Cuntentezza e ddoje paure

Ajeressera, guagliú fernette comm’i’ m’aspettavo ca fernesse e comme avevo ditto e scritto cchiú vvote… Fernette cu ‘a vittoria napulitana e cu Ccannavaro ca aizaje ‘o primmo  trufeo ‘e ll’era De Pezzentis: ‘a Coppa Italia ca nun è ‘nu trufeo ‘mpurtante ma sempe meglio ‘e niente! Fernette comm’avevo prunusticato e me fa assaje piacere pure si mo tenco paura ‘e doje cose: 1) ca De Pezzentis nun po’ ffà a mmeno ‘e mantenere ‘a prumessa fatta a Agnelli ‘e lle dà a Ccavani pe pigliarse ‘ncagno a  Matri; 2) ca mo nun ce levammo cchiú ‘a tuorno a Erode Mazzarri, uno ca nun à dato ‘nu juoco â scuatra, ca ‘ncampiunato cchiú ‘e ‘nu terzo, o ‘nu quarto, o ‘nu quinto posto nun ce po’ assicurà,ca nun fa crescere ‘e guagliune anze ll’accide dint’â connola…

‘Nzomma guagliú tengo ‘sti ddoje paure e ppenzo nun ce puteva capità ‘nu guajo cchiú brutto ‘e chillo ‘e vencere ‘sta Cuppetta ca si salvaje ‘a tempurata ‘e Mazzarri, nun ce dà bboni speranze pe cchello ca à dda succedere ll’anno ca vène. Certo po’ pure fa piacere  doppo 25 anne  vencere chillu trufeo vinciuto ggià ô 1962,ô1976 e ô1987, ma s’ à dda sempe vedé si ‘o prezzo ca se pava pe vvencere nun è troppo auto, e i’ dico ca perdere a Ccavani e essere custrette a tenerse a Mazzarri è overamente ‘nu prezzo troppo aveto!  Ll’ unica vera suddisfazzione ll’unicu  sfizzio overo fuje chillo ‘e vencere ‘a coppa ‘e ‘na manera o ‘e n’ata  contro n’assatanata scuatra ‘e chianchiere, mmerdajuole e femmenielle, risultanno â fine ll’unica scuatra capace ‘e vatterla durante a ‘sta tempurata appena fernuta! Accuntentammoce ‘e chesto e sperammo ca mme sbaglio a ppenzà chello ch’aggiu ditto a proposito  ‘e Cavani e Mazzarri!

Passammo a ll’urdemi ppaggelle d’ ‘a tempurata: DE SANCTIS 6,5: Ô primmo tiempo ‘e juventine sparajeno a vvrenna e isso se  salvaje senza troppi prubbleme; durante a ll’arranqua però addeventaje dicisivo quanno calaje ‘a sarracinesca stuppanno ‘e tentative ‘e Bonucci e Ppepe.

CAMPAGNARO 7: ‘Na raiva  (furia), soprattutto ô primmo tiempo, quanno appressuraje cu ccegna (grinta) e chizziglia (foga)  dimustranno d’essere ‘nu difenzore cumpleto e capace d’annappà (di ricoprire) cchiú ‘e ‘na plantiglia  (piú di un ruolo).

ARONICA 6,5: Chino ‘e bbona vuluntà, cchiú ‘e ‘na vota s’arrangiaje e spisso s’êtt’ ‘a salvà cu ‘a sperienzia. Mettette ‘a musarola a Bborriello e ô finale riuscette a ffà perdere ‘a capa a Mmerdarella.Làcaro (giannizzero) ‘e Mazzarri, nun tradette â notte cchi ‘mpurtante.

CANNAVARO 5,5: ‘O meno lucente (brillante) d’ ‘e  cumpagne d’ ‘a difesa,s’êtt’ ‘a arrangià spisso ausanno ‘e  manere forte pe nun farse zumpà.

MAGGIO 6: Appressuraje cchiú ppoco d’ ‘o ssoleto  pecché Mazzarri ll’urdinaje ‘e guardà cchiú ‘a vicino e cu attenziona a ‘nu brutt’ accunto   comme Estigarribia.Furtunatamente nce stette  Campagnaro ca currette e appressuraje pe dduje.

DZEMAILI 6,5: autentico cane ‘e presa, azzannaje ‘e feliette d’‘e  purtature ‘e palla juventine,bluccanno a  Vidallo e  a Mmarchisio.

INLER 7,5: I’ mo vulesse capí comme se fa a ccriticà a ‘nu jucatore comme a ‘stu turco-napulitano. Ricuperaje ‘na sarma ‘e pallune – comme  a chillo ca po passanno p’ ‘e piede ‘e Pandev purtaje â rredda ‘e Marekiaro -senza cuncedere rispiro a Ppirlo e cumpagne.

ZUNIGA 6-: Doppo pochi siconde se magnaje ‘na rredda quase fatta…,   po s’ accuntentaje d’ambuscià (presidiare) ‘na fascia ca sinamparco  (comunque) ‘a juventus(sa) sfruttaje overamente poco.

