Cca Sarri, DeLa e ssocie ànn’ ‘a dda vedé súbbeto che s’à dda fà

Che collera guagliú, che collera! Pecché jettà, comme succedette ajeressera ô san Paolo, ‘nnante a scarze ttrentamila perzune, jettà dduje punte [ca ce fosseno servute cumme ô ppane e ca Marekiaro nce steva assicuranno…] e rriajalà [pe sfarma (colpa)’e Reina] ‘nu russimmo (pareggio) a cchilli quatto profuche d’’o pappavallo ‘e lotito, ca tirajeno ‘mporta ‘na vota sola e ca nun s’’o mmeretajeno… è ‘na cosa ca nun se ne scenne e da ajeressera nun arrivo a ppariarla. Cca Sarri, dela e ssocie ànn’ ‘a dda vedé súbbeto che s’à dda fà pecché accussí ‘nnante nun se po’ gghí! Ce serve assulutamente, aspettanno a ssant’Arcadio, ‘nu veru marcazzo (centravanti) ca ‘a mena dinto pecché quanno s’à dda vencere, s’à dda vencere i ‘a trancara (difesa), pe pparta soja nun à dda fà cchiú rrijale! P’ajeressera jette comme jette, dammoce ‘nu pizzeco ‘ncopp’â panza e mmettimmoce cu ‘a panza e ccu ‘o penziero pe vvencere ‘e tre o quatto mubbare (partite) ca vèneno primma ca ‘ncrassifica ce surpassano atalanta e tTurino!

Passammo ê ppaggelle:

REINA 4,5 Me dispiace, ma accussì è! ‘A sfarma (colpa) d’’o russimmo (pareggio) d’ajeressera fove tutta soja[tant’è vvero ca, ‘ncassata ll’adaffa (rete), se pigliaje a pponie ‘ncapo isso stesso… ] ca ‘ncopp’a ll’unicu tiro serio d’’a lazzio facette ancòra ‘na papera, rijalanno n’adaffa (rete)  a ll’avverzarie ca nun s’’o mmeretajeno. A ‘stu punto Sarri êsse ‘a truvà ‘o curaggio ‘e mannarlo ‘mpanca facenno jucà o a sSepe o ô Prevatariello visto ca ‘e stuche (gol) pigliate pe bbia ‘e Pepe accummenciano a addivintà troppe, spicialmente si ‘e rappurtammo ê tire arrivate ‘mporta; ajeressera ‘o prano (errore) suĵo cu Keità, cundizziunaje tutta ‘a mubbara (partita) d’’o Napule!

HYSAJ 6- Ajeressera purtroppo sbagliaje cchiù ‘e ‘nu daimmo (appoggio) verzo ê cumpagne e paricchi vvote Immobile ‘o mettette ‘nfifficultà.’Ncumpenso sfresaje (sfiorò) ll’adaffa (rete) da fora â muntaca (area di rigore), ma Marchetti lle dicette ‘e no!

CHIRICHES [‘oVampiro] 6 Pure a isso, spustannose dâ parta soja,Immobile cercaje ‘e metterlo ‘ndifficultà, ma ‘o Vampiro nun facette prane (errori) cu ‘o turrese, ca facette palla corta .

KOULIBALY 6,5 Sempe prisente a ccentro d’’a trasera (difesa) risultaje assasío (fondamentale) cu pparicchi tacculle (interventi) mumazze (ottimi) spicialmente a sciuliamazzo comme succedette ô 92′ ‘ncuollo a dDjordjeviccio , ‘int’ a ll’urdema azziona d’’a sibbacca (match).

GHOULAM 5,5 Currette assaje pe ddà sustentazziona (sostegno) a ll’azziona cuana (azzurra) facennose truvà quase sempe cchiú dint’â mità ccampo d’’e lazziale ca d’’a nosta; cugliette pure ll’alafachía (traversa) direttamente cu ‘nu tiro ‘e squina (corner); però, arreto êsse avuto stregnere meglio ‘ncuollo a cKeità senza cuncederle tantu  spazzio pe ttirà, ‘mmece facette vedé ca ‘o fatto nun era ‘o suojo e s’attrassaje speranno [ma accussí nun fove] ca ce ‘a facesse a ppruvvedé ‘o Vampiro!

ZIELINSKI 6 Doppo ‘nu primmo ajone (primo tempo) poco mascullo (brillante) criscette a ll’arrancua (ripresa) pruvanno a rrennerse periculuso senza però truvà né jusaida (assist) né stuche (gol).

