Ajere m’ ‘o ssentette ‘e scennere pe dereto ê rine

Stonco a llutto, guagliú,a llutto! ‘Mprimmese pecché ‘a juventus(sa) à vinciuto ‘o campiunato e ppo p’ ‘a  granna delusione d’ajere! E ne tenco ancòra ‘o ttuosseco ‘mpont’ô musso! Ajere ‘o Napule perdette n’ata partita ‘mpurtante e ca s’êsse avut’ ‘a vencere…pe nun fallí ll’urdemo ubbiettivo d’ ‘a tempurata: ‘o terzo posto ‘ncampiunato ca ce avesse pututo assicurà ‘e preliminare ‘nCiampionsa.  E ‘mmece chi t’ ‘o ddà?!  Succedette proprio ‘o ccuntrario.’O Napule  se ne turnaje dâ città ‘e  Balanzone cu dduje salame cu ll’aglio  dint’â sacca!   Ma i’, ggià comme vedette scennere ‘ncampo ‘e napulitane cu chella jettatoria maglia uovo sbattuto…,  m’ ‘o ssentette ‘e scennere pe dereto ê rine…  giacché p’ ‘e juorne passate êvo avvertuta troppa sicurezza ‘ngiro ‘nfra jucature e pennarule: tutte erano sicure ca ‘o Napule ce ll’avesse ggià fatta e ‘a cammenata a Bologna fósse stata ‘na scampagnata pe festeggià… E ‘mmece ato che scampagnata! Lla fuje ‘na passiata p’ ‘a Ruanella appriesso a ‘nu carro ‘e Bellumunno, ‘na jurnata ca cchiú bbrutta nun puteva essere e aveva ‘a ferní malamente a fforza pecché è overo ca ‘o Napule durante ô primmo tiempo nciarmaje cinche o seje uccasione granne ‘e signà…, ma però –  ‘nu poco pe scalogna, nu poco pe pricipitazzione e pe  ‘mpricisione –  nun ne sfruttaje manco meza; e quanno succede ‘na cosa ‘e chesta è naturale ca po ll’avverzario piglia vavia, se mette ‘nguarnascione e tte fa ‘nu mazzo tanto senza misericordia apprufittanno pure ‘e ‘na difesa napulitana troppo allera e cucassa (ridicola) ! E  cchesto succedette e mmo ce âmmo sulo magnà ‘o limone e zucarce ‘o franfellicco. ‘O terzo posto è pperduto!   Over’è ca ce rummane ll’urdema partita ‘a jucà ô san Paolo cu ‘o Siena, ma nun è detto ca se vence; ma pure ca se vencesse oramaje Udinese e Lazzio ce so’ zumpate ‘ncuollo e te saluto! Mo pe salvà ‘sta tempurata nun ce rummane ca vencere ‘a Coppa Italia, sempe ca ‘a juventussa ce ‘a fa vencere accuntentannose ‘e avé vinciuto  ‘o campiunato! Ma nun ne so’ sicuro!

Passammo ê ppaggelle:

DE SANCTIS 5 Nun tenette particulari respunzabbilità ‘ncopp’ê ddoje rredde, ma santu dDio!, ‘a ‘nu purtiere riserva d’ ‘a nazziunale uno s’aspetta quacche vvote ‘nu miraculo. Morgan ‘mmece nun ne sape fà e ajere  fuje pure furtunato ca Di Vaio sbagliaje cchiú ‘e ‘na vota si no ‘mmece ‘e duje stessemo parlanno ‘e tre o quatte salame cu ll’aglio!

BRITOS 4,5  Purtroppo ‘ncopp’ â primma rredda nun mantenette ‘a pusizzione e p’ ‘o riesto d’ ‘a rencontra sufferette ll’ attacche ‘e ll’ecchese cumpagne suoje. ( Da ll’82°DOSSENA 4,5  Da signalà sulamente ‘nu pare ‘e cruzze braduse , ‘mpricise e previsibbile (cross lenti, imprecisi  e prevedibili)).

ARONICA 4,5  Brutta atalossa d’ ‘o siciliano;  cuntinuamente ‘mpreoccupazzione nun se sapette spiccià; essenno isso  ‘o centrale difenzivo nun se po’ spiecà ‘o  muvimento fatto p’aiutà a  Cannavaro ô mumento d’ ‘a primma rredda, lassanno sguarnita ll’area ‘e ricore.

CANNAVARO 4,5  Senza cerevella! Ô primmo tiempo ‘mmece ‘e ciuncà a ffà ‘o difenzore vulette jí annante, ma nun essenno mestiere suĵo,  aizaje porvera e ll’unica cosa nun dico bbona,ma passabbile…  ca però servette sulo a menà fummo dinto a ll’uocchie d’ ‘e tifuse ‘a facette  quanno, menanno ‘na vreccia a capocchia,  cugliette ‘a travesagna. Ô siconno tiempo ll’ ammancajeno  ‘e fforze ‘e venette meno comme a ttutta ‘a scuatra!

ZUNIGA 4  Nervuso, ‘mpriciso e casinista  nun riuscette maje praticamente a zzumpà ll’ommo  e – pe gghionta ‘e ruotolo –   spisso sciuliaje perdenno pallune puliteliche  (preziosi).

INLER 5  Primmo tiempo bunariello, ma senza zuco;ô siconno tiempo nun se vedette praticamente maje! ( Dô 67° DZEMAILI 4  Appannato e troppo  pricipituso,nun ce mettette razziucinio; pe gghionta ‘e ruotolo, comme a ppesce ‘e cannuccia,  abbuccaje ê pruvucazzione e se facette jettà fora ‘ngenuamente).

