Hamsik nun fove isso, Sarri sbagliaje cumpletamente furmazziona

Napoli-Atalanta, le pagelle in lingua. Capitan Hamsik tra i peggiori, con Maksimovic e Hysaj. Sufficienti, o quasi, Reina e Mertens.

Hamsik nun fove isso, Sarri sbagliaje cumpletamente furmazziona

 

Napoli-Atalanta, ‘a vedette accussì

Tengo ‘o bbeleno nfi’ a ‘mponte ô musso, guagliú! Niente, nun me faccio capace ca cu ‘sta cacchio ‘e scuatra asseneja (satellite) d’’a vecchia zoccola nce à cacato ‘o cane niro; ce vattette a ll’addabba (andata) e ‘o ffacette pure ajere, ‘mmerze ê sseje ô san Paolo quanno ‘o Napule se alantiarraje (suicidò) jucanno ‘na mubbara (partita) senza capo nè ccora, assaje cumbattuta sí, ma senza zuco nè ccunnimma cu n’Atalanta, ca nun se facette ‘mpressiunà dâ pupulazziona d’’o san Paolo [quase quarantamila mila masciadde (spettatori)] e gghiette cu ssette parme ‘e cacchie ‘ncopp’ô tturrento pesante addó ca ‘e nuoste cu ‘o tulattio (trio) liggiero miso ‘ncampo dô pprincipio ‘a Sarri jetteno ‘int’ê chiavette i ‘a fora ‘e ‘nu paro d’afachie (traverse) sfurtunate schiggiate dê nuoste ‘int’ê primme minute, nun ne sapetteno caccià e nnun ne ricavajeno niente lassanno campo libbero ô contrattacco (contropiede) ‘e ll’Atalanta ca ggià ô 28’ ‘int’ô bburdello ‘e uno d’’e tante tire ‘e squina (corner) ce ‘o mettette a ppitoffio cu cCaldara e nunn’ avastaje tutt’’o riesto d’’o sibbacco (match) p’adderezzà ‘a varca, anze arrivate ô 70’ Caldara truvaje ‘a pareglia (raddoppio) e cce dètte ‘o dispiacere ca nchiudette ‘a mubbara (partita) e ccu ‘e tre ppunte perze ajere putimmo dicere ca oramaje dô campiunato nun tenimmo nient’ato ‘a sperà e nce aspetta sulo ‘e sputà lacreme e ssanco pe ttentà ‘e difennere ‘o terzo posto, ma ‘a veco difficile assaje!

Passammo ê ppaggelle ch’è mmeglio!

Reina 5,5 – Miezu zifo (voto) mancante pecché si fove sicuro ‘ncopp’ô tiro ‘e Petagna [lassato libbero ‘a Maksimoviccio] e nun ce putette fà niente ‘ncopp’â primma addaffa (rete) ‘e Caldara,êsse avut’’a fà coccosa ‘e cchiú ‘ncopp’â siconna e nnunn’ ‘o ffacette, mustrannose, purtroppo, poco tafullo (reattivo).

Hysaj 4 – E ‘o sto’ trattanno! ‘A peggia atalossa (prestazione) d’’a meza cucchiara albanese ca pe ttutto ‘o primmo ajone (tempo) vedette ‘e surice vierde cu gGomezzo e soprattutto cu Spinazzola ca facette chello ca vulette; nun migliuraje manco a ll’arrancua (ripresa) e sse facette zumpà, comme a ‘nu fesso dô cucchiaro ‘e Spinazzola ‘nnaccasione d’’a pareglia (raddoppio) ‘e Caldara. Sarri, ca nun ll’êsse avuto proprio fà jucà ‘o cagnaje troppo tarde! [Dô 79′ Maggio sv]

Maksimovic 4 – Mumallo (disattento), ‘mpriciso e ddebbule, Petagna s’’o magnaje e mmenu male pe nnuje ca Reina ne fermaje ‘o tiro doppo d’’a strunzata ‘e ll’ècchese turinese ca lle lassaje campo libbero.E ddicere ca a cchisto dela e socie lle songo state appriesso pe dduje, tre anne e ppo ll’ànnu pavato salato comme si fósse stato ‘nu campione e nno ‘na pastacrisciuta scarza ‘e sale!

Albiol 5.5 – Miezu zifo (voto) mancante pecché si nun cummettette fessarie grosse, pur’isso restaje a gguardà senza fà niente quanno Caldara facette ‘a pareglia.

Ghoulam 5 – ‘E bbuono ca mettette ‘mmezo quacche ppallone ‘nteressante comme a cchillo ca Peppe ‘a ‘nguente nun riuscette a mmettere dinto, ma tenette ‘ncopp’â cuscienza ‘a primma addaffa (rete) ‘e Caldara quanno restaje a gguardà comme ‘o pastore d’’a meraviglia ‘a cabbesera (colpo di testa) d’’o madaffio (difensore) atalantese, senza mnanco ustacularlo. E cche saciccio!

