Ajeressera , doppo d’ ‘e tre sciuliamazze pigliate uno appriesso a ll’ato finalmente ‘o Napule se levaje ‘e pacchere ‘a faccia e ‘sta cosa ce jette dint’ a n’uosso soprattutto pecché â fine d’ ‘a partita, aspettanno chello ca succede ogge, ‘o Napule riuscette a zzumpà ‘a cuollo a Rroma e Interre, appustannose – p’ ‘o mumento – a ttre punte dô terzo posto e nun è dditto ca nun ‘o riesce a cunquistà cu ll’urdeme seje partite ca rummanono…Pe mme chille d’ajeressera fujeno overamente tre ppunte puliteliche (preziosi)e ppure si ‘a scuatra cuana à dda correre sempe appriesso a coccheduno, ajeressera ‘o Napule ‘o duvere sujo ‘o facette e ogge tocca a ll’ate ‘e farrlo e nun è ditto ca ce ‘a fanno; cumminfatte pozzo dicere ca ggià ll’Udinese, ajere ô juorno, facette ‘nu miezu passo favezo e ppenzo ca ‘o fanno pure ll’ate! ‘Nzomma ajeressera , cu tutte ‘e fessarie ca sta facenno Mazzarri, ‘o Napule cunquistaje ô stesso ‘na vittoria ‘mpurtante nun sulo p’ ‘o murale, ma nicessaria pe ffà priparà a dduvere ‘a scuatra p’ ‘a rencontra ‘e miercurí; e i’ spero ca d’ajere accumminciaje ‘a rincorza pe ‘nu finale all’uso ‘e Rossini!’Na cosa è ccerta però: comme va va ‘sta tempurata â fine Erode Mazzarri se nn’à dda jí! E nun v’aggi’ ‘a spiecà ‘o pecché! Ditto chesto, passammo ê ppaggelle:
DE SANCTIS 6- Poca fatica; ancòra però troppo ‘ndiciso quanno ascette; nun dètte tranquillità â difesa!
CAMPAGNARO 6,5 Bbona partita d’ ‘o Toro; custretto a essere ‘nu poco troppo acetuso (ruvido), s’abbuscaje ‘nu cartellino jalizzo.
CANNAVARO 6,5 Cuntrollaje senza troppi prubleme a Caracciolo; sbagliaje cchiú ‘e ‘na puggia (rilancio), ma se levaje ‘o sfizzio ‘e chiudere ‘a rencontra signanno ‘a rredda d’ ‘o doje a zzero, apprufittanno – sotto porta – ‘e ‘na ribbattuta (respinta) d’ ‘o purtiere. Giesú, Giesú, Giesú!
ARONICA 6,5 Sempe cuncentrato ‘ndifesa.
MAGGIO 7+ (‘o meglio)Ajude pricise,corza cuntinua,taglie azzeccata,’na rredda mancata pe poco,pecché ‘nu piamuntese salvaje ‘ncopp’â linia…, facette vedé comme à dda jucà n’ala.
GARGANO 6,5 Peccato p’ ‘e troppe sustentazzione (appoggi) sbagliate soprattutto ê primme quarantacinche minute, ma nun se stancaje maje ‘e correre muzzecanno ‘e feliette ‘e chi capitava.
INLER 6 Urdinato,jucaje facile e sbagliaje poco
(dô 77° VARGAS 6 Trasette troppo tarde, ma se facette nutà pure senza esaggerà.
DZEMAILI 7 Ajude, sessanza (facilità) ‘e corza, ‘na bbotta ‘a fora parata a mmazzo dô purtiere; ‘nzomma ‘na bbella atalossa!
ZUNIGA 6 Assaje ‘nsalute, jucaje senza sparagnarse; nun tenesse ‘o maledetto vizzio d’ ‘o dribbling(o), se putesse parlà ‘e ‘nu jucatore a cinche stelle….
(dô 90°e nun aggiu sbagliato a scrivere!… DOSSENA s.v. Che cacchio trasette a ffà?)
HAMSIK 6- ‘O rinnovo d’ ‘o cuntratto lle ggiuvaje; galliggiaje ‘nfra centrocampo e attacco, ‘mpignaje a Ffontana cu ‘nu bbellu tiro ‘e mancina (dô 92° AMMENDOLA s.v. Tanto p’ ‘o fà debbuttà: auguri!)
CAVANI 6,5 Peccato pe ll’ uccasione sciupate, soprattutto chella d’ ‘e primme quarantacinche minute, ma cumunque sbluccaje ‘a rencontra pure si cu ‘na rredda facile (e fujeno vinte),e ce mettette ‘o ssuĵo pure p’‘a siconna custrignenno a Ffontana a ribbattere ‘a ppalla ‘ncopp’ê piere ‘e Cannavaro sulo sulo…
All.MAZZARRI 6 P’ ‘o risultato…, ma sulo pe cchillo.Pecché p’ ‘o riesto me deludette e dimustraje pure ajeressera d’essere n’Erode tenenno fora a Vargas(so), pure quanno mancavano Lavezzi e Pandev(vo). Tutte ritardate e inutile ‘e sostituzzione. Votta a fferní ‘stu campionato speranno ca ‘o livurnese facesse ‘e bbalice e ghiesse a felicità a cocc’ ata suggità!
l’arbitro DOVERI 6,5 P’avé strignuto ‘e diente e nun esserse fatto sustituí cu tutto ca doppo duje minute ‘e juoche se ‘nfurtunaje a ‘na spalla e ‘o miedeco d’ ‘o Napule ll’êtt’ ‘a fà ‘na serenga pe permetterle ‘e turnà ‘ncampo!
E cu chesto ve saluto. Bbona dummeneca e, si dDi’ vo’ ce sentimmo ggioverí ca vène speranno ca se jesse a vvencere a Llecce!
R.Bracale Brak