GARGANO 4,5  Tanta corza, ma a vvacante e  senza zuco e troppi, troppi pasiglie (passaggi) sbagliate.

MAGGIO 4,5  ‘O  fantasema ‘e ll’esterno ca ati vvote era piaciuto ê tifuse luvarde; ajere, ormaje a ccurto ‘e sciato e de forze,  nun currette nemmeno comme sapeva fà e aveva fatto spisso.(Dô 54° LAVEZZI 4  ‘E  tifuse luvarde e i’ cu lloro speràvamo ca ‘o Pocho putesse ‘mmentarse ‘na magaría, facenno luce ‘miezo a chillu presebbio, ma restajemo deluse pecché l’atalossa soja nun sulo cunfermaje ca ll’argentino è fora cundizzione, ma dimustraje pure ca ‘o guaglione sta ggià cu’a capa a n’ata parta e se ne fotte d’ ‘o Napule)!

HAMSIK 5,5  Tenette pe tutt’ ‘a partita ‘ncopp’â cuscienza ‘o pisemo d’ ‘a rredda sbagliata ô siconno minuto a ttu ppe ttu cu Agliardi ca facette ‘na granna fijura paranno ‘o pallone, ma ‘a fessaria fuje tutta ‘e Marekiaro pecché a ttre mmetre dâ porta nun se po’ sbaglià!

PANDEV 5,5  ‘A chiena e ‘a vacante:Buonu primmo tiempo  cu quacche bbona arruca (buon  suggerimento), po n’arranqua (una ripresa) da scurdà.

CAVANI 4,5  Tanto, tantu  movimento ma pure  tante, troppi rredde stranamente sbagliate. Me dispiace ‘e averle miso accussí poco, ma purtroppo ajere ‘o zengariello me deludette assaje; ‘a isso nun me ll’êsse maje aspettato: fuje ca steva stanco o niente niente ce stesse cocc’ata cosa ‘a sotto? ‘O guaglione se fósse sfastediato d’ ‘o sole e d’ ‘o mare  stesse ggià penzanno ‘e jrsene a accasà cu ‘na scuatra ca à dda fà ‘a Ciampionsa?Si è accussí ca ‘o Signore ll’accumpagna! Spero sulo ca nun se jesse a ‘nchiaccà ‘e sossazza (lebbra) janca e nnera!
All. MAZZARRI 4  A ccurto ‘e jucature ‘e risciancia (ricambio) giacché isso vulette ‘na rónna (rosa) ‘e poca ggente, mettette ‘ncampo ‘na scuatra oramaje senza cchiú benzina, senza cegna e senza ggenio, presentanno ‘na difesa assulutamente cucassa (ridicola) e ‘o Napule  jettaje ô viento ‘a granne uccasiona  ‘e assicurarse ‘o passaggio ‘nCiampionsa; nun riuscette manco a ggestí a mmestiere ‘e cagne. Chella d’ajere fuje  ‘o ritratto ‘e ‘na tempurata spisso ‘nsagliuta e disevante (deludente).Oramaje è cchiaro ca Mazzarri a Nnapule nun ce po’ stà cchiú e  se nn’ à dda jí a ffelicità coccheduno ato, purtannose appriesso   quaccuna d’ ‘e pedine soje: Cannavaro, Aronica, Dossena!

Arbitro BERGONZI 4.5 Cierti vvote ce purtaje bbuono,ajere no! E i’ nun ‘o vulesse cchiú;  è ‘na meza cazetta comme ô riesto ‘e tutte ll’arbitre italiane, ma se porta ancòra appriesso ‘o pisemo  d’ ‘e critiche ca avette p’’e duje rigure date ô Napule (tempurata 2007/2008) contro â juventússa; ‘a tanno, quanno arbitra ‘o Napule, pe fà vedé ca nun sta abbaccato cu ‘e napulitane sisca sempe contro ê cuane  e ‘nzerra tutte ‘e dduje ll’uocchie cunzentenno(senza piglià pruvvedimente) ‘nu juoco viulento all’avverzarie d’ ‘o Napule (comme succedette ajere, ca primma ‘e tirà fora ‘nu cartellino jalizzo ‘nfaccia a ‘nu bolognese, ce penzaje diece vote e ‘o ffacette sulo  quase â fine d’ ‘a partita, doppo ch’era succieso ‘na disturbata e stevano ascenno a mazzate…) cunzentenno ‘nu juoco viulento e carugnesco favezo   e ammagagnato  (nun m’arricordo ‘o nomme…,ma ‘a faccia ‘e delinquente cu ‘o naso ‘e ‘nu boxerro, sí  ). Pe gghionta ‘e ruotolo teneva signate ca Cavani era diffidato e senza ca ‘o zengariello êsse fatto ‘na falta ‘mpurtante,  ll’ammunette a pposta pe farle ferní ‘o campiunato primma ‘e ll’urdema jurnata!) Purtroppo tutte ll’arbitre italiane so’  meze-cazette e  visto ca ‘o Napule dint’ô Palazzo conta quanto a ll’icchese dinto a ll’affabbeto,ce avimmo tené ‘a posta!

E cu chesto ve saluto speranno ca cu ‘o Siena ce levammo ‘e pacchere ‘a faccia d’ ‘a scunfitta d’ajere e difennimmo ‘o mmacare ‘o posto dinto a ll’ecchesa Coppa UEFA.

R.Bracale Brak

ilnapolista © riproduzione riservata