ilNapolista

‘O motulo ‘e don Rafele nun se discute

Nichessa larga e  ‘mpurtante assaje chella ‘ajeressera a ll’Ulimpico ‘e Roma contro â scuatra d’’o pappavallo ‘e Lotito! Nichessa ‘mpurtante guagliú  pecché doppo tre sconfitte cunzecutive, ‘nfra campiunato e Ciampionsa, signanno ‘a miseria ‘e ‘na rredda sola, ajeressera ‘e cuane êtteno ‘a dimustrà, a dispietto d’’o ttureno ca fove ‘na fetenzia ‘e nun avé perzo ‘o juoco,  ll’idee, ll’istiglia  (verticalizzazione) nicessaria e preputente, êtteno ‘a dimustrà d’essere capace ‘e nun sbracà ‘nfase difenziva[ ‘a fora ‘e ‘na sbannata (p’’a verità cchiú d’’a mediana…) ca ce custaje ‘a siconna rredda] e soprattutto êtteno ‘a dimustrà d’essere capace ‘e turnà a ccentrà ‘o berzaglio. E ce riuscetteno â faccia ‘e cchiú d’ uno ca ggià steva cantanno ‘o deprofundísso ‘ncuollo a don Rafele, sicuro ca nun fósse riuscito a mmagnarse  struffole, mustacciuole e ppasta riala… Sapite che llimone s’êtten’’a magnà quanno ô prazzo d’’o fullé (alla fine dell’incontro) ‘e cuane festiggiajeno ‘nzieme a don Rafele, dimustranno ca  ‘e ttre sconfitte cunzecutive erano sulo ‘nu bruttu ricordo. E cumminfatte ‘o Napule turnaje a vvencere e ll’êsse pututo fà pure cchiú llargo si nun ce fósse miso Zuniga e cquacche ato  (e ppo ve dico…)e ‘a sfurtuna ‘e n’utobbutto (autogol).Ma se vincette, se vincette e cchesto conta. Passammo ê ppaggelle:

REINA 6,5  Sicuro ògne vvota ca fove   chiammato ‘ncausa. Nun putette  chiaramente fà niente ‘ncopp’a ll’utobbutto (autogol) ‘e Behrami e  ‘ncopp’â rredda ‘e Keità ca facette fora tutt’’a mediana ca restaje a gguardà, mentre nisciuno [Armero] asceva a nchiudere. Assaje pronto e ttassuso  (veloce)  pe ddoje vote ‘nchiusura vascia!

MAGGIO 5 Una cosa bbona facette e ffove ‘a sponna ca Pandevvo sfruttaje a mmestiere; p’’o riesto nun accumpagnaje maje ll’azziona accuntentannose ‘e fà ‘a  fase difenziva. Troppo poco!

ALBIOL 6  Alluntanaje  ‘a minaccia comme putette sbruglianno ‘a matassa pure p’’o cumpagno ‘e sezziona (reparto). Pruvaje pure a ascí palla ô pere pe sparagnà ê suoje quacche llanzo ad capocchiam ‘e Britòsso…, ma cu chillu tturreno  ‘nfamo jette ‘int’ê chiavette!…

BRITOS 5  ‘Ncullabburazziona  cu  Inlèrro arresecaje ‘e fà ‘a   frittata ô prazzo (alla  fine)  d’’o primmo ajone. P’’o riesto d’’o fullé, pigliato ‘a n’attacco ‘e cannavarite avigué (acuta), facette  troppi bassurere (suggerimenti) e pugge  (rilanci) sballate o ad capocchiam arresecanno, cu n’ata durmuta, ‘o ricore ‘ncuoll’a   Floccari.

ARMERO 4   Nun se po’ cchiú gguardà!Esizziale (disastroso) ‘nfase difenziva tenette ‘ncopp’â cuscienza  ll’utobbutto (autogol) ‘e Behrami essenno rummaso a gguardà senza fà niente comme Candreva metteva ‘a palla ‘mmiezo, pe nun ddicere ca ggià ‘a primma se facette sistematicamente superà  ‘a Candreva ca ‘o facette sufferí pe ttutto ‘o fullé. Tanto pe nun cagnà rummanette a gguardà, senza stregnere a nchiudere pure ‘ncopp’â rredda ‘e Keità.

INLER 5  ‘Nu passo arreto a ppietto ‘e ll’urdemi fullé, ‘o turco-napulitano ajeressera nun truvaje maje ‘nu lanzo decente accuntentannose ‘e quacche pasiglio (passaggio) laterale. Nun nchiudette maje ‘ncopp’ê tire d’’e centrocampiste e c’êsse pututo custà caro e amaro ‘a fessaria ca mettette ‘mporta a Hernanèsso.

BEHRAMI 5,5 Miezu punto mancante nun tanto pe chillu sfurtunato utobbutto (autogol), ma p’’o fatto ca ajeressera ‘o ggiuvinotto nun facette chello ca sape fà ‘nnante â difesa. INSIGNE 6-  Tantu muvimento, ma senza zuco;Lorenzigno    s’appricaje  pure ‘nfase difenziva, ma – prubbabilmente p’’e caratteristiche soje  – nun riuscette a ddà ‘na mana a  Armero. Jucatore ‘e briscula cummannata, se facette sgamà troppo ampressa ca, quanno se grattava ‘ncapo, avesse miso ‘a palla ‘ncopp’ô siconno palo.

