ilNapolista

Scetarce comme ajere ssera è ttroppo ‘nfamo

Tengo ‘o bbeleno fino a ‘mpont’ô musso… ‘O ssapevo ca ce stévamo sunnanno ‘nu suonno e ca a ‘nu certo punto ce avevem’ ‘a scetà, ma scetarce comme succedette ajere ssera è ttroppo ‘nfamo; è overo ca m’ ‘o ssentevo ‘e scennere pe ddereto ê rine pecché, mentre me stevo sistemanno ‘nnant’â televisione m’arrivaje ‘a telefonata ‘e n’amico jettatore ca cu ‘a scusa ‘e me dicere ca nun puteva passà a purtarme ‘a palma,   dicette ca ‘a partita se ll’avesse vista â casa soja e cunchiudette ‘a telefonata dicenno: “FORZA NAPOLI” e i’ ca nun me ll’aspettavo  nun facette a ttiempo a risponnerle “Terque quaterque!” Dicette ‘o prevete: “I’ nun ce credo, ma ‘a suttana se ne cade!…” E cumminfatte ‘a partita d’ajere fuje streuza e pure ‘a  scunfitta nosta cu ‘nu primmo tempo cumpletamente sciupato e senza zuco… cu ‘o centrocampo ‘e ll’Udinese  ca ce duminaje mentre ‘e nuoste ‘mblocco aizàvano póvera… Fosse stata ‘na partita ‘a chiudere súbbeto e ‘mmece ‘e nuoste ‘a sbagliajeno cumpletamente… Certo ‘e jucature cuane (azzurri) nun songo marziane e ppo’ capità ca quacche vvota jocano  malamente! Peccato ca è succieso proprio ô mumento ‘e n’appuntamento ‘mpurtante! Ajere ssera Denisso facette ‘o fenomeno jucanno ‘na partita spettaculare  (che peccato averlo perduto pe pigliarse a Lucarelli!…) e luttaje  comme a ‘nu leone, mentre culo’echiummo durmeva cu ‘a zizza ‘mmocca! Pe nun parlà d’ ‘o  Pocho ca ajere ssera  fuje cumpletamente  assente e pe nun ddicere ca  quanno ‘na squatra (comme succedette ajere ssera)  ce bblocca ‘e curzie laterale  e è llesta a ripàrtere (veloce a ripartire) ‘a  sufferenza nosta appalesa chiaramente ‘a  debbulezza d’ ‘a  difesa… (e nun dicite ca ce ll’aggiu sempe cu culo’echiummo…) pecché sulo àpula (debole) è ‘na difesa ca cunsente a Inler ‘e tirà ‘a fora a bbotta sicura e a Denisso ‘e fà ‘o fenomeno!   Si a cchesto ce agghiuntammo  ‘a jurnata  storta  e sfurtunata ‘e Cavani e ‘e cundizzione sfrangiose ( precarie) ‘e Lavezzi ca  perdette  palle a centrocampo e dinto a ll’area avverzaria ca nurmalmente songo ‘a forza soja,  si ce agghiuntammo ca Pazienza e Marekiaro jevano a ttre pe nun ddicere a ddoje,    se capisce pecché se perdette ‘a partita; dispiace, ma s’à dda riconoscere ca  ajere Mazzarri nun sapette urganizzà ‘a squatra,  nè mmetterla ‘ncundizione ‘e scardinà ‘nu catenaccio ca manco ‘a bonanema ‘e Rocco…, s’à dda riconoscere ca   sbagliaje a mannà ‘ncampo a Lavezzi ca nun era ‘ncundizzione e cchiú assaje sbagliaje a nun sostituirlo ggià â mmità d’ ‘o primmo tempo cu ‘o verdummaro  Mascara, ca  dimustraje ancòra ‘na vota d’ essere ‘o cchiú ppronto sott’â porta.E nun voglio parlà ‘e Cavani  ca sbagliaje  ‘o ricore tirannolo â ddritta d’ ‘o purtiere proprio lla addó ògne purtiere nurmalmente  se mena  e cchillo ‘e ll’Udinese ggià nn’aveva parate cinche…Peccato,  peccato!! Cumunque ‘a scigna cchiú fforte è ‘a penzà ca cu Chievo e Udinese ce avimmo refuso dudice punte; eppure ‘sta brutta mazziata avuta ce à dda fà riflettere ca ‘o Napule à avuto cumunque n’anno  ‘mpurtante assaje e mmo ll’è rrummaso n’ubbiettivo priggevole  (prezioso): ‘o siconno posto, ubbiettivo ‘a difennere assolutamente cu ll’ógne e cu ‘e diente, a scippe, a mmuozzeche e  a ccapate nsino â fine! Mo vène ‘o ddificile…,  ma i’ penzo ca si ‘e ccacciammo ‘a fora tenimmo chelle ca ce servono e tenimmo  tutte ‘e   mezze pe nun sciupà n’annata facennoce piglià dâ cacavessa (dal panico)! Forza, curaggio e ccòre ‘e lione;  âmmo assulutamente mantené ‘a   pusizzione!! E oje cchiú ca maje ‘e tifuse ànn’ ‘a stà a ffianco d’ ‘o Ciuccio e darle fiducia  e murale!!! Certo ‘o juorno doppo ‘e ‘na mazziata po’ essere triste, pure assaje triste, ma maje demuralizzato! Difennimmo ‘o tusiello (podio)…e ll’applavuse  ca ‘o pubblico à rialato â squatra â fine d’ ‘a partita  songo ‘nu bbuonu punto ‘e partenza  pe  penzà  positivamente a Ppalermo!! Peccato pe ccomme è gghiuta,   pecché era meglio tené ll’Interre a ccinche punte. Ma nun dammo audienza…Credimmoce ancòra…E cuntentammòce d’ ‘o siconno posto! Vulite proprio ca faccio ‘a paggella? E vva bbuó, ‘a faccio:

DE SANCTIS: 6-, Facette  ‘nu  miraculo doppo pochi minute, e ffuje  ll’unico ca  pruvaje  a tené a ggalla ‘e  suoje; êsse pututo forze fà coccosa ‘ncopp’ô primmo gollo, ma ‘ncopp’ a cchillo ‘e Denisso nun ce steva niente ‘a fà!

