Cavani luttaje, Lavezzi ô ssolito, Maggio nun è isso

DE SANCTIS 6- Raramente chiammato a spurcarse ‘e guante, truvaje ‘a manera ‘e fà ‘na parata decisiva (tiro ‘e Babbello);ma ‘nu paro ‘e asciute a vvacante me facettero correre ‘o friddo pe deret’ê rine!
CAMPAGNARO 6+ – Dê pparte soje pocu traffico, cosa ca lle cunzentette ‘e s’appresentarse annante cu bbona perzunalità.
CANNAVARO 5 Poco ce mancaje ca ‘into a ddoje uccasione nun regalasse pallune d’oro all’avverzarie.Menu male ca contro ô Milanno nun ce starrà pecché squalificato.
ARONICA 6,5 – Ce serve e ccomme!
Jucaje cu autorità pe bbona parte d’ ‘a partita;sulo ‘nu pare ‘e fessarie(ma senza cuseguenze) durante ô siconno tempo…
MAGGIO 4,5 – Nun ce simmo, nun è isso! Ajeressera se rennette periculoso justo una vota cu ‘nu buonu crosso pe Cavani.P’ ‘o riesto aizaje póvera a vvacante! È ancora troppo poco;nun ce sta cu ‘a capa: chi sa’ addó ‘a tene! Fosse stato i’ ô posto ‘e Mazzarri nun ll’avesse cunvucato proprio o ll’avesse sostituito subbeto e avesse spustato ô posto sujo a Campagnaro e miso ‘ndifesa a Grava (dô 30esimo s.t. Zuniga s.v.: piezzo e ppejo)
PAZIENZA 6+ ‘O solito filtro ‘mmiez’ô campo,ajeressera pure preciso ‘nfase ‘e mpustazzione.
GARGANO 5- Currette currette, ma senza custrutto e rijalaje troppi pallune a ll’avverzarie cu passagge sballate.
(Dô 37esimo s.t. Yebda s.v.simmele e cunforme)
DOSSENA 5- S’applicaje , ma assaje meno ‘e ll’urdemi partite; pure quanno se trattaje ‘e fà ‘o crosso nun fuje ‘o Dossena ca ce servesse!
HAMSIK 5- Me dispiace, ma tanto se mmereta pecché Marekiaro, ch’è ‘nu campione, avesse pututo fà assaje ‘e cchiú e ‘mmece ajeressera me parette ‘nu jucatore nurmale e tutto summato ggiraje luntanissimo dô pallone. Fuje pure sfurtunato pecché dinto a ll’unicu mumento prupizzio ca steva pe ffà gollo, lle rispingettero ‘o pallone ‘ncopp’ â linea ‘e porta!
( Dô 39esimo s.t. Sosa s.v.Nun tuccaje palla.)
LAVEZZI 7 – Nun combinaje assaje specie pecché, ô ssolito, quanno vuttaje ‘a luntano quacche vreccia verz’ â porta, nun centraje maje ‘o specchio e mmannaje ‘o pallone ‘ncurva;però dette sempe l’impressione d’essere ‘nu pericolo custante p’’a difesa ‘ngrese. Peccato ca rummanette sulo n’impressione!
CAVANI 6,5 Luttaje e combattette comme a ‘nu lione;ma êsse ‘a essere servuto meglio: ‘e pallune ca avette fujeno overo poche e de chiummo, ma cu ttutto chesto stette lla lla pe trasformarne uno ‘e oro! Mannaggia ô demmonio scartellato!

All. Mazzarri 5- Se vedette chiaramente ‘a cacarella (il timore reverenziale) d’ ‘a squatra ca facette ‘nu primmo tempo assurdo! Quacche mossa p’adderezzà ‘a partita avesse pututo farla primma. Ma se sape ca è cucciuto e se ‘nfessisce cu ccierte scelte….
Stàteve bbuone!
Brak

ilnapolista © riproduzione riservata