PANDEV 7  Da alliccarse ‘e bbaffe ‘a ggirata ca fruttaje ‘o doje a uno e facette capí comme fósse fenuto ‘o fullé: c’è ppoco ‘a fà! ‘O ggiuvinotto dint’ô stritto va a ccarne e maccarune e ‘o  facette vedé a dispietto d’’e tifuse lazziale ca ‘o siscajeno; e se  vedette pure  quanto fove  pulitelico (prezioso) ‘nfra ê linie pe ccomme pruteggette ‘o pallone e ppe ccomme dettaje ll’urdemu pasiglio ê cumpagne, mannanno ô manicomio ‘a tràsera (retroguardia)lazziala comme succedette quanno servette ll’ajuda (l’assist) a Higuaínno p’’o tre a uno! (dal 31’st DZEMAILI sv)

CALLEJÒN 6,5  Si ‘o Napule sufferette sulo ‘ncopp’â curzia mancina fove pecché isso a ddritta dètte ‘na bbona mana a   mMaggio. Nun avette granni  spazzie, ma dint’ô stritto fove  uno d’’e cchiú ppricise.Asciuto  Higuaínno jette ‘mpusizziona ‘e primmo artigliero   (prima punta) e signaje ‘o quatto a ddoje ca mettette ‘o punto ô fullé e ce levaje dê ‘mpicce (dô 92° BARITI sv)

HIGUAIN 7,5  Turnaje a mettere firma sott’ô tabbellino d’’e rredde  doppo vintiseje juorne  ‘a chella fatto  ô Marziglia e firmaje  addirittura ddoje vote:signaje ‘a primma  mannanno a accattà ‘o ttozzabancne a  cCanà,po  resistenno â chiusura ‘e Cianí, anticipanno ‘o tiro e ffuttenno a  mMarchetti ‘ncopp’ô  palo luntano; p’’a siconna rredda dettaje ‘o lanzo ô cumpagno e ghiette a cunchiudere cu sette parme! P’’o riesto po jucaje tutto ‘o fullé sempe  a sservizzio d’a scuatra,dimustranno d’essere ‘o campione ca vale tutt’’e sorde spise pe pigliarlo!  (da ll’84° MERTENS 6,5  ‘Na perna  ‘o pallone ricuperato ‘ncopp’â trecquarte e ll’ajuda  (l’assist) pe Cagilecònno ca firmaje ‘o quatto a ddoje nchiudenno ‘a pratteca e sparagnannoce ‘nu finale ‘e sufferenzia!)

Benitez 7  L’atalossa d’ajeressera dimustraje, si ancòra fósse nicessario, ca quacche prubblema ce sta cu quaccheduno e a ggennajo s’à dda vedé che s’à dda fà…. ma ‘o motulo ‘e don Rafele nun se discute pure ‘ncopp’a ‘nu turreno fetente comme a cchillo ‘e ll’Ulimpico; cu cquatto attaccante ‘ncampo ‘o Napule fove cchiú  equilibbrato d’’a scuatra d’’o pappavallo ‘e Lotito; Maggio è arrivato ô desserto, Armero nun se po’ cchiú guardà e certamente nun po’ ffà ‘o quarto ‘e mancina  ‘ndifesa – soprattutto si nun c’è sta ll’esterno  ca  ‘o dà ‘na mana ‘int’a cchella camma  (zona) e quindi fósse nicessario cchiú ampressa ‘e súbbeto puté cuntà ‘ncopp’ a Reveié.P’’o riesto s’êsse ‘a truvà ‘o mezzo ‘e fà risciatà a bBehrami, ‘e s’êsse ‘a arricurdà a  Inlèrro e  a mMarekiaro ca êssen’’a turnà a ffà chello ca sanno e ponno fà. Sinamparco (comunque) tenuto presente quanto volle dint’â tiana e ccu cquali sustatiche (ingredienti)  stammo appruntanno ‘a menesta mmaretata ‘o  pruggetto ‘e don Rafele me pare ca  vïaggia, vïaggia bbuono!

Arbitro BERGONZI 4.5 Cierti vvote ce purtaje bbuono,ajere pure, ma  i’ nun ‘o vulesse cchiú;  è ‘na meza cazetta comme ô riesto ‘e tutte ll’arbitre italiane, e  sse porta ancòra appriesso ‘o pisemo  d’ ‘e critiche ca avette p’’e duje ricure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe ffà vedé ca nun sta abbaccato cu ‘e napulitane sisca sempe contro ê cuane  e ‘nzerra tutte ‘e dduje ll’uocchie cunzentenno(senza piglià pruvvedimente) ‘nu juoco viulento all’avverzarie d’ ‘o Napule (comme succedette ajere, ca primma ‘e tirà fora ‘nu cartellino jalizzo ‘nfaccia a ‘nu lazziale  , nce penzaje diece vote ‘a coppa e ppo nun ‘o cacciaje, futtenose d’’o recolamento e  ca puteva  succedere  ‘na disturbata e fósseno putute ascí  a mmazzate…) e  cunzentenno ‘nu juoco  adicúso (falloso) e vviulento a ttutte ‘e lazziale pure a cchilli cchiú guagliune   (ca nun m’arricordo ‘o nomme…,ma ‘a faccia ‘e galera sí  ). E fermammoce cca. Cu chesto ve saluto speranno ca  pure cu ll’Udinese, sàpato ca vene ô san Paolo, turnammo a ccantà: Oj vita, oj vita mia!   Staveti bbe’. E ssi dDi’ vo’ ce sentimmo ‘a vota  ca vène.

R.Bracale Brak

 

 

 

ilnapolista © riproduzione riservata