DIAWARA 6,5 Se facette apprezzà ‘mmiez’ô campo spicialmente a ll’epata (fase) ‘e ruttura d’’o juoco; cu ttutto ca spazzio nun ce ne stette ‘o guaglione truvaje sinamparco (comunque) quacche chesema (varco) ‘nteressante.

Marek HAMSIK 8 Nun sulo pe ll’adaffa (rete) troppo bbella ca ce dètte ‘a speranzia ‘e vencere, ma pure pecché pe ttutt’’a sibbacca (match) se facette ‘nu mazzo tanto participanno a ògne azziona e, cquanno tenette palla isso, â Lazzio lle tremmajeno ‘e ccosse vedenno comme ‘o capitano giustrava tiranno e lanzanno cuntinuamente dint’ê spazzie p’’e cumpagne ca però nun scartajeno nisciuno d’’e rijale ca isso lle dette! [da ll’87’ ALLAN s.v.]

CALLEJON[Peppe ‘a ‘Nguenta] 5,5 – Si ‘nTurchia jettaje fora troppi pallune, ajeressera nunn’ avette, nè se prucuraje ll’accasione pe ttirà. Pochi strife (guizzi), poche ‘e pussibilità ‘e farese vedé; ‘a fora ‘e ‘na granna jusaida (assist) ‘e tacco pe lLorenzigno ca nun ‘a sfruttaje, cumbinaje overo poco; Êsse ‘a piglià sciato! [da ll’81’ EL KADDOURI trasuto troppo tarde nun servette a nniente!]

MERTENS [Ciruzzo] 6- Cchiú ca ‘e spaventà ddoje o tre vvote a mMarchetti nun putette fà visto ca nun è ‘nu “nove” overo e sse vedette: facette tutto a mmestiere nsi’ ô mumento d’’a cunchiusione cupulianno (scambiando) cu ‘e cumpagne, ma perdennose dinto a ll’urdemi sidece metre. Peccato!

INSIGNE[Lorenzigno] 5,5 – Se dètte ‘a fà, ma aizaje porvere jennose a ‘mpezzarese addó nun ce steva ‘o spazzio e perdenno pirciò troppi pallune. Pe gghionta ‘e ruotelo nun vedette maje ‘a porta e ffove assaje ‘mpriciso quanno arrivaje a cunchiudere.[dô GABBIADINI 5 Ô ssolito comme avette ‘o pallone guardaje verzo â porta, ma dint’ a ll’unica accasione overa avuta nun truvaje ‘e meglio ca cunzignà palla ‘mbraccia a mMarchetti.

Cunvincimmoce:nunn’ è ‘nu veru marcazzo (centravanti) e nnun’ ‘o po’ ffà!]

All.SARRI 5 Se disperaje p’’e duje punte perdute pe bbia ‘e Reina, ma fove pure sfarma (colpa) soja ca lle mancaje ‘o cuorio ‘e fà jucà a sSepe o ô Prevatariello; p’’o riesto à dda puntà ‘e piere cu ddela p’avé primma ‘e súbbeto [aspettanno a mMilikco] ‘nu marcazzo (centravanti)patentato e ppo s’à dda ‘nventà quacche auta cosa visto ca ‘a surpresa ‘e Ciruzzo fauzo “nove” è ggià spalummmata!

ll’arbitro DAMATO 4,5 Nun se mmeretaje cchiú ‘e tanto ‘stu barlettano, vecchia ‘nfama carta canusciuta ca nun saccio pecché spisso nce ‘o mannano dê pparte noste… Sí, d’accordo grossi fetenzie nun ce ne facette, ma, ‘ndanno d’’o Napule caputiaje cchiú ‘e ‘nu carì (fallo),nun nutizziaje (ammoní) cchiú ‘e ‘nu lazziale e nun ce dette ddoje o tre ttimmurrie (punizioni) ô lémmeto d’’a muntaca (area di rigore) lazziale pe ccierti carí (falli) miezo fora e mmiezo dinto!

E ffermammoce cca. Pe ccomme jette ajeressera, dicimmo: “Pacienza!” E sperammo ca jesseno meglio ‘e vvote attalíe (successive). P’’o mumento ve ringrazzio ‘e ll’attenziona e, si dDi’ vo’, ve dongo appuntamento p’’a mubbara (partita) aliranna (prossima) ca mo comme a mmo nun saccio quann’è e ccontro a cchi! Staveti bbe’.