CANNAVARO: 4, nun riuscette a chiudere, nè cu ‘a capa (e cquanno maje!), nè cu  ‘e piede  ‘e scurribbanne ‘e ll’Udinese; dint’ a ll’azzione d’ ‘o gollo ‘e Denisso ‘o lassaje sulo sulo p’ascí a ‘ntercettà (ma senza riuscirce) ô jucatore ca crussaje…  Pe furtuna se facette ammuniní e  diffidato zompa  ‘a sfita contro ô Palermo.

CAMPAGNARO: 5, nun sempe  riuscette a  nchiudere bbuono e cquanno se prupunette annante disgrazziatamente fallette ‘e capa  ‘o  gollo ch’êsse pututo arapí n’ata vota ‘a  partita.

RUIZ: 6, forze fuje ll’unico ca riuscette  a mettere ‘na toppa ê scurribbanne uffenzive e ll’Udinese, ma spisso spisso culo’echiummo ‘o lassaje sulo e isso ccantaje  e purtaje ‘a croce!

PAZIENZA: 5,  nun fuje isso: bastantamente upaco se  facette pure ammuniní ; erâmo abbituate a vederlo faticà pe dduje e ‘mmece ajere nun se vedette quase!

YEBDA: 5, Pur’ isso nun riuscette a ffà quase niente, neanche a difennere…

MAGGIO: 6-,   ll’unico ca  ce  pruvaje,ma ‘a velocità ssoja  venette frenata a dduvere dê difenzure ‘e ll’Udinese. Sfurtunato quanno ‘e capa cugliette ‘a traverza!

DOSSENA= 5 , Pur’ isso assaje, assaje  upaco…E che saciccio!Êsse ‘ncarrato ‘nu cross! Delusione tutale!

HAMSIK= 4,5 ‘a fora ‘e quacche crosso menato ‘mmiezo â sanfrasòn, se divuraje ll’uno a zzero a  ll’inizzio d’ ‘a ripresa, e nun riuscette a essere ‘ncisivo e cunvincente.

CAVANI=4, nun fuje ‘nzerata  e se vedette dê troppi smarrunate ca facette; sotto porta addirittura lisciaje ‘o tiro d’ ‘o gollo ‘e ll’uno a ddoje; pe furtuna però ca ce stette ‘o verdummaro   Mascara ca curreggette ‘mporta; sbagliaje diverzi tire dint’ a ll’ area e se facette parà ‘o  ricore tirannolo a capa ‘e saciccia dâ parta sbagliata!

LAVEZZI 3,5= Piezzo e ppejo; scennette ‘ncampo cu ‘a cacavessa ‘ncuollo e aizaje inutilmente póvera; ô ssolito nun vedette ‘a porta manco cu ‘o binocolo; ll’êsse cagnato ggià dâ mmità d’ ‘’o primmo tempo; se facette ammuní e quase certamente vene squalificato…, accussí Pasca s’ ‘a va a ppassà ô paese suĵo!

Dô 65° MASCARA= 7, trasette ‘o verdummaro e truvaje súbbeto ‘o gollo; tòca  ‘a resa (la prestazione) ‘e Mascara,ca se puteva fà trasí ô posto d’ ‘o Pocho  ggià dâ mmità d’ ‘’o primmo tempo…

Dô 75° LUCARELLI= 6-, s’abbuscaje ‘o  ricore, e luttaje ‘ncopp’ a   ògne  ppalla,  però sfurtunatamente   venette  sempre nchiuso.

Dô 63° GARGANO= 5, Pur’ isso assaje  upaco  non  facette vedé nisciuna  differenza quanno trasette…

All. MAZZARRI 4.5: s’aunette ‘a funicella corta e ‘o strummolo tiriteppo:‘a squatra soja  ‘ncappaje dinto a ‘na  serata storta e isso nun ce capette ‘na mazza d’ ‘a partita ca fuje senza storia ggià dô primmo tempo quanno ‘o Napule jette a ttre e ll’Udinese spadruneggiaje a centrocampo; ‘nzomma Mazzarri avette n’ ata lezzione ‘a  Guidolin ca â fine vincette ‘a sfita priggevolmente. Mo à dda cercà ‘e fà repiglià súbbeto ‘e guagliune suoje  pe nun sciupà ‘o finale ‘e ‘nu granne campiunato!

Arbitro TAGLIAVENTO 4,5 – Senza perzunalità, doppo d’ ‘o  ricore se facette scappà ‘a mano ‘a partita e poco mancaje ca nun fernesse a mazzate.  Fossero state nicessarie quacche cartellino jalizzo o russo ‘e cchiú spicialmente cu ‘e jucature ‘e Guidolin ca facettero ‘e guappe e ‘e pruvucature!

E mettimmo punto cca. Tanti auguri. Ce sentimmo. Staveti bbe’!

R. Bracale Brak

ilnapolista © riproduzione riservata