‘Nu granne Napule guagliú ajere ssera,ma quanta sufferenza.Pure ajere pe ttutt’ ‘o primmo tempo ce simmo cumplicato ‘a vita…, ma po ô siconno tempo è ccagnata ‘a museca e cu ‘nu poco ‘e bbona sciorta e soprattutto pecché è svapurato ‘o maluocchio ‘e chill’amico, tifoso juventino, ca assettato ‘ntribbuna divano menava ‘a favetta contro ê luvarde dicenno sí forza-napoli, ma penzanno ca-puozze-perdere…, riuscettemo a purtarce â casa chisti tre ppunte ca so’ ‘mpurtante assaje p’ ‘a crassifica e soprattutto p’ ‘o morale.Se capette ca ‘sta squatra,senza Lavezzi,ca ll’êva lassata orfana pe ttre gghiurnate,nun po’ proprio jucà.Si nun ce sta ‘o Pocho ce ne vo’ n’ato comme a isso…, ma chi t’ ‘o dà? Appena isso è tturnato e à accumminciato a gghiucà comme sape, ’a machina à accumminciato a ffunziunà n’ata vota e a ffà golle; peccato pe Cavani ca à avuto ‘nu paro ‘e bonissime uccasione e nun è riuscito a menarla dinto… ‘O guaglione ‘o vedette cumunque troppo stracquo e s’avesse arrepusà ‘nu poco.Ma nun è ccosa: a ‘stu mumento à dda astregnere ‘e dienti pecché ‘a squadra nun ne po’ ffà a mmeno e è nicessaria ‘a presenza soja ‘ncampo.S’êsse pututo nchiudere assaje primma ‘sta partita ma, comme ô ssolito,cu ttutto ca ce truvajemo cu uno ‘e cchiú, sciupajemo paricchi bbuoni pallune ca êssero pututo addivintà gollo.Ma nun cercammo ‘o pilo ‘int’a ll’uovo e gghiammo annante; avimmo mantenuto ll’Udinese a distanza ‘e sicurezza, ce simmo accustato ê mmilanese; p’ ‘o mumento accuntentammoce… E ppassammo ê ppaggelle
DE SANCTIS 5,5 – Maje ‘mpignato seriamente,restaje fermo comme a ‘na statua ‘e sale senza manco abbuzzà ‘na parata ‘ncopp’â bbotta ‘e Palladino.P’ ‘o riesto avastantamente sicuro ‘ncopp’a ll’asciute aute, ma ô ssolito ‘e rilance suoje fuje fatte a ccapa ‘e saràca…
SANTACROCE 6 – Certamente nun fuje ‘na partita straurdinaria, ma doppo quacche fessaria fatta ô pprincipio comme a cquanno se scurdaje ‘e Palladino ’ncopp’ô cornerro ca purtaje ‘nvantaggio ‘e ducali, fuje puntuale e priciso ‘ncoppa a ògne pallone arrivato dê pparte soje,
(dô 40°st CRIBARI sv – Justo ‘ntempo pe frucellà (spazzare via) quacche pallone e pe guderse ‘a festa.)
CANNAVARO 6- – Facette a spallate primma cu Bojinov e ppo cu Crespo , riuscenno sempe a rejere ll’urto, ma nun dètte ‘na mana maje ê cumpagne, tirannose ‘a pizza sotto. Partita ‘e resistenza e de fermezza, ma êsse ‘a cuncorrere cchiú assaje cu ‘e difenzure evitanno ‘e jí a rrompere ‘o saciccio a ll’attaccante luvarde ‘ntasanno ll’aria ‘e ricore senza custrutto!
RUIZ 7,5 – Certamente cu ‘sta partita d’ajere Victorro à pusitivamente ‘mpressiunato; tuosto e straurdinario ‘ndifesa e cu ‘o pere vellutato quanno avette ‘a avvià ‘a manovra. ‘A chello visto ajere ssera, se tratta ‘e n’accàtteto (acquisto) majateco e eccezziunale. Si joca sempe accussí, ‘stu guaglione è overo ‘nu campione!
MAGGIO 7,5 – Dâ surpresa â certezza. Victorro ‘mpressiunaje, ma Christian se cunfermaje jucatore fundamentale pe ‘stu Napule. Currette ddoje vote ‘e cchiú ‘e ll’avverzarie, e curunaje ‘a partita cu ‘nu bellu gollo capoteco e de finezza (pallunetto vascio ‘ncopp’ô purtiere).
PAZIENZA 6,5 – Cagnaje ‘o partnerro ma isso è ssempe puntuale e priciso e cercaje pure ‘e mettere ‘na pezza, ma – che peccato! – nun ce riuscette, quanno Santacroce se perdette Palladino e Cannavaro se facette ‘e cacchie suĵe… . S’ è spicializzato a ghiucà ‘tipo Pirlo’ e dimostra ‘e saperlo fà â perfezzione! È isso ‘o plessimetro (il metronomo) ‘nsonstituibbile d’ ‘o Napule. Ma che s’aspettano ‘e ggrazzie ‘e Cesare pe rinnuvarle ‘o cuntratto?!