Zielinski 5.5 – Miezu zifo (voto) mancante pecché allimmeno ce pruvaje , soprattutto cu ‘nu tiro ‘a fora e ffove uno ‘e ll’uurdeme a arrennerse, ma nun facette tutto chello ca me fósse aspettato. Peccato!

Diawara 5 – Nun urtizzaje (verticalizzò) maje, s’accuntentaje ‘e cuntènere, pigliato ‘mmiezo e ffenette affannanno doppo d’avé curruto a vvacante.

Hamsik 4,5 – Nun fove isso! ‘O capitano, appaurato, se facette súbbeto piglià ‘mmiezo ‘nfra Kessié e Kurticcio e nnun riuscette nè a ffarese vedé sotto porta, nè a mmentà coccosa p’’e suoje. Forze cu ‘nu campo accussí e ccu cchilli accunte fósse stato meglio nun farelo jucà e mmetere ‘ncampo a rRog(go) ca tene cegna (grinta), forza e ssanco ‘int’ê vvene e nun se fósse miso paura d’’e profuche ‘e chella faccia ‘e cestunia ‘e gasperini! Però chi nce ‘o ddice a sSarri?

[Dô 59′ Milik 5,5 – Trasette e ccu ‘o fisico suojo se mettette a ddisposizzione d’’e suoje ‘mpignanno ‘e centrale atalantise, ma Sarri nunn’avvisaje ‘e cumpagne ca se ne scurdajeno o nun se n’addunajeno e nnun lle detteno manco ‘nu pallone ‘a jucà. E cche ccacchio!].

Callejon (Peppe ‘a ‘nguenta) 4 – Nun capette ‘e taglie nè ‘e Lorenzigno, nè ‘e Ciruzzo, mantenennose cumpletamente fora d’’o sibbacco (match). Nun turnaje maje arreto ‘ncuollo a Spinazzola, ca dô lato suojo steva dànno tanti prubbleme a cchillu puveriello d’ Hysaj. ‘E cchiú se magnaje n’addaffa retissante (rete clamorosa), ch’ êsse pututo arapí n’ata vota ‘a mubbara.

Mertens (Ciruzzo) 5,5 – Uno d’’e poche a ttentà ‘a jucata. Periculuso doje vote durante ô primmo ajone (tempo), primma cu ‘nu tiro ‘e dritto, piazzato e ppo cu ‘nu tiro ‘e timmurria (punizione). A ll’arrancua (nella ripresa) però sparette pur’isso!

Insigne (Lorenzigno) 5 – Schiggiaje ll’afachia (traversa) ô pprincipio; ma fove ll’unicu tallisso (guizzo) d’’a mubbara (partita) soja. Troppo poco!

[Dô 79′ Pavoletti 4 – Inutile, dètte cchiú ‘mpiccio ca ato!]

all. Sarri 4,5 – Sbagliaje cumpletamente furmazziona mettenno ‘ncampo a Hysaj,’mmece ‘e Maggio, a mMaksimovic,’mmece d’’o Vampiro(Chiriches(se)[ca pure cu una coscia è mmeglio d’’a pastacrisciuta i ‘o porta appiso a ll’urdemu buttone d’’a vrachetta…] a mMarechiaro(Hamsik), ‘mmece ‘e Rog(go); facette a mmeno dô pprincipio d’’e centimetri e dd’’o piso ‘e Milicco ca fósse servuto certamente ‘e cchiú ‘int’a ‘na mubbara cundizziunata dô maletiempo e ccu ‘o tturreno pesante e ca, se sapeva nun avesse favurito ‘o juoco tassuso (veloce) d’’e nuoste ca ajere nun se vedette.Aggio paura ca Sarri à rotto ‘e ggiarretelle cu ddela e sta facenno ‘e tutto p’essere licenziato senza perdere ‘e pesielle!

Arb. Celi 4 – Grossi ffetenzie nun ce ne facette, ma ‘o frate scemo ‘e Schettino cunzentette a ll’atalantise ‘e perdere tiempo i ausaje dduje pise e ddoje misure, nutizzianno súbbeto ‘e nuoste ô primmo carí (fallo) comme facette cu Hysaj,ca rummanette cundizziunato e nchiudette ll’uocchie ‘ncopp’a cchille ‘e ll’atalantise e soprattutto ‘ncopp’a cchille ‘e Spinazzola ca durante ‘e primme quatte minute facette tre ttrasute â disgrazziata ‘ncuollo a pPeppe ‘a ‘nguenta e êsse avuto essere jettato fora, mmece nun fove manco nutizziato i aspettaje ‘o 66’ pe gghiettà fora a cKessié ca ggià ‘a paricchio steva rumpenno ‘o pasticciotto a mMarekiaro.

E ffermammoce cca. Ve saluto e si dDi’ vo’ ve donco appuntamento a mmiercurí ca vene doppo d’ ‘a nacchèlla (trasferta) a tTurino contro â vecchia zoccola p’’a mubbara (partita) ‘e coppa italglia. E nnun faccio prunuostice.

ilnapolista © riproduzione riservata