mancina nunn’è articulo suĵo e sse vedette; da chella parte l’Atalanta sfunnaje spisso, soprattutto quanno Gasperini sganciaje Ilicic(cio) libbero ‘e moverse ‘ncopp’a chella camma (zona) ‘e campo fcupulianno (dialogando) cu Hateboer(re).Nun ve dico cumme s’’o jucaje Zapata castigannoce ‘na vota cu ll’addaffa (rete), ‘na vota cu ‘o pasiglio (passaggio a Ppasalic(cio).Pure quann’êtte ‘a scennere nun fove saciccio d’essere priciso e zincatejo (incisivo) ‘Nzomma cumplessivamente vedette ‘e streche (streghe) jucanno a mmancina.M’addimanno si ‘o Jancone se nn’addunaje.
ALLAN[‘O ‘Ncrifato] 5,5 ‘O carioca riuscette a nchiudere ògne azziona avverzaria, ma nun ‘ncarraje quase niente quanno s’êtt’’a tajennà (impostare) nè se vedette sott’â porta bergamaska.
FABIAN RUIZ [Anema Longa] 5 Me dispiace, ma pur’isso nun facette tutt’’o duvere suĵo: fove sí ‘o mazzaja (geometra) ‘e ll’armidanno(centrocampo), ma sbagliaje quase sempe ll’attijarra (scelta) sdint’a ll’urdemi metre. .
CALLEJON [Peppe ‘a ‘nguenta] 5 Facette overamente poco e lle riuscette d’essere periculuso ‘na grama vota ô niajo (finale). ZIELINSKI 5,5 Facette quacche cusarella, ma êsse avut’’a cercà ‘e cunchiurere periculosamente e nnun ne fove capace! [dô 79′ VERDI sv]
MERTENS[Ciruzzo] 7 ’O meglio d’’e suoje ca se facette apprezzà cu bbelli saille (dribbling)ca mannajeno ô manicomio ll’avverzarie, jucate d’auta faiaja(classe) e ‘nu stuco (gol)fatto cu ‘o prozo ô 28’ ca però nunn’avastaje; pure a ll’arrancua (ripresa) se dètte da fà sfurnanno ‘nu granne missiddo (assist) ca però, mannaggiaô bbattilocchio, nun fove capito e sfruttato dê suoje. [dô 78′ YOUNES[‘O Mmerecato] sv]
MILIK[Sant’ARCADIO] 6 Ce pruvaje allimmeno ‘nu paro ‘e vote, ma fove jellato: ‘na vota, sempe ca ‘o rilorgio d’Orsato nunn’è ppezzotto e ddicette ‘a verità, ‘o pallone, pe meno ‘e ‘nu centimetro nun trasette tutto, mentre ‘a siconna vota mancaje ‘e cazzimma e ccazzia (cattiveria) nicessaria cu cchilli marpiune ‘e Gaperini. Peccato!
ANCELOTTI [‘O Jancone] 5 la Cercaje ‘e priparà ‘a mubbara (partita)facenno avanzà cuntinuamente ‘e duje ude (terzini) ma sbagliaje a mmettere Meza Cucchiara ca nun fove adatto! All’arracua (nella ripresa) aspettaje troppo pe ccagnà coccosa e Gasperini n’apprufittaje e cce futtette spustanno a Zzapata ‘ncopp’â curzia, facenno trasí Ilicic(cio),ô ssolito dicisivo cu ‘e ghiucataje soje e ssuccedette ‘o llutto!
Arb. ORSATO 4,5 Grossi fetenzie nun ce ne facette, ma ce ajutaje p’’a scesa.Nun saccio cumm’è, ma cu cchisto nun simmo cacchio ‘e fà bbene! Coccosa ce à dda stà!
E bbasta accussí. Jette cumme jette, facettemo n’ata fijura marrò e ppacienza: se vede ca chesto steva scritto ‘nCielo.
Mo si ‘o Cielo ‘o vvo’ ce sentimmo pe llunnerí vintinove pe ccuntareve chello ch’è ssuccieso â dummeneca primma a Frusinone addó ‘o Napule joca a ll’ora ‘e ll’apritivo. Sperammo ca pozzo cuntareve cose bbone!
Statevi bbe’
R.Bracale Brak