ZUNIGA 5,5 – Farlo jucà a mmancina è overo ‘na jastemma.Nun me piacette troppo. Êsse preferito a Vvitale Nun smestaje (spinse) comme ce s’aspettava; aiutaje però ‘ndifesa.Lle capitaje ‘na bbona uccasione e isso sparacchiaje ‘ncuoll’ô purtiere!…
YEBDA 6- – ‘A sòlita partita p’ Hassannno. ‘Stu jucatore pare ca nun fa vedé maje tutto chello ca sape e ppo’ ffà . Ce mette sempe tanta forza e ssalute ‘mmiez’ô campo, ma spisso spisso joca troppo ‘facile’, senza ‘a nicessaria attenzione.
(dô 33°st GARGANO 5 – Justo ‘ntiempo, vinte siconne, per sbaglià ‘o ‘solito’ pallone ‘mmiezo ô campo e puteva fà succedere ‘a disturbata arruvinanno ‘a partita….)
HAMSIK 7 – Ajere turnaje a ffà ‘o Marekiaro ca vulimmo. Facette peffino ‘o straurdinario, isso ca tène ‘o vizzio ‘e jucà diece minute a ppartita….ca ‘mmece ajere fuje majateca cunnita ‘a ‘nu gollo, pure si ‘nfuori juoco, ‘a n’assisto furmidabbile e ‘a mumente ‘e bellu juoco ‘mmiezo ô campo. Quanno gira isso è ttutta n’ata storia!
(dô 45°st MASCARA sv – Tuccaje quacche pallone e facette ‘ntiempo a spurcarse ‘a divisa…, ma nient’ato. Ora mo ch’ è turnato Lavezzi chi sa’ quanno le capita ‘e jucà!)
CAVANI 6 – – Assaje luntano dô Cavani ‘e quacche mmese fa. ‘O guaglione ‘o vedette – me ripeto – cumunque troppo stracquo e s’avesse arrepusà ‘nu poco.Me meravigliajeno cierte atteggiamente suoje, comme prassempio ‘a poca voglia ‘e luttà comme se vedette a ll’urdimi minute d’ ‘a partita. Nun trovaje ‘o gollo e ffuje stranamente ‘o cchiú nervuso d’ ‘e suoje. suoi. S’aggitaje assaje ‘ncopp’ê curzie laterale p’ allarjà ‘e mmaglie avverzarie e premettere a Marekiaro ‘e scurrazzà ‘mmiezo. Carrecato a vvrenna nun facette ‘a bbotta;Ce pruvaje pure, ma nun truvaje maje ‘a porta. Sperammo pe dummeneca ca vène contro ô Cagliari e nun mettimmo speranze inutili: Di Natale è lluntano e nun ne fa una vacante!
LAVEZZI 7,5 – Turnaje e risulvette ‘a pratica Parma. Fantastico pe cchelli scavallate soje, ca nun se ponno frenà….’N’ assisto e ‘nu gollo accussí pe ritrovà ‘o gusto d’ ‘a partita so’ ‘e meglio abbuorde.Rientrava doppo tre turne ‘e fermata ubbligatoria e aveva mette ‘o stuppaglio ô cannone d’ ‘e critiche d’ ‘e juorne passate.E ll’à fatto a mmestiere: ‘mplacabbile quanno ‘nvelocità abbrusciaje a Lucarelli e servette ‘nu granne assisto pe Marekiaro. Facette taglie pricisi e sistimate comme a ‘nu fleccheso, e proprio cu uno ‘e chisti riuscette a mettere ‘mporta ‘o pallone ‘e ll’uno a ddoje. Cu ‘na burdata ‘a luntano accarezzaje ‘o palo.Jucatore funmamentale. Benturnato Pocho!
All. Mazzarri (Sostituito dal secondo Frustalupi) 6,5 – ‘A pressione ca s’era venuta a ccrià doppo Milanno e Bbrescia e ‘e paregge d’ ‘e pprimme ‘nclassifica puteva essere scafacciante (opprimente).Ma isso carrecaje a dduvere ‘a squatra soja e vincette ‘a partita jucannola cu currivo e scigna (rabbia e grinta) ca ‘a sempe caratterizzano ògne squatra soja.
Arbitro MORGANTI 6+ Chistu ‘nfurmatore d’ ‘e miedice (aliasse piazzista ‘e mmedicine) ’e Ascoli Piceno ati vvote aveva ‘ncruciato ‘o Napule e s’era sempe abbuscato ‘a me 3,5. Epure ajeressera steva pe succedere: viecchio, granne ,gruosso, gravante e forze cu ‘na ponta e ‘ntoscia, sempe a ccurto d’ussiggeno e de sciato, curricchiaje ‘ncopp’ a ll’ova e cieco e surdo, ô primmo tempo facette avvedé ca nun era succieso maje niente…cunzentenno a chilli delinquente d’ ‘o Parma ‘e menà mazzate ‘a cecate senza dicere niente e nun vulenno vedé ‘nu ricore ‘ncuollo a Mmaggio sutterrato sotto porta… ;ô siconno tempo po se pigliaje ‘o ppusilleco (si divertí) affuscanno (agitando) quacche cartellino jalizzo.Pe ffurtuna nun cecaje bbuono a vvedé ca Marekiaro steva ‘nfuorjuoco dinto a ll’azziona d’ ‘o mumintaneo pareggio… e fforze ‘o facette pe farse perdunà ‘a puttanata d’ ‘o fatto ‘e Maggio.
A llunnerí ca vène, si ‘o Signore vo’. Staveti bbe’!
R.Bracale Brak