HAMSIK 7: Durmette pe quase tutt’ ‘a rencontra, ma po signaje ‘na rredda  assaje bbella e tanto ‘mpurtante,ca ‘nchiudette ‘a facenna e arrivaje dint’ô meglio mumento d’ ‘a scuatra ‘e Conte. (Da ll’85° DOSSENA sv )

LAVEZZI – 7,5: Trasette deciso a ffà cose ‘e pazze e ‘e facette nfi’ a cche lle rijettono ‘e ccosce: ‘ndemuniato, pe fermarlo ll’êttano’a vattere sistematicamente sotto a ll’uocchie ‘e ‘na mmunnezza d’arbitro… Ô primmo tiempo fuje ‘o cuscemarro   (l’incubo)  d’ ‘e difenzure juventine ca ‘o vedevano debbuscà  (sbucare) ‘a tutt’ ‘e pparte. Certo, sbagliaje pure quacche pallone facile, ma dètte ‘a sensazziona ca appena tuccava ‘na palla fósse succieso coccosa. Cumminfatte se prucuraje ‘o ricore ca arapette ‘a rencontra.Fernette chiagnenno e ppo a festiggià cu ‘e tifuse. Ultima rencontra cu  ‘a maglia d’ ‘o  Napule? I’ spero ca no ma avimm’ ‘a aspettà quacche semmana pe saperne ‘e cchiú.(dô 72° PANDEV 7: L’asso dint’â maneca ‘e Mazzarri.Trasette  e custruette ‘o  pallone d’ ‘o doje a zzero  ca ‘nzerraje ‘a rencontra).

Edinson Cavani 7+: Mettette ‘a firma soja sotto ancòra ‘na rredda ‘mpurtante ‘e ‘na tempurata fantastica. Friddo e priciso signaje ‘nu ricore a mmestiere, ‘matanno’ ‘a scuatra ca  ll’anno ca vène ‘o vulesse cu essa p’ ‘o ritorno nn’Airopa.Sperammo ca De Pezzentis nun ce ‘o dà; ma aggio paura ca ggià ‘e juoche so’ ffatte e ggià s’è avutato ‘o Vangelo e chella d’ajere fuje ll’urdema partita ‘e Cavani cu ‘a maglia luvarda… Accussí liggette tutti chilli abbrazze e vvase ‘e Cavani cu ‘e cumpagne a ffine ‘e rencontra. Sperammo ca me so’ sbagliato! (Dô 92° BRITOS sv).

All. MAZZARRI – 7: Quanno se cunquista ‘nu trufeo s’à dda dà pe fforza quacche mmerito ô trainerro, e i’ pure ‘o ffaccio dicenno ca ‘o livurnese nun facette sgamà ‘a pastetta ca ce steva sotto vincenno ‘a sfita a distanza cu ‘o parrucchino juventino ca se truvaje cu ‘e ppovere ‘nfose e ‘e ribbotte appilate; cumminfatte Mazzarri lle ‘nzerraje ‘e  fasce laterale, bluccaje ‘e centrocampisti e tamponaje comme putette a  Ppirlo.Riuscette a mmannà ‘ncampo ‘na scuatra ca recitaje ‘na bbona parta dànno a vvedé d’ essere  urdinata dinto a  tutte ‘e   settore, ma soprattutto assaje cchiú ‘ncazzata e mmorta ‘e famma ‘e ll’avverzario. Me dispiace sulo ca doppo ‘e ‘sta vittoria a  Mazzarri ce attocca ‘e tenercelo pure ll’anno ca vene e cu cchisto cchiú d’ ‘o terzo posto ‘ncampinato nun se po’ uttené!

Arbitro BRIGHI 4,5: Pare ca ll’anno ca vène ‘o levano ‘a miezo e nun ‘o fanno arbitrà cchiú, visto ca a quarant’anne nun è stato capace ‘e addiventà ‘nternazziunale… E tte crero! Si à sempe arbitrato comme facette  ajeressera ca siscaje ‘e falte  quase sempe ô ccuntrario, comme puteva sperà ‘e addiventà ‘nternazziunale?… Troppo ‘e maneca larga e pirmissivo cu ‘e chianchiere juventine: êttamo aspettà ‘o 42° pe sentirlo ‘e siscà ‘na punizzione a ffavore d’ ‘o Pocho sistematicamente pigliato a mazzate dê difenzure e centrocampiste ggià  dô primmo minuto. Ce détte sí ‘nu ricore sacrusanto, ma pure allora sbagliaje nun sventulanno  ‘o   cartellino russo p’ ‘o purtiere Storari  ca aveva stiso ‘o Pocho.P’ ‘o riesto  me parette poco priparato atleticamente. E comme vo’ addeventà ‘nternazziunale?

E cu chesto ve saluto e ce sentimmo si dDi’ vo’ appena arrivano ‘e pprimme nutizzie certe ‘e calcio-mercato.

FORZA NAPOLI! – CIUCCIO FA’ TU! MAZZÀ, VATTÉNNE!

R.Bracale Brak

ilnapolista © riproduzione riservata